ଭୁବନେଶ୍ୱର,୨୦।୧ (ବ୍ୟୁରୋ): ରାଜଧାନୀ ଭୁବନେଶ୍ୱରର ପରିମଳ ବ୍ୟବସ୍ଥା ସୁଧୁରିବାର ନାଁ ଧରୁନି। କାନ୍ଥବାଡ଼ରେ ଯେତେ ରଙ୍ଗ ବୋଳି ସୌନ୍ଦର୍ଯ୍ୟକରଣ କରାଗଲେ ବି ସହରର ବିଭିନ୍ନ ସ୍ଥାନରେ ଏବେ ବି ଅଳିଆ ଆବର୍ଜନା ପଡ଼ିରହୁଛି। ଗଳିକନ୍ଦି ଏପରିକି କେତେକ ମୁଖ୍ୟରାସ୍ତାରେ ମଧ୍ୟ ସମାନ ଅବସ୍ଥା ଦେଖିବାକୁ ମିଳୁଛି। ଏବେ ବିଶ୍ୱକପ୍ ହକି ଚାଲୁଥିବାବେଳେ ବିଭିନ୍ନ ଦେଶରୁ ଖେଳାଳୀ ଏବଂ ସେମାନଙ୍କ ପ୍ରଶଂସକମାନେ ଭୁବନେଶ୍ୱରରେ ଡେରା ପକାଇଛନ୍ତି। ସେମାନେ ଯିବାବେଳେ ଯେପରି ସହରର ନିର୍ମଳ ଛବି ନେଇ ଫେରିବେ ସେଥିପାଇଁ ଯଥାସାଧ୍ୟ ଉଦ୍ୟମ କରୁଛି ବିଏମ୍ସି। ବାରମ୍ବାର ବୈଠକ କରି ଅଧିକାରୀମାନଙ୍କୁ ତାଗିଦା କରାଯାଉଛି। ମାତ୍ର ଏତେ ପରେ ବି ଅଧିକାଂଶ ରାସ୍ତାକଡ଼ରୁ ଆବର୍ଜନା ଉଠିପାରୁନାହିଁ। ଯାହାକୁ ନେଇ ବିଏମ୍ସି କମିଶନର ବିଜୟ ଅମୃତା କୁଲାଙ୍ଗେ ଅସନ୍ତୋଷ ପ୍ରକାଶ କରିବା ସହ ତାଗିଦା କରିଛନ୍ତି। ଏଣିକି ଯେଉଁ ଓ୍ବାର୍ଡରେ ରାସ୍ତାକଡ଼ରେ ଆବର୍ଜନା ଏବଂ ଖୋଲା ଡ୍ରେନ୍ ଦେଖିବାକୁ ମିଳିବ, ସମ୍ପୃକ୍ତ ଓ୍ବାର୍ଡ ଅଫିସର ଏବଂ ସାନିଟେଶନ୍ ଇନ୍ସପେକ୍ଟର (ଏସ୍ଆଇ)ଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କମିଶନର କହିଛନ୍ତି।
କମିଶନରଙ୍କ ଅଧ୍ୟକ୍ଷତାରେ ବୁଧବାର ଓ୍ବାର୍ଡ ଅଫିସର, ଏସ୍ଆଇ ଏବଂ ନିୟୋଜିତ ସଫେଇ ସଂସ୍ଥାକୁ ନେଇ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା। ଏଥିରେ ସଫେଇ ସଂସ୍ଥାଠାରୁ ଆରମ୍ଭ କରି ଓ୍ବାର୍ଡ ଅଫିସରଙ୍କ ପର୍ଯ୍ୟନ୍ତ ସମସ୍ତେ ରୋଷର ଶିକାର ହୋଇଥିଲେ। ରାସ୍ତାକଡ଼ରେ ଯେପରି ଆବର୍ଜନା ଗଦା ନ ହେବ ସେଥିପାଇଁ ଓ୍ବାର୍ଡ ଅଫିସରମାନେ ଧ୍ୟାନ ଦେବେ। ବାହାରେ ଅଳିଆ ପଡ଼ିିଥିଲେ ତୁରନ୍ତ ସେଠାରୁ ଆବର୍ଜନା ଉଠାଯିବ। ଏଥିସହ ଯେଉଁ ବ୍ୟକ୍ତି ନିଜ ଘର ଆଗ କିମ୍ବା ଅନ୍ୟ କୌଣସି ସ୍ଥାନରେ ଭଙ୍ଗାରୁଜା ଆବର୍ଜନା ଗଦା କରିବେ ସେମାନଙ୍କଠାରୁ ଜରିମାନା ଆଦାୟ କରାଯିବା ପାଇଁ ନିର୍ଦ୍ଦେଶ ଜାରି କରାଯାଇଛି। ପରିମଳ ସହିତ ରାସ୍ତାଘାଟ ଓ ଖୋଲା ଡ୍ରେନ୍ ଉପରେ ମଧ୍ୟ ବୈଠକରେ ଗୁରୁତ୍ୱାରୋପ କରାଯାଇଥିଲା। କିଛିଦିନ ତଳେ ଖୋଲା ଡ୍ରେନ୍ରେ ପଡ଼ି ଜଣେ ବିଦେଶୀ ଫଟୋଗ୍ରାଫର ଆହତ ହେବା ପରେ ଏହାକୁ ଗୁରୁତ୍ୱର ସହିତ ନେଇଛି ବିଏମ୍ସି। ସହରର କୌଣସି ଡ୍ରେନ୍ ଯେପରି ମୁକୁଳା ନ ରୁହେ ସେଥିପ୍ରତି ଧ୍ୟାନ ଦିଆଯାଇଛି। ନିଜ ନିଜ ଅଞ୍ଚଳରେ ଥିବା ମୁକୁଳା ଡ୍ରେନ୍ ସମ୍ପର୍କରେ ଅବଗତ କରାଇବା ସହିତ ଖରାପ ରାସ୍ତା ଥିଲେ ଇଞ୍ଜିନିୟରଙ୍କୁ ସୂଚନା ଦେବା ପାଇଁ ଓ୍ବାର୍ଡ ଅଫିସରଙ୍କୁ ନିର୍ଦ୍ଦେଶ ଦିଆଯାଇଛି। ଯଥାଶୀଘ୍ର ଏହି କାର୍ଯ୍ୟ ସାରିବାକୁ କମିଶନର କହିିଛନ୍ତି। ଏଥିସହ ଓ୍ବାର୍ଡ ଗସ୍ତ ସମୟରେ ଏଭଳି କିଛି ସମସ୍ୟା ଦେଖିଲେ ସମ୍ପୃକ୍ତ ଓ୍ବାର୍ଡର ଓ୍ବାର୍ଡ ଅଫସର ଏବଂ ଏସ୍ଆଇଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି କମିଶନର ଚେତାବନୀ ଦେଇଛନ୍ତି। ଏବେ ଡଟ୍ ଫେଷ୍ଟ ଏବଂ ବିଶ୍ୱକପ୍ ହକି ଚାଲିଥିବାରୁ ସେମାନଙ୍କ ଉପରେ ପ୍ରବଳ ଚାପ ରହିଥିବାବେଳେ କମିଶନରଙ୍କ ନୂଆ ନିର୍ଦ୍ଦେଶକୁ କିପରି କାର୍ଯ୍ୟକାରୀ କରିବେ ସେନେଇ ଓ୍ବାର୍ଡ ଅଫସର ଏବଂ ସାନିଟେଶନ ଇନ୍ସପେକ୍ଟରମାନେ ଚିନ୍ତାରେ ପଡ଼ିଛନ୍ତି।
