କଟକ ଅଫିସ/ପୁରୀ ଅଫିସ/ସାକ୍ଷୀଗୋପାଳ: (ଡି.ଏନ୍.ଏ.), ୧୨।୧୦ଶେଷରେ ଜୀବନ ଯୁଦ୍ଧରେ ହାରିଯାଇଛନ୍ତି ସୁକାନ୍ତି ଭୋଇ। କଟକ ଏସ୍ସିବି ମେଡିକାଲରେ ଚିକିତ୍ସାଧୀନ ଅବସ୍ଥାରେ ରବିବାର ମଧ୍ୟାହ୍ନରେ ସେ ସବୁଦିନ ପାଇଁ ଆଖିବୁଜି ଦେଇଛନ୍ତି। ଅନ୍ୟପକ୍ଷରେ ରୋଗଣା ସ୍ତ୍ରୀଙ୍କ ଜୀବନ ବଞ୍ଚାଇବାକୁ ପରିଣତ ବୟସରେ କବୀର ଭୋଇଙ୍କ ଅଦମ୍ୟ ଇଚ୍ଛା ଅଧୁରା ରହିଯାଇଛି। ଦୁଇଦିନ ତଳେ ଅସୁସ୍ଥ ସ୍ତ୍ରୀଙ୍କୁ ଟ୍ରଲିରେ ବୋହି କବୀର ପୁରୀ ଜିଲା ସତ୍ୟବାଦୀ ବ୍ଲକ ଦାଶବିଦ୍ୟାଧରପୁର ଗ୍ରାମରୁ ୯୦ କିଲୋମିଟର ଦୂର କଟକ ଯାଇଥିଲେ। କିନ୍ତୁ ଶେଷରେ ନିରାଶ ହୋଇ ସ୍ତ୍ରୀଙ୍କ ମୃତଦେହ ଧରି ମହାପ୍ରୟାଣ ଗାଡ଼ିିରେ ଗାଁକୁ ଫେରିବାକୁ ପଡ଼ିଲା ବୋଲି କୋହଭରା କଣ୍ଠରେ କହିଛନ୍ତି କବୀର। କଟକରୁ ମହାପ୍ରୟାଣ ଗାଡ଼ିରେ ସୁକାନ୍ତିଙ୍କ ମୃତଦେହ ଦାଶବିଦ୍ୟାଧରପୁର ଦଳିତସାହିରେ ପହଞ୍ଚତ୍ବା ପରେ ଗଁାରେ ଶୋକାକୁଳ ପରିବେଶ ସୃଷ୍ଟି ହୋଇଛି। ପରେ ସାହିଭାଇମାନେ ସୁକାନ୍ତିଙ୍କ ମୃତଦେହକୁ ଗ୍ରାମ ଶ୍ମଶାନକୁ ନେଇ ଅନ୍ତିମ ସଂସ୍କାର କରିଛନ୍ତି। ଏହି ଗରିବ ପରିବାରକୁ ସରକାରୀ କିମ୍ବା ବେସରକାରୀ ଭାବେ କୌଣସି ସହାୟତା ମିଳିନାହିଁ। ଭାଜପା ରାଜ୍ୟ କାର୍ଯ୍ୟକାରିଣୀ ସଭ୍ୟ ଓମ୍ ପ୍ରକାଶ ମିଶ୍ର, ଅଳଗୁମ ମଣ୍ଡଳ ସଭାପତି ସୁରେନ୍ଦ୍ର ପ୍ରଧାନ, ଜୟପୁର ସରପଞ୍ଚ ବିଶ୍ୱଜିତ ମହାପାତ୍ର ଓ ଦାଶବିଦ୍ୟାଧରପୁର ସରପଞ୍ଚ ହରିହର ନନ୍ଦ ପ୍ରମୁଖ ତାଙ୍କ ଘର ନିକଟରେ ପହଞ୍ଚତ୍ ସମବେଦନା ଜଣାଇବା ସହ ରେଡ୍କ୍ରସ ପାଣ୍ଠିରୁ ସହାୟତା ଯୋଗାଇ ଦେବାକୁ ଦାବି କରିଛନ୍ତି। ଅନ୍ୟପକ୍ଷରେ ସୁକାନ୍ତିଙ୍କୁ ଚିକିତ୍ସା କରୁଥିବା ସର୍ଜରି ବିଭାଗର ଡା. ପରୀକ୍ଷିତ ବେହେରା କହିଛନ୍ତି, ପରୀକ୍ଷାରୁ ତାଙ୍କର ଯକୃତ କର୍କଟ ହୋଇଥିବା ଜଣାପଡ଼ିଥିଲା। ତେବେ ନିଦାନ ଅନୁଯାୟୀ ଚିକିତ୍ସା ଚାଲିଥିବାବେଳେ ରବିବାର ମଧ୍ୟାହ୍ନ ୧୨.୨୦ରେ ସୁକାନ୍ତିଙ୍କ ମୃତ୍ୟୁ ଘଟିଛି। ହସ୍ପିଟାଲ ପକ୍ଷରୁ ମହାପ୍ରୟାଣ ଗାଡ଼ିରେ ତାଙ୍କ ମୃତଦେହକୁ ଘରେ ପହଞ୍ଚାଇବା ପାଇଁ ବ୍ୟବସ୍ଥା କରାଯାଇଛି। ଏସ୍ସିବି ଛାଡ଼ିବା ବେଳେ କବୀର କହିଛନ୍ତି, ଶେଷ ସମୟରେ ଗଁା ମାଟିକୁ ଫେରିବାକୁ ମୋ’ ସ୍ତ୍ରୀଙ୍କ ଇଛା ଥିଲା। ତେଣୁ ମୁଁ ତାଙ୍କ ମରଶରୀରକୁ ନେଇ ଫେରିଯାଉଛି। ତେବେ କଟକ ଆସିବା ବେଳେ ଆମ୍ବୁଲାନ୍ସ ବ୍ୟବସ୍ଥା ହୋଇପାରିଥିଲେ ହୁଏତ ମୋ’ ସ୍ତ୍ରୀ ଠିକ୍ ସମୟରେ ଉପଯୁକ୍ତ ଚିକିତ୍ସା ପାଇ ବଞ୍ଚିଯାଇଥାନ୍ତେ। ଏ ସମ୍ପର୍କରେ ପୁରୀ ଏଡିଏମ୍ଓ (ମେଡିକାଲ) ପ୍ରଣବ ଶଙ୍କର ଦାଶ ଗଣମାଧ୍ୟମକୁ କହିଛନ୍ତି, ସୁକାନ୍ତି କେବେ ଏଠାକୁ ଚିକିତ୍ସା ପାଇଁ ଆସିଥିଲେ ସେଥିଲାଗି ସୋମବାର ସବୁ ବେଡ୍ ଟିକେଟ ବାହାର କରି ଦେଖାଯିବ। କିନ୍ତୁ ନିକଟରେ ସେ ଏଠାକୁ ଚିକିତ୍ସା ପାଇଁ ଆସିଥିବା ଜଣାପଡୁନି। କିନ୍ତୁ ଯାହା ବି ହେଉ ଯେ କୌଣସି ଲୋକ ୧୦୮କୁ ଫୋନ୍ କରିଥିଲେ ନିଶ୍ଚିତ ତାଙ୍କୁ ନେବା ପାଇଁ ଘରେ ଆମ୍ବୁଲାନ୍ସ ପହଞ୍ଚତ୍ଥାନ୍ତା। ଏହା ଜନସାଧାରଣ ବୁଝିବା ଦରକାର। ସୁକାନ୍ତି କେବେ ଏଠାକୁ ଆସିଥିଲେ ଏବଂ ତାଙ୍କୁ କି ପ୍ରକାର ଚିକିତ୍ସା ସେବା ଯୋଗାଇ ଦିଆଯାଇଛି ତାହାର ତଦନ୍ତ କରାଯିବ ବୋଲି ଏଡିଏମ୍ଓ କହିଛନ୍ତି।
