ଭୁବନେଶ୍ୱର,୧୩।୧(ବ୍ୟୁରୋ): ସୁନ୍ଦରପଦାର ଦୀପକ କୁମାର ରାଉତରାୟଙ୍କ ହତ୍ୟା ମାମଲାରେ ଏୟାରଫିଲ୍ଡ ଥାନା ପୋଲିସ ଆଉ ୨ ଅଭିଯୁକ୍ତଙ୍କୁ ଗିରଫ କରିଛି। ଏଥିସହ ଘଟଣାର ରହସ୍ୟ ଉନ୍ମୋଚନ କରିଛିି। ଗାଡି ସାଇଡ୍ମରାରୁ ଗଣ୍ଡଗୋଳ ଘଟିଥିବାବେଳେ ପାଟି ବନ୍ଦ କରିବାକୁ କହିବାରୁ ନିରୀହ ଦୀପକଙ୍କୁ ଅଭିଯୁକ୍ତମାନେ ହତ୍ୟା କରିଥିବା କମିଶନରେଟ ପୋଲିସ ସୂଚନା ଦେଇଛି। ଗିରଫ ୨ ଅଭିଯୁକ୍ତ ହେଲେ କପିଳେଶ୍ୱର ଗ୍ରାମର ପ୍ରଭୁପ୍ରସାଦ ମଲିଆ ଓରଫ ରାଜା(୨୮) ଓ ଅଭିଷେକ ମଲିଆ ଓରଫ ତପୁ(୨୧)। ଉଭୟଙ୍କ ଠାରୁ ହତ୍ୟାରେ ବ୍ୟବହୃତ ମାରଣାସ୍ତ୍ରକୁ ପୋଲିସ ଜବତ କରିଛି। ଅନ୍ୟପକ୍ଷରେ ପୂର୍ବରୁ ଗିରଫ ହୋଇ ରିମାଣ୍ଡରେ ଆସିଥିବା ୩ ଅଭିଯୁକ୍ତ ଦେବୀପ୍ରସାଦ ମଲିଆ ଓରଫ ବିକି, ସୁଜିତ୍ ପଣ୍ଡା ଓରଫ ରକି ଓ ଗୁନୁ ମାଲିଆଙ୍କ ୫ ଦିନିଆ ରିମାଣ୍ଡ ଅବଧି ସରିବା ପରେ ବୁଧବାର ଜେଲ୍ ଯାଇଛନ୍ତି। ଏହି ମାମଲାରେ ସମ୍ପୃକ୍ତ ରକିଙ୍କ ସମେତ ଅନ୍ୟ ସହଯୋଗୀମାନଙ୍କୁ ଧରିବାକୁ ତଦନ୍ତ ଜାରି ରହିଥିବା ପୋଲିସ କହିଛି।
ସୂଚନା ଅନୁଯାୟୀ, ଗତ ୩୧ ତାରିଖ ରାତିରେ ନୂଆସାହି ହଜ୍ ପୋଖରୀ ପାଖରେ ବିଭିନ୍ନ ଗୋଷ୍ଠୀ ଭୋଜିଭାତ କରୁଥିଲେ। ସେଠାରେ ଅଭିଯୁକ୍ତମାନେ ମଧ୍ୟ ଭୋଜି କରୁଥିଲେ। ଏହି ସମୟରେ କପିଳପ୍ରସାଦର ଗୁନୁ ଓ ରକି ସୁନ୍ଦରପଦା ଗୋଷ୍ଠୀ ଭୋଜି କରୁଥିବା ସ୍ଥାନ ଦେଇ ବାଇକ ନେଇ ଯାଇଥିଲେ। ବାଇକ୍ ସାଇଡ୍ମରାକୁ ନେଇ ସେଠାରେ ପାଟିତୁଣ୍ଡ ହୋଇଥିଲା। ଏହାପରେ ଉଭୟ ସେଠାରୁ ଚାଲିଆସି ଅନ୍ୟ ସହଯୋଗୀଙ୍କୁ ଜଣାଇଥିଲେ। କିଛି ସମୟ ପରେ ଗୁନୁ, ରକି ଓ ବିକି ସେମାନଙ୍କ ନିକଟକୁ ଯାଇ ଝଗଡା କରିଥିଲେ। ଉଭୟ ଗୋଷ୍ଠୀ ମାରପିଟ ଲାଗିବାରୁ ଏଥିରେ ବିକି ଆହତ ହୋଇଥିଲେ। ପ୍ରତିଶୋଧ ନେବା ପାଇଁ ବିଳମ୍ବିତ ରାତିରେ ୧୦ରୁ ଊର୍ଦ୍ଧ୍ୱ ଯୁବକ ମାରଣାସ୍ତ୍ର ଧରି ସେଠାରେ ପହଞ୍ଚତ୍ଥିଲେ। ଏହା ଦେଖି ସୁନ୍ଦରପଦାର ଯୁବକମାନେ ଭୟରେ ଦୌଡ଼ି ପଳାଇ ଯାଇଥିଲେ। ହେଲେ ଏହି ସମୟରେ ନିକଟସ୍ଥ ଷଣ୍ଢ କ୍ଲବରେ ଶୋଇଥିବା କପିଳପ୍ରସାଦ ଗ୍ରାମର ଦୀପକ ଉଠି ସେମାନଙ୍କୁ ବଡ଼ପାଟି ନ କରି ଚାଲିଯିବାକୁ କହିଥିଲେ। ଏଥିରେ ଅଭିଯୁକ୍ତମାନେ ଉତ୍କ୍ଷିପ୍ତ ହୋଇ ଦୀପକଙ୍କୁ ମାରଣାସ୍ତ୍ରରେ ହାଣି ଦେଇଥିଲେ। ସେ ତଳେ ପଡ଼ି ଛଟପଟ ହେଉଥିବାବେଳେ ଅଭିଯୁକ୍ତମାନେ ସେଠାରୁ ଫେରାର ହୋଇଯାଇଥିଲେ।
