ନୂଆଦିଲ୍ଲୀ, ୩୦।୮ : ଗୁଜରାଟରେ ୨୦୦୨ ହୋଇଥିବା ଦଙ୍ଗା ସହ ଜଡିତ ସମସ୍ତ ମାମଲା ସୁପ୍ରିମକୋର୍ଟ ବନ୍ଦ କରି ଦେଇଛନ୍ତି। ସୁପ୍ରିମକୋର୍ଟରେ ଗୋଟିଏ ମାମଲା ବିଚାରାଧୀନ ଥିଲା। ସୁପ୍ରିମକୋର୍ଟ କହିଛନ୍ତି ଯେ ସମୟ ବିତିବା ସହିତ ମାମଲା ବର୍ତ୍ତମାନ ନିଷ୍ଫଳ ହୋଇଯାଇଛି। ୯ଟି ମାମଲା ମଧ୍ୟରୁ ୮ଟିର ବିଚାର ଶେଷ ହୋଇଛି ଏବଂ ଗୁଜୁରାଟର ନରୋଦା ଗ୍ରାମର ଗୋଟିଏ ମାମଲାର ବିଚାର ଜାରି ରହିଛି।
ସୂଚନାଯୋଗ୍ୟ, ୨୭ ଫେବୃଆରୀ ୨୦୦୨ ରେ, ଗୁଜରାଟର ଗୋଧ୍ରାଠାରେ କେତେକ ଅସାମାଜିକ ବ୍ୟକ୍ତି ଏକ ଟ୍ରେନରେ ନିଆଁ ଲଗାଇ ଦେଇଥିଲେ। ଟ୍ରେନର ବଗିରେ ୫୯ ଜଣ ଲୋକ ଜୀବନ୍ତ ଦଗ୍ଧ ହୋଇଥିଲେ। ସେମାନଙ୍କ ମଧ୍ୟରେ ଅଧିକାଂଶରେ ଅଯୋଧ୍ୟାରୁ ଫେରୁଥିବା କରସେବକ ଥିଲେ। ଏହି ଘଟଣା ପରେ ଗୁଜରାଟରେ ଦଙ୍ଗା ଆରମ୍ଭ ହୋଇଥିଲା। ଏହି ପ୍ରସଙ୍ଗରେ କେନ୍ଦ୍ର ସରକାର ଏକ କମିଶନ ନିଯୁକ୍ତ କରିଥିଲେ। କମିଶନ କହିଥିଲେ ଯେ ଏହା କେବଳ ଏକ ଦୁର୍ଘଟଣା ଥିଲା। ଏହି ଅନୁସନ୍ଧାନ ଏକ ଆଲୋଡ଼ନ ସୃଷ୍ଟି କରିଥିଲା ଏବଂ ଆୟୋଗକୁ ଅସାମ୍ବିଧାନିକ ଘୋଷଣା କରାଯାଇଥିଲା। ୨୮ ଫେବୃଆରୀ ୨୦୦୨ ରେ, ଏହି ଘଟଣାରେ ୭୧ଦଙ୍ଗାକାରୀଙ୍କୁ ଗିରଫ କରାଯାଇଥିଲା। ଗିରଫ ବ୍ୟକ୍ତିଙ୍କ ବିରୋଧରେ ଆତଙ୍କବାଦ ବିରୋଧୀ ଅର୍ଡିନାନ୍ସ (ପୋଟା)ଲାଗୁ କରାଯାଇଥିଲା। ତା’ପରେ ୨୫ ମାର୍ଚ୍ଚ ୨୦୦୨ ରେ ସମସ୍ତ ଅଭିଯୁକ୍ତଙ୍କ ଠାରୁ ପୋଟା ପ୍ରତ୍ୟାହାର କରାଯାଇଥିଲା।
୧୭ ଜାନୁୟାରୀ ୨୦୦୫ରେ, ୟୁସି ବାନାର୍ଜୀ କମିଟି ଏହାର ପ୍ରାଥମିକ ରିପୋର୍ଟରେ କହିଥିଲେ, ଯେ ଗୋଧ୍ରା ଘଟଣା କେବଳ ଏକ ଦୁର୍ଘଟଣା। ୧୩ ଅକ୍ଟୋବର ୨୦୦୬ ରେ ଗୁୁରାଟ ହାଇକୋର୍ଟ ୟୁସି ବାନାର୍ଜୀ କମିଟିକୁ ବେଆଇନ ଏବଂ ଅସାମ୍ବିଧାନିକ ଘୋଷଣା କରିଥିଲେ। କାରଣ ନାନାବତୀ-ଶାହା ଆୟୋଗ ଏହି ଦଙ୍ଗା ସହ ଜଡିତ ସମସ୍ତ ମାମଲାର ତଦନ୍ତ କରିସାରିଥିଲେ।
ଏଥି ସହିତ, ୨୬ ମାର୍ଚ୍ଚ ୨୦୦୮ ରେ, ସୁପ୍ରିମକୋର୍ଟ ଗୋଧ୍ରା ଘଟଣା ଏବଂ ପରବର୍ତ୍ତୀ ଦଙ୍ଗା ସହ ଜଡିତ ୮ ଟି ମାମଲାର ଯାଞ୍ଚ ପାଇଁ ଏକ ସ୍ବତନ୍ତ୍ର ଅନୁସନ୍ଧାନ ଆୟୋଗ ଗଠନ କରିଥିଲେ। ୧୮ ସେପ୍ଟେମ୍ବର ୨୦୦୮ ରେ, ନାନାବତୀ ଆୟୋଗ ଗୋଧ୍ରା ଘଟଣାର ତଦନ୍ତ ହସ୍ତାନ୍ତର କରିଥିଲେ। ଏହା ଏକ ପୂର୍ବ ଯୋଜନା ଆଧାରରେ ହୋଇଥିବା ଷଡଯନ୍ତ୍ର ବୋଲି ରିପୋର୍ଟରେ ଉଲ୍ଲେଖ କରାଯାଇଥିଲା। ତେବେ ୨୨ ଫେବୃଆରୀ ୨୦୧୧ରେ, ସ୍ବତନ୍ତ୍ର କୋର୍ଟ ଗୋଧ୍ରା ଘଟଣାରେ ୩୧ ଜଣଙ୍କୁ ଦୋଷୀ ସାବ୍ୟସ୍ତ କରିଥିବାବେଳେ ଅନ୍ୟ ୬୩ ଜଣଙ୍କୁ ନିର୍ଦ୍ଦୋଷରେ ଖଲାସ କରିଥିଲେ।
