ବ୍ରହ୍ମପୁର,୨୩ା୯(ସୁବାସ ଚନ୍ଦ୍ର ପାଢ଼ୀ): ଏକ ଲାଞ୍ଚ ମାମଲାର ରାୟ ମଙ୍ଗଳବାର ପ୍ରକାଶ ପାଇଛି। ସ୍ବତନ୍ତ୍ର ଭିଜିଲାନ୍ସ ଜଜ୍ ଜ୍ଞାନେନ୍ଦ୍ର କୁମାର ବାରିକ ମାମଲାର ବିଚାର କରି ଉପଯୁକ୍ତ ସାକ୍ଷ୍ୟ ପ୍ରମାଣ ଆଧାରରେ ଗଞ୍ଜାମ ଜିଲା ଦିଗପହଣ୍ଡିର ତତ୍କାଳୀନ ରେଞ୍ଜର କିଶୋର କୁମାର ନାୟକ(୬୧)ଙ୍କୁ ୪ବର୍ଷ ଜେଲ ଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ତାଙ୍କୁ ୨୦ ହଜାର ଟଙ୍କା ଜରିମାନା କରିଛନ୍ତି। ଜରିମାନା ଅନାଦାୟେ ଅଧିକ ୮ ମାସ ଜେଲ ଦଣ୍ଡ ଭୋଗିବାକୁ ଜଜ୍ ରାୟରେ ଉଲ୍ଲେଖ କରିଛନ୍ତି। ସରକାରଙ୍କ ତରଫରୁ ମାମଲା ପରିଚାଳନା କରୁଥିବା ସ୍ବତନ୍ତ୍ର ପିପି ସୁରେନ୍ଦ୍ର ପଣ୍ଡା ଓ ସୁମିତ କୁମାର ନାୟକ ଏହି ସୂଚନା ଦେଇଛନ୍ତି।
ଦିଗପହଣ୍ଡି ବନାଞ୍ଚଳ ଅଧୀନ ପାଟପୁରର ସତ୍ୟନାରାୟଣ ବେହେରା ସରକାରଙ୍କ ନିୟମ ଅନୁସାରେ ବିଭିନ୍ନ କାଠ ଡିପୋରୁ କାଠ କିଣି ବଢ଼େଇଙ୍କ ଦ୍ୱାରା ବିଭିନ୍ନ ପ୍ରକାର ସାମଗ୍ରୀ ପ୍ରସ୍ତୁତ କରୁଥିଲେ। ୨୦୧୬ ଫେବୃଆରୀ ୧୯ ତାରିଖରେ ତତ୍କାଳୀନ ରେଞ୍ଜର ନାୟକ ସତ୍ୟନାରାୟଣଙ୍କ ବଢ଼େଇ ଶାଳରେ ଚଢାଉ କରିଥିଲେ। କ୍ଷମତାର ଅପବ୍ୟବହାର କରି ସେଠାରୁ ସେ କାଠ କାଟିବା ପାଇଁ ଥିବା ବିଭିନ୍ନ ମେଶିନ, କଟର ଓ ଅନ୍ୟାନ୍ୟ ସାମଗ୍ରୀ ଜବତ କରିଥିଲେ। ପରେ ସତ୍ୟନାରାୟଣ ରେଞ୍ଜ ଅଫିସ ଯାଇ ସମସ୍ତ କାଗଜପତ୍ର ଦେଖାଇଥିଲେ ମଧ୍ୟ ତାଙ୍କ ବିରୋଧରେ ମାମଲା ରୁଜୁ କରିବେ ବୋଲି ନାୟକ ଭୟ ଦେଖାଇ ୩୦ ହଜାର ଟଙ୍କା ଲାଞ୍ଚ ମାଗିଥିଲେ। ସତ୍ୟନାରାୟଣ ଏ ନେଇ ବ୍ରହ୍ମପୁର ଭିଜିଲାନ୍ସ କାର୍ଯ୍ୟାଳୟରେ ଅଭିଯୋଗ କରିଥିଲେ।
ଯୋଜନା ମୁତାବକ ସତ୍ୟନାରାୟଣ ରେଞ୍ଜ କାର୍ଯ୍ୟାଳୟକୁ ଯାଇ ରେଞ୍ଜର ନାୟକଙ୍କୁ ଉକ୍ତ ଟଙ୍କା ଦେଇଥିଲେ। ସେଠାରେ ଛକି ରହିଥିବା ଭିଜିଲାନ୍ସ ଟିମ୍ ଚଢାଉ କରି ନାୟକଙ୍କଠାରୁ ଲାଞ୍ଚ ଟଙ୍କା ଓ କାର୍ଯ୍ୟାଳୟରୁ ବିଭିନ୍ନ କାଗଜପତ୍ର ଜବତ କରିଥିଲା। ନଂ.୧୨/୧୬ରେ ମାମଲା କରି ତାଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଥିଲା। କିଛିଦିନ ପରେ ସେ ଜାମିନରେ ଆସିଥିଲେ। ମାମଲାର ବିଚାର ବେଳେ ୯ ଜଣ ସାକ୍ଷୀଙ୍କ ବୟାନ ରେକର୍ଡ କରାଯାଇଥିଲା। ସାକ୍ଷୀମାନଙ୍କ ବୟାନକୁ ଆଧାର କରି ଜଜ୍ ଦଣ୍ଡାଦେଶ ଶୁଣାଇଛନ୍ତି।
