ନୂଆଦିଲ୍ଲୀ,୨୮।୨: ଶୁଣାଣି ସମୟରେ ରାଗିଗଲେ ସୁପ୍ରିମକୋର୍ଟ ବିଚାରପତି। ରାଗିକରି ଓକିଲଙ୍କୁ କହିଲେ ସବୁ ଫାଇଲ ଫିଙ୍ଗି ଦିଅ। ଏପରି ଘଟଣା ଆଜି ଦେଖିବାକୁ ମିଳିଛି ସୁପ୍ରିମକୋର୍ଟରେ। ଶୁଣାଣି ସମୟରେ ସୁପ୍ରିମକୋର୍ଟର ବିଚାରପତି ଅଭୟ ଏସ ଓକା କୋର୍ଟ ରୁମ ଭିତରେ ଓକିଲଙ୍କ ଉପରେ ରାଗି ଯାଇଥିଲେ। ଏହା ସେତେବେଳେ ଘଟିଥିଲା ଯେତେବେଳେ ଅନେକ ଓକିଲ ଏକକାଳୀନ କହିବା ଆରମ୍ଭ କରିଥିଲେ ଏବଂ ସେମାନଙ୍କର ଯୁକ୍ତି ଦେବା ଆରମ୍ଭ କରିଥିଲେ। କୋର୍ଟର ପରିବେଶ ଦେଖି ଜଷ୍ଟିସ ଓକା ସମସ୍ତ ଓକିଲଙ୍କୁ ଶାନ୍ତ ରହିବାକୁ ଏବଂ ଗୋଟିଏ ଗୋଟିଏ କରି ସେମାନଙ୍କର ଯୁକ୍ତି ଉପସ୍ଥାପନ କରିବାକୁ କହିଥିଲେ, କିନ୍ତୁ ତା’ପରେ ମଧ୍ୟ ଓକିଲମାନେ ଶାନ୍ତ ହୋଇନଥିଲେ, ଯାହା ଫଳରେ ଜଷ୍ଟିସ ରାଗି ଯାଇଥିଲେ।
ଜଷ୍ଟିସ ଅଭୟ ଏସ ଓକା କହିଛନ୍ତି ଯେ, ଏପରି ଅନୁଶାସନହୀନତା ଦେଖି ସେ ବିରକ୍ତ ହୋଇଗଲେଣି। କୋର୍ଟ ଭିତରେ ପ୍ରତିଦିନ ଅନୁଶାସନହୀନତା ଦେଖାଯାଉଛି। ଆମେ ଓକିଲମାନଙ୍କୁ ପଚାରୁଛୁ ଯେ ସେମାନେ କାହା ପାଇଁ ହାଜର ହେଉଛନ୍ତି, କିନ୍ତୁ ଓକିଲମାନେ କୌଣସି ଉତ୍ତର ଦେଉନାହାଁନ୍ତି।
ଯଦି କୋର୍ଟ ଭିତରେ ଏପରି ପରିବେଶ ରହେ, ତେବେ ମୁଁ ସମସ୍ତ ଫାଇଲ ଫିଙ୍ଗି ଦେବି। ଏବେ ଏକ ନିୟମ ଲାଗୁ କରାଯିବା ଉଚିତ ଯେ ଯଦି ଓକିଲମାନେ ଏକା ସମୟରେ ଲଗାତାର ଯୁକ୍ତି କରନ୍ତି, ତେବେ ସେମାନଙ୍କର ଫାଇଲ ଫିଙ୍ଗି ଦିଆଯିବ। ବାର ଏବଂ ବେଞ୍ଚ ରିପୋର୍ଟ ଅନୁଯାୟୀ, ଜଷ୍ଟିସ ଏସ ଓକା କହିଛନ୍ତି, ଏହି ପ୍ରକାରର ଅନୁଶାସନହୀନତା କେବଳ ସୁପ୍ରିମକୋର୍ଟରେ ଦେଖାଯାଏ। ମୁଁ କର୍ନାଟକ ଏବଂ ବମ୍ବେ ହାଇକୋର୍ଟରେ ମଧ୍ୟ କାର୍ଯ୍ୟ କରିଛି, କିନ୍ତୁ ସେଠାରେ ଏପରି ଅଭଦ୍ରାମିି ଦେଖିନାହିଁ।
ଏହା ପ୍ରଥମ ଥର ନୁହେଁ ଯେ ଜଷ୍ଟିସ ଏସ ଓକା ଓକିଲମାନଙ୍କ ଉପରେ ରାଗିଛନ୍ତି। ଏହା ପୂର୍ବରୁ ମଧ୍ୟ ସେ ଅନେକ ମାମଲାରେ ଓକିଲମାନଙ୍କ ଦ୍ୱାରା ଦିଆଯାଇଥିବା ମିଥ୍ୟା ବୟାନ ଉପରେ ନିଜର ଅସନ୍ତୋଷ ପ୍ରକାଶ କରିଛନ୍ତି। ସେପ୍ଟେମ୍ବର 2024ରେ, ବିଚାରପତି ଏସ ଓକା ଏବଂ ଅଗଷ୍ଟିନ ଜର୍ଜ ମାସିହଙ୍କ ଖଣ୍ଡପୀଠ କହିଥିଲେ ଯେ ଏପରି ଅନେକ ମାମଲା ସେମାନଙ୍କ ସାମ୍ନାକୁ ଆସିଛି ଯେଉଁଥିରେ ମିଥ୍ୟା ଯୁକ୍ତି ଦିଆଯାଇଥିଲା।
