ବାରଙ୍ଗ,୨୦।୧(ଡି.ଏନ୍.ଏ.): ବାରଙ୍ଗ ବ୍ଲକ ଅନ୍ତର୍ଗତ ନରାଜ ପଞ୍ଚାୟତର ନରାଜ ଅଙ୍ଗନଓ୍ବାଡି କେନ୍ଦ୍ରରେ ଗର୍ଭବତୀ ଓ ପ୍ରସ୍ତୁତି ମା’ମାନଙ୍କୁ ନିମ୍ନମାନର ଛତୁଆ ବଣ୍ଟନ କରାଯାଉଥିବା ନେଇ ନରାଜ ଗ୍ରାମର ତୁଷାରକାନ୍ତ ବେହେରା ସିଡିପିଓ ଓ ବିଡିଓଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗ ମୁତାବକ, ନରାଜ ଅଙ୍ଗନଓ୍ବାଡି କେନ୍ଦ୍ରରେ ସ୍ବୟଂ ସହାୟକ ଗୋଷ୍ଠୀ ଜରିଆରେ ଅବଧି ସରିଯାଇଥିବା ଛତୁଆ ବଣ୍ଟନ କରାଯାଉଛି। ଗର୍ଭବତୀ ଓ ପ୍ରସ୍ତୁତି ମା ଏବଂ ଶିଶୁଙ୍କ ପାଇଁ ଉଦ୍ଦିଷ୍ଟ ପୁଷ୍ଟିକର ଖାଦ୍ୟ ଛତୁଆ, ଅଣ୍ଡା ଓ ବାଦାମ ଲଡୁ ଇତ୍ୟାଦି ପ୍ରଦାନର ନିର୍ଦ୍ଦେଶ ରହିଥିବାବେଳେ ବାସ୍ତବରେ ତାହା କେତେ ଭଲ ପୃଷ୍ଟିକର ଖାଦ୍ୟ ତାହା ଦେଖିଲେ ଜାଣିପାରିବ। ଗତ ୧୫ତାରିଖରେ ନରାଜ ଗ୍ରାମର ତୁଷାରକାନ୍ତଙ୍କ ଘରକୁ ଅଙ୍ଗନଓ୍ବାଡି କେନ୍ଦ୍ରର ଜଣେ ମହିଳା ଛତୁଆ ନେଇ ଦେଇଥିଲେ। ଓଡ଼ିଶା ସରକାରଙ୍କ ଦ୍ବାରା ପ୍ରସ୍ତୁତି ଛତୁଆ ପ୍ୟାକେଟରେ ମା’ ମହାଲକ୍ଷ୍ମୀ ସ୍ବୟଂ ସହାୟକ ଗୋଷ୍ଠୀ, ଗ୍ରାମ- ହରିଶଙ୍କରପୁର ବ୍ଲକ ଆଠଗଡ, ଜିଲା କଟକ ଲେଖାଥିବାବେଳେ ପ୍ରସ୍ତୁତି ତାରିଖ ୨୪.୧୧.୨୦୨୨ ଲେଖାଯାଇଛି। ତା’ ସହିତ ପ୍ରସ୍ତୁତି (ପ୍ୟାକିଂ) ହେବାର ମାସକ ମଧ୍ୟରେ ବ୍ୟବହାର କରାଯିବା ପାଇଁ ଉଲ୍ଲେଖ ରହିଛି। କିନ୍ତୁ ଏହି ଅବଧି ଶେଷ ହୋଯାଇଥିବା ଛତୁଆକୁ ବଣ୍ଟନ କରାଯାଉଛି। ଯାହାକୁ ନେଇ ତୁଷାରକାନ୍ତ ସିଡିପିଓଙ୍କୁ ପ୍ରଥମେ ଅଭିଯୋଗ କରିବାରୁ ସେ ଶୁଣି ନଥିଲେ,ପରେ ବିଡିଓଙ୍କ ପାଖକୁ ଲିଖିତ ଅଭିଯୋଗ କରିଛନ୍ତି। ତେବେ ଅଙ୍ଗନଓ୍ବାଡି ସୁପରଭାଇଜର ବବିତା ଦାସଙ୍କୁ ପଚାରିବାରୁ ସେ କହିଲେ ବିଳମ୍ବରେ ପ୍ୟାକିଂ ହୋଇଛି। ପ୍ରସ୍ତୁତି ତାରିଖ ଭୁଲରେ ଲେଖାଯାଇଛି।
