ଥୁଆମୂଳ ରାମପୁର,୧୪ା୧୦ (ଦୁର୍ଗା କୀର୍ତ୍ତି)- କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକର ତାରାପଦର-ନୁନରେଶ ରାସ୍ତା ଶୋଚନୀୟ ହୋଇପଡିଛି। ଫଳରେ ଏହି ରାସ୍ତା ଉପରେ ନିର୍ଭର କରୁଥିବା ଆଖପାଖ ଅଞ୍ଚଳବାସୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ରାୟଗଡ଼ା ଜିଲା ସୀମାନ୍ତ ମୁଖ୍ୟ ରାସ୍ତାଠାରୁ ତାରାପଦର ପର୍ଯ୍ୟନ୍ତ ମାଟିରାସ୍ତା ୨୦୨୨-୨୩ ଆର୍ଥତ୍କ ବର୍ଷରେ ଏମ୍ଜିଏନ୍ଆର୍ଇଜିଏସ୍ରେ ତିଆରି ହୋଇଥିଲା। ହେଲେ ଗତ ୨ ତାରିଖ ଲଘୁଚାପ ଜନିତ ପ୍ରବଳ ବର୍ଷାରେ ପାହାଡରୁ ବଡ ପଥର ଓ ମାଟି ଅତଡ଼ା ଖସି ମରଣଯନ୍ତା ପାଲଟିଛି। ଏହି ରାସ୍ତାକୁ ପ୍ରଧାନମନ୍ତ୍ରୀ ସଡ଼କ ଯୋଜନାରେ ସାମିଲ କରିବା ପାଇଁ ଅଞ୍ଚଳବାସୀ ଦୀର୍ଘଦିନରୁ ଦାବି କରିଆସୁଛନ୍ତି। ଏପରି କି ସ୍ଥାନୀୟ ସରପଞ୍ଚଙ୍କଠାରୁ ଆରମ୍ଭ କରି ସମିତି ସଭ୍ୟ ତଥା ବ୍ଲକ ପ୍ରଶାସନକୁ ଅବଗତ କରିଥିଲେ ମଧ୍ୟ ସୁଫଳ ପାଇନାହାନ୍ତି। ଏ ନେଇ ସ୍ଥାନୀୟ ସରପଞ୍ଚ ପ୍ରକାଶ ମାଝୀଙ୍କୁ ପଚାରିବାରୁ ଆମ ପାଖରେ ଏମ୍ଜିଏନ୍ଆର୍ଇଜିଏସ୍ରେ ନୁନରେଶ ଓ ତାରାପଦରକୁ ମାଟି ରାସ୍ତା କାମ କରିବା ପାଇଁ ୨୦ରୁ ୫୦ ଲକ୍ଷ ଟଙ୍କାର ପାଣ୍ଠି ଅଛି। ଆମେ ଆଗାମୀ ଦିନରେ ଯାହା କରାଯାଇ ପାରିବ ସେ ବ୍ୟବସ୍ଥା କରିବୁ ବୋଲି କହିଥିଲେ। କନିଷ୍ଠ ଯନ୍ତ୍ରୀ ଶମ୍ଭୁ ପ୍ରସାଦ କେଙ୍ଗୁଆ ଘଟଣାର ଅନୁଧ୍ୟାନ କରି କ’ଣ କରାଯାଇ ପାରିବ ସେ ନେଇ ଉପରିସ୍ଥ ଅଧିକାରୀଙ୍କୁ ରିପୋର୍ଟ ଦେବୁ ବୋଲି କହିଛନ୍ତି।
Dharitri – Odisha’s No.1 Odia Daily
