ନୂଆଦିଲ୍ଲୀ, ୧୭।୮- ଭାରତକୁ ସର୍ବାଧିକ ୩ଟି ଆଇସିସି ଟ୍ରଫି ବିଜୟୀ କରାଇଥିବା ମହେନ୍ଦ୍ର ସିଂ ଧୋନୀ ଅଗଷ୍ଟ ୧୫ରେ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି। ସେ ଅବସର ଘୋଷଣା କରିବାର ସମୟ ଥିଲା ରାତି ୭ଟା ୨୯। ”ସମର୍ଥନ ଏବଂ ଭଲପାଇବା ପାଇଁ ସମସ୍ତଙ୍କୁ ଅଶେଷ ଧନ୍ୟବାଦ। ଶନିବାର ରାତି ୭ଟା ୨୯ ପରଠାରୁ ମୁଁ ଅବସର ଗ୍ରହଣ କରିଛି ବୋଲି ବିବେଚନା କରାଯାଉ“ ବୋଲି ଧୋନୀ ତାଙ୍କ ଇନ୍ଷ୍ଟାଗ୍ରାମ୍ ହ୍ୟାଣ୍ଡେଲରେ ପୋଷ୍ଟ କରିଥିଲେ। ଏହି ସମୟକୁ ନେଇ ଏବେ ଆଲୋଚନା ଜୋର୍ ଧରିଛି। ୨୦୧୯ ବିଶ୍ୱକପରେ ଭାରତ ଏହି ୭ଟା ୨୯ ମିନିଟରେ ହିଁ ନକ୍ଆଉଟ ହୋଇଥିଲା। ଜୁଲାଇ ୯ ତାରିଖରେ ଅନୁଷ୍ଠିତ ନ୍ୟୁଜିଲାଣ୍ଡ ବିପକ୍ଷ ସେମିଫାଇନାଲରେ ଧୋନୀ ଶେଷଥରପାଇଁ ଭାରତ ପକ୍ଷରୁ ପଡ଼ିଆକୁ ଓହ୍ଲାଇଥିଲେ। ମ୍ୟାଚ ଶେଷ ହେବାର ଗୋଟିଏ ଓଭର ପୂର୍ବରୁ ମାର୍ଟିନ ଗୁପଟିଲ ତାଙ୍କୁ ରନଆଉଟ କରିଥିଲେ। ଏହିଠାରୁ ହିଁ ଭାରତୀୟଙ୍କ ବିଜୟ ଆଶା ଚୂରମାର ହୋଇ ଯାଇଥିଲା। ଶେଷ ଓଭରରେ ୟୁଜବେନ୍ଦ୍ର ଚହଲ ଆଉଟ ହେବା ସହିତ ଭାରତ ପ୍ରତିଯୋଗିତାରୁ ବିଦାୟ ନେଇଥିଲା। ସେତେବେଳେ ସମୟ ଥିଲା ଠିକ୍ ରାତି ୭ଟା ୨୯। ପୂର୍ବତନ ନ୍ୟୁଜିଲାଣ୍ଡ କ୍ରିକେଟର ଗ୍ରାଣ୍ଟ ଇଲିଅଟ ଏହି ସମୟରେ ହିଁ ଟୁଇଟ୍ କରି ନ୍ୟୁଜିଲାଣ୍ଡ ଦଳକୁ ଅଭିନନ୍ଦନ ଜଣାଇଥିଲେ। ତେଣୁ ସମ୍ଭବତଃ ଧୋନୀ ନିଜ ଅବସର ପାଇଁ ଏହି ସମୟକୁ ବାଛିଥିଲେ ବୋଲି ଆଲୋଚନା ହେଉଛି।
