ନୂଆଦିଲ୍ଲୀ,୩୦।୭: ଭାରତୀୟ କ୍ରିକେଟ ଇତିହାସରେ ମହେନ୍ଦ୍ର ସିଂ ଧୋନୀ ଏକ ଉପଲବ୍ଧିଠାରୁ କମ୍ ନୁହଁନ୍ତି। ଟିମ୍ ପ୍ରତି ତାଙ୍କ ଯୋଗଦାନକୁ କାହା ସହ ତୁଳନା କରାଯାଇପାରିବ ନାହିଁ। ତାଙ୍କ ସ୍ଥାନ କିଏ ନେଇପାରେ ବୋଲି ଯଦି ପ୍ରଶ୍ନ ହୁଏ ତେବେ ହୁଏତ ଉତ୍ତର ସହଜରେ ମିଳିବ ନାହିଁ। ହେଲେ ଧୋନୀଙ୍କ ଜଣେ ଭଲ ବନ୍ଧୁ ଭାବେ ଜଣାଶୁଣା ସୁରେଶ ରାଇନା ଜଣେ ଭାରତୀୟ କ୍ରିକେଟରଙ୍କ ନା କହିଛନ୍ତି ଯିଏ ଟିମ୍ରେ ଆଗାମୀ ଏମ୍ଏସ୍ ଧୋନୀ ହୋଇପାରିବେ। ସେ ଆଉ କେହି ନୁହନ୍ତି ବରଂ ରୋହିତ ଶର୍ମା।
ଭାରତୀୟ ଟିମ୍କୁ ସଫଳତାର ଶୀର୍ଷରେ ପହଞ୍ଚାଇଥିଲେ ମହେନ୍ଦ୍ର ସିଂ ଧୋନୀ। ଏଥିପାଇଁ ତାଙ୍କୁ ଦୁନିଆର ଶ୍ରେଷ୍ଠ ଅଧିନାୟକ ଭାବେ ଗଣାଯାଏ। ୨୦୦୭ରେ ଟି-୨୦ ବିଶ୍ୱକପ୍, ୨୦୧୧ ବିଶ୍ୱ କପ୍, ୨୦୧୩ରେ ଚ୍ୟାମ୍ପିଅନ୍ସ ଟ୍ରଫି ଆଦିକୁ ଧୋନୀ ନିଜ ନାମରେ କରିଥିଲେ। ତିନୋଟି ଆଇସିସି ଟ୍ରଫି ଜିତିଥିବା ବିଶ୍ୱର ଏକମାତ୍ର ଅଧିନାୟକ ହେଉଛନ୍ତି ସେ। ରାଇନା ଧୋନୀଙ୍କ ଅଧିନାୟକତ୍ୱରେ ଖେଳି ସାରିଛନ୍ତି। ଏପରିକି ସେ ତାଙ୍କର ଭଲ ବନ୍ଧୁ ମଧ୍ୟ। ଏବେ ସେ ରୋହିତ ଭାରତର ଆଗାମୀ ଧୋନୀ ସାବ୍ୟସ୍ତ ହୋଇପାରନ୍ତି ବୋଲି କହିଛନ୍ତି।
ଦ ସୁପର ଓଭର ପୋଡକାଷ୍ଟରେ ରାଇନା କହିଛନ୍ତି, ମୁଁ କହିବି କି ଭାରତୀୟ ଟିମ୍ରେ ରୋହିତ ଆଗାମୀ ଧୋନୀ। ମୁଁ ତାଙ୍କୁ ଦେଖି ସାରିଛି। ସେ ଶାନ୍ତ, ଶୁଣିବାକୁ ପସନ୍ଦ କରନ୍ତି। ତାଙ୍କୁ ଅନ୍ୟ ଖେଳାଳିମାନଙ୍କୁ ଆତ୍ମବିଶ୍ୱାସ ଦେବାକୁ ଭଲ ଲାଗିଥାଏ। ସବୁଠାରୁ ବଡ଼ କଥା ହେଲା ତାଙ୍କୁ ଆଗକୁ ଆସି ଲିଡ୍ କରିବା ପସନ୍ଦ। ଯେତେବେଳେ ଜଣେ ଅଧିନାୟକ ଆଗକୁ ଆସି ଲିଡ୍ କରେ ତାହା ଡେସିଂ ରୁମ୍ର ପରିବେଶ ପାଇଁ ଭଲ ଥାଏ। ଯେତେବେଳେ ବିରାଟ କୋହଲୀ ଆରାମ କରନ୍ତି, ରୋହିତ ଶର୍ମା ଟିମ୍ର ଦାୟିତ୍ୱ ନିଅନ୍ତି। ତାଙ୍କ ଅଧିନାୟକତ୍ୱରେ ଭାରତ ୨୦୧୮ରେ ନିଧାଶ ଟ୍ରଫି ଜିତିଥିଲେ। ଏହାଛଡ଼ା ରୋହିତଙ୍କ ଅଧିନାୟତ୍ୱରେ ମୁମ୍ବାଇ ଇଣ୍ଡିଆନ୍ସ ଟିମ୍ ୪ ଥର ଆଇପିଏଲ୍ ଜିତିଛି ବୋଲି ରାଇନା କହିଛନ୍ତି।
