କଟକ,୨ା୧୧ (କାର୍ତ୍ତିକ ସାହୁ)ସିଡିଏ ଫେଜ୍-୨ ଓ କଟକ ସଦର ଥାନା ଅଞ୍ଚଳରୁ ବାଇକ୍ ଚୋରି ଘଟଣାରେ ପୋଲିସ ୭ ଜଣଙ୍କୁ ଗିରଫ କରି ବୁଧବାର କୋର୍ଟ ଚାଲାଣ କରିଛି। ସେମାନଙ୍କଠାରୁ ୧୫ଟି ବାଇକ୍ ଜବତ କରାଯାଇଥିବା ଡିସିପି ପିନାକ ମିଶ୍ର ସୂଚନା ଦେଇଛନ୍ତି। ଅଭିଯୁକ୍ତମାନେ ମୋବାଇଲ୍ରେ କଥା ହେବା ବାହାନାରେ ମାଷ୍ଟର କି’ ଦ୍ୱାରା ବାଇକ୍ ତାଲା ଭାଙ୍ଗୁଥିଲେ ବୋଲି ପୋଲିସ ତଦନ୍ତବେଳେ ଜାଣିବାକୁ ପାଇଛି।
ସିଡିଏ ଫେଜ୍-୨ ଥାନା ପୋଲିସ ବାଇକ ଚୋରି ମାମଲାର ତଦନ୍ତ କରି ଏକ ଗ୍ୟାଙ୍ଗର ୫ ଜଣଙ୍କୁ ଗିରଫ କରିଛି। ସେମାନେ ହେଲେ କାଫଲାବଜାରର ଆକାଶ ନରେନ୍ଦ୍ର, ତଳ ତେଲେଙ୍ଗାବଜାରର ସୁକୁଲ ଖାନ୍, ସାନଖଇରାର ଚିନ୍ନାରି ହରିକ୍ରିଷ୍ଣ, ଭୁବନେଶ୍ୱର ଶିଖରଚଣ୍ଡିର ଜାହାଙ୍ଗୀର ମଲ୍ଲିକ ଓ ସେକ୍ ଅମଜାଦ। ସେମାନଙ୍କ ନିକଟରୁ ୧୦ଟି ବାଇକ ଓ ଗୋଟିଏ ବାଇକ୍ର ଇଞ୍ଜିନ ସହ ଅଂଶବିଶେଷ ଜବତ କରାଯାଇଛି। ଗତ ୨୯ ତାରିଖ ରାତିରେ ସିଡିଏ ସେକ୍ଟର-୧୦ ଅଞ୍ଚଳର ଜ୍ୟୋତି ରଞ୍ଜନ ମହାନ୍ତି (୪୩) ନିକଟସ୍ଥ ତାଙ୍କ ଅଙ୍କଲଙ୍କ ଘରକୁ ଯାଇଥିଲେ। ଘର ସମ୍ମୁଖରେ ତାଙ୍କ ବାଇକ ରଖି ଭିତରକୁ ଯାଇଥିଲେ। ସେଠାରୁ ଫେରିବା ପରେ ବାଇକ୍ ନ ଥିଲା। ବହୁ ଖୋଜାଖୋଜି କରି ନ ପାଇବାରୁ ସେ ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା(ନଂ.୧୩୩/୨୩) ରୁଜୁ କରିବା ସହ ସ୍ଥାନୀୟ ଅଞ୍ଚଳର ସିସିଟିଭି ଫୁଟେଜ ଯାଞ୍ଚ କରିଥିଲା। ଉକ୍ତ ଦିନ ସନ୍ଧ୍ୟା ୭ଟାରେ ମୁଖ୍ୟ ଅଭିଯୁକ୍ତ ଆକାଶ ନରେନ୍ଦ୍ର ଜଣେ ସହଯୋଗୀଙ୍କ ସହିତ ବାଇକରେ ବସି ସିଡିଏ ସେକ୍ଟର-୧୦ ପେଟ୍ରୋଲ ପମ୍ପ ଗଳିରେ ପ୍ରବେଶ କରିଥିଲେ। ରାସ୍ତାରେ ଯାଉଥିବାବେଳେ ଅଭିଯୋଗକାରୀଙ୍କ ବାଇକ ଘର ସାମ୍ନାରେ ଥିବା ଦେଖିଥିଲେ। ମୋବାଇଲରେ କଲ୍ ଆସୁଥିବା ଭଳି ଅଭିନୟ କରି ସେ ଉକ୍ତ ବାଇକ ନିକଟରେ ପହଞ୍ଚିଥିଲେ। ପରେ ସାଙ୍ଗରେ ନେଇଥିବା ମାଷ୍ଟର କି’ ସାହାଯ୍ୟରେ ଉକ୍ତ ବାଇକର ଚାବି ଖୋଲି ନେଇଯାଇଥିଲେ। ଗତ ୧୪ ତାରିଖରେ ସିଡିଏ ସେକ୍ଟର-୧୦ ଫୁଡ୍ କୋର୍ଟ ରେଷ୍ଟୁରାଣ୍ଟ ସମ୍ମୁଖରୁ, ୧୫ ତାରିଖରେ ସିଡିଏ ସେକ୍ଟର-୧୧ରୁ ଏବଂ ଚାଉଳିଆଗଞ୍ଜ, ମର୍କତନଗର, ବିଡ଼ାନାସୀ ଥାନା ଅଞ୍ଚଳର ବିଭିନ୍ନ ସ୍ଥାନରୁ ଚୋରି ହୋଇଥିବା ବାଇକ୍ ପୋଲିସ ଜବତ କରିଥିଲା। ଅନ୍ୟ ଅଭିଯୁକ୍ତମାନେ ଆକାଶଙ୍କୁ ବାଇକ ଚୋରି ଓ ବିକ୍ରି କରିବାରେ ସାହାଯ୍ୟ କରୁଥିଲେ। ପୋଲିସ ଅଭିଯୁକ୍ତମାନଙ୍କୁ କଟକ ଓ ଭୁବନେଶ୍ୱରର ବିଭିନ୍ନ ଅଞ୍ଚଳରୁ ଗିରଫ କରିଥିଲା। ଆକାଶଙ୍କ ନାମରେ ସିଡିଏ ଫେଜ-୨, ବିଡ଼ାନାସୀ, ଚାଉଳିଆଗଞ୍ଜ ଓ ମର୍କତନଗର ଥାନାରେ ୯ଟି ମାମଲା ରହିଛି।
ସେହିପରି ବାଇକ ଚୋରି ମାମଲାରେ କଟକ ସଦର ପୋଲିସ ୨ ଜଣଙ୍କୁ ଗିରଫ କରିଛି। ସେମାନେ ହେଲେ ମଙ୍ଗଳାବାଗ ଥାନା ଅନ୍ତର୍ଗତ କେଶରପୁର ଅଞ୍ଚଳର ସେକ୍ ଫଇଜାନ ଓ ବାରଙ୍ଗ ଗୋଡ଼ିସାହି ଅଞ୍ଚଳର ବଳରାମ ଓଝା। ସେମାନଙ୍କଠାରୁ ୫ଟି ବାଇକ ଜବତ କରାଯାଇଛି। ସୁତାହାଟରେ ରହୁଥିବା ନସିମ୍ ଉଦ୍ଦିନ ଖାନ୍(୪୧) ଗତ ୧୪ ତାରିଖରେ ଭାଣପୁର ସୁନି ମସ୍ଜିଦ ନିକଟରେ ବାଇକ ରଖି ଭିତରେ ନମାଜ ପାଠ କରୁଥିଲେ। ସେଠାରୁ ଫେରିବା ପରେ ବାଇକ୍ ନ ଥିବା ଦେଖିବାକୁ ପାଇଥିଲେ। ଏ ନେଇ ସେ ଅଭିଯୋଗ କରିବା ପରେ ପୋଲିସ ଏକ ମାମଲା(ନଂ.୫୯୬/୨୩) ରୁଜୁ କରିଛି। ଅଭିଯୁକ୍ତଦ୍ୱୟଙ୍କ ନାମରେ ଲାଲବାଗ, ମର୍କତନଗର, ବିଡ଼ାନାସୀ, କ୍ୟାଣ୍ଟନମେଣ୍ଟ, ସଦର, ବାରଙ୍ଗ ଥାନାରେ ୧୦ଟି ମାମଲା ରହିଥିବା ପୋଲିସ ଜାଣିବାକୁ ପାଇଛି।
