କୋଲକାତା, ୩୦।୮: ପଶ୍ଚିମବଙ୍ଗର ନର୍ଥ ୨୪ ପ୍ରଗଣାସ୍ଥିତ ବର୍ସାତ୍ ସରକାରୀ କଲେଜର ଆଡ୍ମିଶନ ଲାଗି ନକଲି ପ୍ରୋଭିଜିନାଲ ମେରିଟ୍ ଲିଷ୍ଟ ସୋସିଆଲ ମିଡିଆରେ ଘୂରି ବୁଲୁଛି। ଯେଉଁଥିରେ ଜଣାଶୁଣା ପର୍ନଷ୍ଟାର୍ ତଥା ବଲିଉଡ୍ ଅଭିନେତ୍ରୀ ସନ୍ନି ଲିଓନିଙ୍କ ନାମ ରହିଥିବା ଦେଖିବାକୁ ମିଳିଛି। ସନ୍ନିଙ୍କ ବ୍ୟତୀତ ମିଆ ଖାଲିଫା ଓ ଡାନି ଡାନିଏଲ୍ସଙ୍କ ନାମ ମଧ୍ୟ ଏହି ନକଲି ପ୍ରୋଭିଜିନାଲ ଆଡ୍ମିଶନ ତାଲିକାରେ ରହିଥିବା ଦେଖିବାକୁ ମିଳିଛି। ଏହାପରେ ବର୍ସାତ୍ ସରକାରୀ କଲେଜ କର୍ତ୍ତୃପକ୍ଷ ପୋଲିସ ନିକଟରେ ଏକ ମାମଲା ରୁଜୁ କରିଛନ୍ତି। ‘କିଛି ଅଭିନେତ୍ରୀ ଓ ଷ୍ଟାର୍ଙ୍କ ନାମ ଥିବା ଏକ ନକଲି ପ୍ରୋଭିଜିନାଲ ଆଡ୍ମିଶନ ତାଲିକା ସୋସିଆଲ ମିଡିଆରେ ପ୍ରଚାର କରାଯାଉଛି। କିନ୍ତୁ ମୂଳ ମେରିଟ୍ ଲିଷ୍ଟରେ ଏହି ନାମଗୁଡ଼ିକ ସ୍ଥାନ ପାଇନାହିଁ। କେହିଜଣେ ମେରିଟ୍ ଲିଷ୍ଟ ଡାଉନଲୋଡ୍ କରି ଏହାକୁ ଏଡିଟ୍ କରିବାପରେ ସୋସିଆଲ୍ ମିଡିଆରେ ଭାଇରାଲ୍ କରିଦେଇଛି। ଏନେଇ ଆମେ ପୋଲିସ ନିକଟରେ ଅଭିଯୋଗ କରିଛୁ’ ବୋଲି କଲେଜ ଅଧ୍ୟକ୍ଷ ଦେବେଶ ରୟ ଗଣମାଧ୍ୟମକୁ ସୂଚନା ଦେଇଛନ୍ତି। ଏଥିପୂର୍ବରୁ ଅନ୍ୟଏକ କୋଲକାତାଭିତ୍ତିକ କଲେଜର ନକଲି ମେରିଟ୍ ଲିଷ୍ଟ ତାଲିକାରେ ମଧ୍ୟ ସନ୍ନିଙ୍କ ନାମ ସ୍ଥାନ ପାଇଥିଲା।
