ଭୁବନେଶ୍ୱର, ୩।୪(କ୍ରୀଡ଼ା ପ୍ରତିନିଧି)-
ଏକ ଜାତୀୟ ଟୁର୍ନାମେଣ୍ଟର ଫାଇନାଲରେ ପ୍ରବେଶ କରି ପ୍ରଥମ ଓଡ଼ିଆ ଭାବେ ନିକଟରେ ନୂଆ କୀର୍ତ୍ତିମାନ ସ୍ଥାପନ କରିଥିବା ଓଡ଼ିଶାର ଟେନିସ ପ୍ରତିଭା ସୋହିନୀ ମହାନ୍ତି ଏବେ ସଫଳତା ଫର୍ଦ୍ଦକୁ ଆଗକୁ ବଢ଼ିଛନ୍ତି। ଅହମଦାବାଦର ଆଲେକଜାଣ୍ଡର ଓ୍ବାସ୍କେ ଟେନିସ ଏକାଡେମୀରେ ଅନୁଷ୍ଠିତ ସୁପର ସିରିଜ ଇଭେଣ୍ଟର ୧୪ ବର୍ଷରୁ କମ୍ ବାଳିକା ବର୍ଗରେ ସେ ଦ୍ୱିମୁକୁଟ ହାସଲ କରିଛନ୍ତି। ସିଙ୍ଗଲ୍ସ ଫାଇନାଲରେ ସେ ହାଇଦ୍ରାବାଦର ବଂଶିକା ମାରିଆ ଭେଜ ବସନ୍ଥଙ୍କୁ ସିଧାସଳଖ ୬-୦, ୬-୦ ସେଟ୍ରେ ହରାଇ ଚାମ୍ପିୟନ ହୋଇଥିଲେ। ଗୁଜରାଟର ଆଭାନୀ ସୁଜିତ ଚିତାଲେ ଥିଲେ ସୋହିନୀଙ୍କର ଡବଲ୍ସ ପାର୍ଟନର। ଫାଇନାଲରେ ସୋହିନୀ-ଆଭାନୀ ଗୁଜରାଟ ଯୋଡ଼ି ପ୍ରାର୍ଥନା ସୋଲାଙ୍କି ଓ ପ୍ରିୟଙ୍କା ସଞ୍ଜୟ ରାଣାଙ୍କୁ ୬-୧, ୬-୪ ସେଟ୍ରେ ହରାଇ ଡବଲ୍ସ ଟାଇଟଲ ଜିତିଥିଲେ। ସୋହିନୀ ପଟିଆସ୍ଥିତ ଫରହାନ ଟେନିସ ଏକାଡେମୀରେ ପ୍ରତିଷ୍ଠିତ କୋଚ୍ ସୟଦ ଫରହାନ ଅଲୀଙ୍କ ନିକଟରୁ ପ୍ରଶିକ୍ଷଣପ୍ରାପ୍ତ।
ପ୍ରକାଶଯୋଗ୍ୟ ଯେ, କିଟ୍ ଇଣ୍ଟରନ୍ୟାଶନାଲ ସ୍କୁଲ୍ର ଛାତ୍ରୀ ୧୨ ବର୍ଷୀୟା ସୋହିନୀ ଗତ ମାର୍ଚ୍ଚରେ ମୁମ୍ବାଇରେ ଅନୁଷ୍ଠିତ ଜାତୀୟ ଟେନିସ ପ୍ରତିଯୋଗିତାର ୧୪ ବର୍ଷରୁ କମ୍ ବିଭାଗରେ ଉଭୟ ସିଙ୍ଗଲ୍ସ ଓ ଡବଲ୍ସ ଫାଇନାଲ ଖେଳି ଇତିହାସ ରଚିଥିଲେ। ଉଭୟ ବିଭାଗରେ ସେ ରନର୍ସଅପ୍ ହୋଇଥିଲେ ହେଁ ପ୍ରଥମ ଓଡ଼ିଆଭାବେ କୌଣସି ଜାତୀୟ ଟେନିସ ଇଭେଣ୍ଟ ଫାଇନାଲ ଖେଳିବାର ଗୌରବ ଅର୍ଜନ କରିଥିଲେ। ଜାତୀୟ ର଼୍ୟାଙ୍କ୍ର ୫୧ତମ ସ୍ଥାନରେ ଥିବା ସୋହିନୀ ଫାଇନାଲରେ ପ୍ରବେଶ ପଥରେ ଭାରତର ୨ ଓ ୬ ନମ୍ବର ଖେଳାଳିଙ୍କୁ ପରାସ୍ତ କରିଥିଲେ। ବୟସ ମାତ୍ର ୧୨ ହୋଇଥିଲେ ହେଁ ସୋହିନୀ ଇତିମଧ୍ୟରେ ୫୯ରୁ ଊର୍ଦ୍ଧ୍ୱ ଅଲ୍ ଇଣ୍ଡିଆ ଟାଇଟଲ୍ ହାସଲ କରିସାରିଛନ୍ତିି। ଏହି କ୍ରମରେ ସର୍ବାଧିକ ଟାଇଟଲ ହାସଲକାରୀ ଅନ୍ୟତମ ଓଡ଼ିଆ ଖେଳାଳି ଭାବେ ସାବ୍ୟସ୍ତ ହୋଇଛନ୍ତି। ନିଜର କଠିନ ପରିଶ୍ରମ ଓ ଅଧ୍ୟବସାୟ ବଳରେ ସେ ୧୨ ବର୍ଷରୁ କମ୍ ଭାରତୀୟ ଜୁନିୟର ଡେଭିସ କପ୍ ଦଳରେ ସ୍ଥାନ ପାଇଥିଲେ। କିଟ୍ ଓ କିସ୍ର ପ୍ରତିଷ୍ଠାତା ଏମ୍ପି ଅଚ୍ୟୁତ ସାମନ୍ତ ସୋହିନୀଙ୍କୁ ଅଭିନନ୍ଦନ ଜଣାଇଛନ୍ତି।
