ମୁମ୍ବାଇ, ୨୫ା୧୦ (ପି.ଟି.)- ୧୯ ବର୍ଷରୁ କମ୍ ବିଶ୍ୱକପ୍ ୨୦୦୮ ବିଜୟୀ ଦଳର ଅନ୍ୟତମ ବ୍ୟାଟ୍ସମ୍ୟାନ ତନ୍ମୟ ଶ୍ରୀବାସ୍ତବ ଶନିବାର କ୍ରିକେଟର ସମସ୍ତ ଫର୍ମାଟରୁ ଅବସର ଘୋଷଣା କରିଛନ୍ତି। ୩୦ ବର୍ଷୀୟ ବାମହାତୀ ଖେଳାଳି କିନ୍ତୁ ତାଙ୍କ ଭବିଷ୍ୟତ ଯୋଜନା ସମ୍ପର୍କରେ କୌଣସି ସୂଚନା ଦେଇ ନାହାନ୍ତି। କାନପୁରରେ ଜନ୍ମଗ୍ରହଣ କରିଥିବା ତନ୍ମୟ କହିଛନ୍ତି, ଜୁନିୟର କ୍ରିକେଟ, ରଣଜୀ ଟ୍ରଫି ସ୍ତରରେ ନିଜ ସାମର୍ଥ୍ୟ ଅନୁସାରେ ସେ ସବୁକଛି ହାସଲ କରିପାରିଛନ୍ତି। ବିଶେଷ କରି ୨୦୦୮ରେ ୧୯ ବର୍ଷରୁ କମ୍ ବିଶ୍ୱକପ୍ରେ ପ୍ରଭାବୀ ପ୍ରଦର୍ଶନ କରି ଦେଶକୁ କପ୍ ଆଣିବା ସବୁଠାରୁ ଗୁରୁତ୍ୱପୂର୍ଣ୍ଣ ଥିଲା। କ୍ରିକେଟ କ୍ୟାରିୟରରେ ସହଯୋଗ ପାଇଁ ସେ ତାଙ୍କ କୋଚ୍, ଉତ୍ତରପ୍ରଦେଶ କ୍ରିକେଟ ପ୍ରଶାସନ, ପିତାମାତା ଓ ସ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି। ତନ୍ମୟ ୯୦ ପ୍ରଥମଶ୍ରେଣୀ ମ୍ୟାଚ୍ ଖେଳି ୧୦ ଶତକ ଓ ୨୭ ଅର୍ଦ୍ଧଶତକ ସହ ୪,୯୧୮ ରନ ସଂଗ୍ରହ କରିଥିଲେ। ହେଲେ ସେ ଜାତୀୟ ସିନିୟର ଦଳରେ ସ୍ଥାନ ପାଇ ପାରି ନ ଥିଲେ। ଘରୋଇ କ୍ରିକେଟରେ ସେ ଉତ୍ତର ପ୍ରଦେଶରୁ ପ୍ରତିନିଧିତ୍ୱ କରୁଥିଲେ। ପରେ ସେ ଉତ୍ତରାଖଣ୍ଡର ଅଧିନାୟକ ଭାବେ ଦାୟିତ୍ୱ ତୁଲାଇଥିଲେ। ମାଲେସିଆରେ ଅନୁଷ୍ଠିତ ୧୯ ବର୍ଷରୁ କମ୍ ବିଶ୍ୱକପ୍ରେ ତନ୍ମୟ ଟୁର୍ନାମେଣ୍ଟର ଅଗ୍ରଣୀ ସ୍କୋରର ଥିଲେ। ସେ ୨୬୨ ରନ ସ୍କୋର କରିଥିଲେ। ଫାଇନାଲରେ ଭାରତୀୟ ଦଳକୁ ଜିତାଇବାରେ ତାଙ୍କର ପ୍ରମୁଖ ଭୂମିକା ରହିଥିଲା। ସେ ଏଥିରେ ୪୩ ରନ ସ୍କୋର କରିଥିଲେ। ୨୦୦୮ରେ ୧୯ ବର୍ଷରୁ କମ୍ ଦଳର ଅଧିନାୟକ ଥିଲେ ବର୍ତ୍ତମାନର ଭାରତ ଅଧିନାୟକ ବିରାଟ କୋହଲି।
