ନୂଆଦିଲ୍ଲୀ, ୨୪।୪ : ସୁପ୍ରିମକୋର୍ଟ କହିଛନ୍ତି ଯେ ଶୀଘ୍ର ଫାଶୀଦଣ୍ଡ ସମ୍ପର୍କରେ ଏକ ଗାଇଡ୍ଲାଇନ୍ ପ୍ରସ୍ତୁତ କରାଯିବ। ଏହା ଅନ୍ତର୍ଗତ କାହାକୁ ଫାଶୀ ଦଣ୍ଡାଦେଶ ଦିଆଯିବ କାହାକୁ ନୁହେଁ ତାହା ସ୍ଥିର କରାଯିବ। ଯାହା ସମଗ୍ର ଦେଶର କୋର୍ଟ ପାଇଁ ବୈଧ ହେବ।
ମଧ୍ୟପ୍ରଦେଶର ଇରଫାନ ଓରଫ ଭେୟୁ ମେୱାତିଙ୍କ ଏକ ଆବେଦନ ଉପରେ ବିଚାର କରି ସୁପ୍ରିମକୋର୍ଟ ଏହି ନିଷ୍ପତ୍ତି ନେଇଛନ୍ତି। ନାବାଳିକାଙ୍କୁ ବଳାତ୍କାର କରିଥିବା ଅଭିଯୋଗରେ ଇରଫାନଙ୍କୁ ନିମ୍ନ ଅଦାଲତ ଫାଶୀ ଦଣ୍ଡାଦେଶ ନିର୍ଦ୍ଦେଶ ଦେଇଥିଲେ। ଏହା ହାଇକୋର୍ଟରେ ମଧ୍ୟ କାଏମ୍ ରହିଛି।
ଏହି ମାମଲାରେ ସହଯୋଗ କରିବାକୁ କୋର୍ଟ ଆଟର୍ନି ଜେନେରାଲ କେ.କେ ଭେନୁଗୋପାଲଙ୍କୁ କହିଛନ୍ତି। ଏହି ପରିପ୍ରେକ୍ଷୀରେ, ଜାତୀୟ ଆଇନ ବିଶ୍ୱବିଦ୍ୟାଳୟର ପ୍ରୋଜେକ୍ଟ ୩୯-ଏ ପକ୍ଷରୁ ଏକ ଆବେଦନ କରାଯାଇଥିଲା। ଏହା ପରେ ସୁପ୍ରିମକୋର୍ଟ ଏହି ଫାଶୀଦଣ୍ଡର ବିଚାର ଆରମ୍ଭ କରିଥିଲେ। ଏହି ମାମଲାର ପରବର୍ତ୍ତୀ ଶୁଣାଣି ବର୍ତ୍ତମାନ ମେ ୧୦ ରେ ହେବ।
ଜଷ୍ଟିସ ୟୁୟୁ ଲଲିତ, ଜଷ୍ଟିସ ଏସ ରବିନ୍ଦ୍ର ଭଟ୍ଟ ଏବଂ ଜଷ୍ଟିସ ପିଏସ ନରସିଂହଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏହି ନିର୍ଦ୍ଦେଶନାମା ପ୍ରସ୍ତୁତ କରିବାରେ ଆଟର୍ନି ଜେନେରାଲ କେ.କେ ଭେନୁଗୋପାଲଙ୍କ ସହାୟତା ଲୋଡିଛନ୍ତି। ଜାତୀୟ ଆଇନ ସେବା ପ୍ରାଧିକରଣକୁ ମଧ୍ୟ ଖଣ୍ଡପୀଠ ଏକ ବିଜ୍ଞପ୍ତି ପଠାଇଛି। ଫାଶୀଦଣ୍ଡ ସହ ଜଡିତ ମାମଲାରେ ଦେଶର କୋର୍ଟଙ୍କ ପାଇଁ ନିର୍ଦ୍ଦେଶାବଳୀ ପ୍ରସ୍ତୁତ କରାଯିବ ବୋଲି ଖଣ୍ଡପୀଠ କହିଛନ୍ତିି। ଖଣ୍ଡପୀଠ କହିଛନ୍ତି ଯେ ଫାଶୀଦଣ୍ଡ ପାଇଥିବା ଅଭିଯୁକ୍ତଙ୍କ ପାଇଁ ପ୍ରତିରକ୍ଷା ମାଧ୍ୟମ ବହୁତ ସୀମିତ।
ଇରଫାନ ନାମକ ଜଣେ ଅଭିଯୁକ୍ତଙ୍କ ଦ୍ୱାରା ଦାଖଲ ହୋଇଥିବା ଏକ ପିଟିଶନରେ ଡିଭିଜନ ବେଞ୍ଚ ଶୁଣାଣି କରିଥିଲେ। ମଧ୍ୟପ୍ରଦେଶ ହାଇକୋର୍ଟ ନିମ୍ନ ଅଦାଲତଙ୍କ ଦଣ୍ଡାଦେଶକୁ କାଏମ୍ ରଖିଥିଲେ। ଆଟର୍ନି ଜେନେରାଲ କହିଛନ୍ତି ଯେ ଫାଶୀଦଣ୍ଡାଦେଶ ଦେବାର ବ୍ୟବସ୍ଥାକୁ ଗୁରୁତର ସହ ବିଚାର କରିବା ଆବଶ୍ୟକ। ମାମଲାର ଶୁଣାଣି ସମୟରେ ଆମିକସ୍ କ୍ୟୁର କହିଛନ୍ତି ଯେ ମଧ୍ୟପ୍ରଦେଶରେ ଏପରି ଏକ ଆଇନ ଅଛି ଯେ ଅଧିକ ମାମଲାରେ ଫାଶୀଦଣ୍ଡାଦେଶ ପ୍ରଦାନ କରିଥିବା ସରକାରୀ ଆଇନଜୀବୀଙ୍କର ସେହି ଆଧାରରେ ସେ ଦରମା ବୃଦ୍ଧି ହୋଇଥାଏ।
