ଚଣ୍ଡିଖୋଲ,୭ା୯(ଡି.ଏନ.ଏ.): ଯାଜପୁର ଜିଲା ବଡ଼ଚଣା ବ୍ଲକ ପଲାଇ ଗ୍ରାମର ପ୍ରସ୍ତର ଶିଳ୍ପୀ ସୁଶାନ୍ତ କୁମାର ଦାସ ଜାତୀୟ ହସ୍ତଶିଳ୍ପ ପୁରସ୍କାର ପାଇବା ପାଇଁ ମନୋନୀତ ହୋଇଛନ୍ତି । ଭାରତ ସରକାରଙ୍କ ହସ୍ତଶିଳ୍ପ ଉନ୍ନୟନ କମିଶନରଙ୍କ କାର୍ଯ୍ୟାଳୟ ପକ୍ଷରୁ ସୋମବାର ନୂଆଦିଲ୍ଲୀଠାରେ ଘୋଷଣା କରାଯାଇଥିବା ରାଷ୍ଟ୍ରୀୟ ହସ୍ତଶିଳ୍ପୀ ପୁରସ୍କାର ପାଇଁ ସୁଶାନ୍ତଙ୍କ ପ୍ରକଳ୍ପକୁ ଚୟନ କରାଯାଇଛି ା ସୁଶାନ୍ତ ଏକମାତ୍ର ପ୍ରସ୍ତର ଶିଳ୍ପୀ ଭାବେ ଏହି ପୁରସ୍କାର ପାଇବାକୁ ମନୋନୀତ ହୋଇଛନ୍ତି ା ବିଭିନ୍ନ ବର୍ଗରେ ୧୯ଜଣ ପ୍ରତିଭାବାନ ଶିଳ୍ପୀଙ୍କ ମଧ୍ୟରେ ଓଡ଼ିଶାରୁ ସୁଶାନ୍ତଙ୍କ ସମେତ ପୁରୀ ଜିଲାରୁ ଦୁଇ ମହିଳା ଶିଳ୍ପୀ ବିଜୟଲକ୍ଷ୍ମୀ ସ୍ବାଇଁ ଓ ସ୍ବପ୍ନାମଞ୍ଜରୀ ନାୟକଙ୍କ ତାଳପତ୍ର ଖୋଦେଇ କଳାକୃତି ଜାତୀୟ ପୁରସ୍କାର ପାଇଁ ମଧ୍ୟ ମନୋନୀତ ହୋଇଛି।
୨୦୧୯ ପାଇଁ ଘୋଷିତ ଏହି ଜାତୀୟ ହସ୍ତଶିଳ୍ପ ପୁରସ୍କାର ପାଇବାକୁ ସୁଶାନ୍ତଙ୍କ ଦ୍ୱାରା ନିର୍ମାଣ କରାଯାଇ ଶ୍ରୀରାଧାକୃଷ୍ଣଙ୍କ ଝୁଲଣ ଯାତ୍ରାକୁ ନେଇ ଗୌରହରା ପଥର (ପଞ୍ଜାବରୁ ଆଣିଥିବା ଖଡ଼ିପଥର)ରେ ନିର୍ମାଣ କଳାକୃତିକୁ ଚୟନ କରାଯାଇଛି ା ପ୍ରାୟ ଦେଢ଼ଫୁଟ ଉଚ୍ଚତା ବିଶିଷ୍ଟ ଏହି କଳାକୃତିକୁ ନିର୍ମାଣ କରିବାକୁ ସେ ୧୦ମାସ ପରିଶ୍ରମ କରିଥିବା କହିଛନ୍ତି ା ଏହି କଳାକୃତିରେ ରାଧା-କୃଷ୍ଣଙ୍କ କମନୀୟ ବିଗ୍ରହ ସହିତ ବିଭିନ୍ନ ଦେବାଦେବୀଙ୍କ ମୂର୍ତ୍ତି ରହିଛି ା ଏହାସହିତ ଶ୍ରୀକୃଷ୍ଣଙ୍କ ଷୋହଳକଳାର ୧୬ ସୁନ୍ଦର ଓ କମନୀୟ ମୂର୍ତ୍ତି ମଧ୍ୟ ଏହାସହିତ ରହିଛି ବୋଲି ସେ କହିଛନ୍ତି । ପଲାଇ ଗ୍ରାମର ବ୍ରଜବନ୍ଧୁ ଦାସଙ୍କ କନିଷ୍ଠ ପୁତ୍ର ସୁଶାନ୍ତ ଚଣ୍ଡୀଖୋଲ-ପାରାଦୀପ ୫୩ ନମ୍ବର ଜାତୀୟ ରାଜପଥରେ ଓଳାଶୁଣୀ ଛକ ନିକଟରେ ବ୍ରଜ କଳାକୃତି ଆର୍ଟ ଆଣ୍ଡ କ୍ରାଫ୍ଟ ପ୍ରତିଷ୍ଠା କରି ବିଭିନ୍ନ ମୂର୍ତ୍ତି ନିର୍ମାଣ କରୁଛନ୍ତି । ନୂଆଦିଲ୍ଲୀରେ ରାଷ୍ଟ୍ରପତିଙ୍କଠାରୁ ସେ ଏହି ପୁରସ୍କାର ଗ୍ରହଣ କରିବେ । ପୂର୍ବରୁ ମଧ୍ୟ ଯାଜପୁର ଜିଲା ବଡ଼ଚଣା ବ୍ଲକ ଛତିଆର ମହେଶ୍ୱର ଓଝା ଏହି ଜାତୀୟ ପୁରସ୍କାର ପାଇଛନ୍ତି ଏବଂ ୨୦୧୮ ପାଇଁ ଜାତୀୟ ପୁରସ୍କାର ଘୋଷଣା ହୋଇଥିବା ପଲାଇ ଗ୍ରା.ପ. ଶୁଖୁଆପଡ଼ା ଗ୍ରାମର ରଞ୍ଜନ ମହାରଣାଙ୍କ ପରଲୋକ ହେତୁ ସେହି ପୁରସ୍କାର ପ୍ରଦାନ କରାଯାଇନି ।
ଭାସ୍କର୍ଯ୍ୟଶିଳ୍ପୀ ସୁଶାନ୍ତଙ୍କ ନାମ ରାଷ୍ଟ୍ରୀୟ ପୁରସ୍କାର ପାଇଁ ଘୋଷଣା ହେବା ପରେ ବିଭିନ୍ନ ମହଲରୁ ତାଙ୍କୁ ଅଭିନନ୍ଦନ ଓ ଶୁଭେଚ୍ଛା ବାର୍ତ୍ତା ମିଳିଛି । ପୂର୍ବରୁ ସୁଶାନ୍ତ ରାଜ୍ୟ ସରକାରଙ୍କ ହସ୍ତତନ୍ତ୍ର, ବୟନ ଓ ହସ୍ତଶିଳ୍ପ ବିଭାଗ ପକ୍ଷରୁ ରାଜ୍ୟ କଳାବୃତ୍ତି ପୁରସ୍କାର ଲାଭ କରିଥିଲେ ା
