ନୂଆଦିଲ୍ଲୀ,୬।୧: ଜୁନ୍ରେ ହେବାକୁ ଥିବା ଟି୨୦ ବିଶ୍ୱକପ୍ରେ ରୋହିତ ଶର୍ମା ଏବଂ ବିରାଟ କୋହଲି ଖେଳିବାକୁ ସମର୍ଥନ କରିଛନ୍ତି ପୂର୍ବତନ ଅଧିନାୟକ ସୁନୀଲ ଗାଭାସ୍କର। ଉଭୟ ଦଳ ପାଇଁ କେବଳ ପ୍ରମୁଖ ବ୍ୟାଟ୍ସମ୍ୟାନ୍ ନୁହନ୍ତି ବରଂ ଭଲ ଫିଲ୍ଡର ମଧ୍ୟ। ଏଣୁ ମଇଦାନରେ ସେମାନଙ୍କ ଉପସ୍ଥିତି ଦଳକୁ ଫାଇଦା ଦେବ। ଏଥିସହ ଡ୍ରେସିଂ ରୁମ୍ରେ ତାଙ୍କର ଉପସ୍ଥିତି ସକରାତ୍ମକତା ଆଣିବ ବୋଲି ସେ କହିଛନ୍ତି।
ଷ୍ଟାର ସ୍ପୋଟ୍ସକୁ ସାକ୍ଷାତକାର ଦେଇ ଗାଭାସ୍କର କହିଛନ୍ତି, ମୋତେ ବିରାଟ-ରୋହିତଙ୍କ ଫିଲ୍ଡିଂ ବହୁତ ପସନ୍ଦ। ସେ ଏବେ ବି ଭଲ ଫିଲ୍ଡର ଭାବେ ନିଜକୁ ପ୍ରମାଣିତ କରିଛନ୍ତି। ମଇଦାନରେ ଏହା ଦଳକୁ ଫାଇଦା ଦେବ। କେବେ କେବେ କ୍ରିକେଟରମାନେ ୩୫-୩୬ ବର୍ଷର ହୋଇଗଲେ ଭଲ ପ୍ରଦର୍ଶନ କରିପାରି ନ ଥାନ୍ତି। ଫିଲ୍ଡିଂରେ ପ୍ରଭାବ କମ୍ ଥିବାରୁ ମଇଦାନରେ କେଉଁଠି ଛିଡ଼ା କରାଯିବ ସେ ନେଇ ଚିନ୍ତା ବଢ଼େ। ହେଲେ ବିରାଟ ଏବଂ ରୋହିତଙ୍କୁ ନେଇ ସେଭଳି କିଛି ସମସ୍ୟା ନାହିଁ। କାରଣ ଏମାନେ ଏବେ ବି ଭଲ ଫିଲ୍ଡର ଅଟନ୍ତି।
ପ୍ରକାଶ ଯେ, ଓ୍ବେଷ୍ଟଇଣ୍ଡିଜ ଓ ୟୁଏସ୍ଏ ମିଳିତ ଭାବେ ଆୟୋଜନରେ ହେବାକୁ ଥିବା ଏହି ଟୁର୍ନାମେଣ୍ଟ ଜୁନ୍ ୧ରେ ଆରମ୍ଭ ହେବ। ଜୁନ୍ ୫ରେ ନ୍ୟୁୟର୍କଠାରେ ଆୟର୍ଲାଣ୍ଡ ବିପକ୍ଷରେ ଖେଳି ଭାରତ ଏହାର ବିଶ୍ୱକପ୍ ଅଭିଯାନ ଆରମ୍ଭ କରିବ। ତେବେ ରୋହିତଙ୍କ ସ୍ଥାନରେ ହାର୍ଦ୍ଦିକ ପାଣ୍ଡ୍ୟା ଭାରତ ଟି୨୦ ଦଳର ଅଧିନାୟକ ଅଛନ୍ତି। ଏଣୁ ରୋହିତଙ୍କ ନେତୃତ୍ୱରେ ଦଳ ବିଶ୍ୱକପ୍ ଖେଳିବ କି କ୍ରିକେଟର କେବଳ ଜଣେ ଖେଳାଳି ଭାବେ ଜଡ଼ିତ ରହିବେ ତାହା ଏଯାବତ ସ୍ପଷ୍ଟ ହୋଇନାହିଁ।
