ନୂଆଦିଲ୍ଲୀ,୬।୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦଙ୍କ ପ୍ରଥମ ଶାସନ କାଳରେ ବୈଦେଶିକ ମନ୍ତ୍ରୀ ଭାବେ କାର୍ଯ୍ୟଭାର ସମ୍ଭାଳିଥିଲେ ଭାରତୀୟ ଜନତା ପାର୍ଟି(ଭାଜପା)ର ବରିଷ୍ଠ ନେତା ସୁଷମା ସ୍ବରାଜ। ଭାରତୀୟ ରାଜନୀତିର ଏହି ଚର୍ଚ୍ଚିତ ଚେହେରା ଆଜକୁ ଠିକ୍ ଏକ ବର୍ଷ ହେବ ସମସ୍ତଙ୍କଠାରୁ ବିଦାୟ ନେଇ ସାରିଛନ୍ତି। ତାଙ୍କର ଏହି ପ୍ରଥମ ଶ୍ରାଦ୍ଧବାର୍ଷିକୀ ଅବସରରେ ପ୍ରଧାନମନ୍ତ୍ରୀ ମୋଦିଙ୍କଠାରୁ ଆରମ୍ଭ କରି ବହୁ ନେତା ତାଙ୍କୁ ମନେପକାଇଛନ୍ତି। ସୁଷମାଙ୍କ ସ୍ବାମୀ ସ୍ବରାଜ କୌଶଲ, ଝିଅ ବାଂଶୁରୀ ସ୍ବରାଜ ଟୁଇଟର ମାଧ୍ୟମରେ ଏକ ଭାବପୂର୍ଣ୍ଣ ବାର୍ତ୍ତା ଦେଇଛନ୍ତି। ଏହାସହ ଉପରାଷ୍ଟ୍ରପତି ଭେଙ୍କିୟା ନାଇଡୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ସୈୟଦ ଅକବରୁଦ୍ଦିନ ସୁଷମାଙ୍କୁ ମନେ ପକାଇଛନ୍ତି। ଉପରାଷ୍ଟ୍ରପତି ଲେଖିଛନ୍ତି ଏବେବି ସେ ଭାବୁଛନ୍ତି ସୁଷମା ଜୀବିତ ଅଛନ୍ତି। ଗୋଟିଏ ବର୍ଷ ବିତିଗଲା ପରି ଲାଗୁନି। ସେ ତାଙ୍କର ସବୁଠାରୁ ପ୍ରିୟ ଭଉଣୀ ଥିବା ନାଇଡୁ କହିଛନ୍ତି। ପ୍ରତିବର୍ଷ ରାକ୍ଷୀ ପୂର୍ଣ୍ଣିମାରେ ସୁଷମା ଉପରାଷ୍ଟ୍ରପତିଙ୍କ ଘରକୁ ଆସନ୍ତି ବୋଲି ସେ କହିଛନ୍ତି। ସୁଷମାଙ୍କ ଭାଷା, ଭାଷଣ, ଭାଷାର ସୁଦ୍ଧତା, ଶବ୍ଦର ଚୟନ ଆଦି ତାଙ୍କୁ ଭଲ ନେତାର ପରିଚୟ ଦେଇଥିଲା। ସେହିପରି ପ୍ରଧାନମନ୍ତ୍ରୀ ମୋଦ ଲେଖିଛନ୍ତି, ସୁଷମାଙ୍କ ଅକାଳ ବିୟୋଗ ଦଳ ପାଇଁ ଏକ ଅପୂରଣୀୟ କ୍ଷତି। ଅସମୟରେ ତାଙ୍କର ପରଲୋକ ଅନେକଙ୍କ ମନକୁ ଆଘାତ ଦେଇଛି। ତାଙ୍କର ନିଃସ୍ବାର୍ଥପର ସେବା ଆଜି ତାଙ୍କୁ ଅନ୍ୟମାନଙ୍କ ନିକଟରେ ଜଣେ ଭଲ ନେତ୍ରୀର ପରିଚୟ ଦେଇଛି।
