ବାରିପଦା,୨୮ା୩(ନୀଳାଦ୍ରି ବିହାରୀ ଦଣ୍ଡପାଟ)ଭାଜପା ଓ ବିଜେଡି ପକ୍ଷରୁ ମୟୂରଭଞ୍ଜ ଲୋକସଭା ପ୍ରାର୍ଥୀ ଘୋଷଣା ପରେ ଜିଲାରେ ନିର୍ବାଚନୀ ଉଷ୍ମତା ଜୋର ଧରିଛି। ଦୁଇ ପ୍ରମୁଖ ଦଳର ପ୍ରତିଦ୍ୱନ୍ଦ୍ୱିତା ମଧ୍ୟରେ ତୃତୀୟ ଦଳ ବାଜିମାତ୍ କରିବାର ସମ୍ଭାବନା ସୃଷ୍ଟି ହୋଇଛି।
ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଜନ୍ମମାଟି ମୟୂରଭଞ୍ଜ ଜିଲା ଲୋକସଭା ଆସନ ଉପରେ ସମସ୍ତଙ୍କର ଦୃଷ୍ଟି ରହିଛି। ରାଜନୀତି ମଇଦାନରେ ଟକ୍କର ଦେବାକୁ ଥିବା ଦୁଇ ପ୍ରମୁଖ ଦଳର ପ୍ରାର୍ଥୀଙ୍କ ନାମ ଘୋଷଣା ପରେ ଦଳୀୟ ରଣନୀତି ଆରମ୍ଭ ହୋଇଛି। ଭାଜପା ପକ୍ଷରୁ ରାଇରଙ୍ଗପୁର ବିଧାୟକ ନବଚରଣ ମାଝି ଓ ବିଜେଡି ପକ୍ଷରୁ ବାଙ୍ଗରିପୋଷି ବିଧାୟକ ସୁଦାମ ମାରାଣ୍ଡିଙ୍କୁ ପ୍ରାର୍ଥୀ ଭାବେ ଘୋଷଣା କରାଯାଇଛି। ସୁଦାମଙ୍କୁ ନେଇ ଏବେ ଚର୍ଚ୍ଚା ଜୋର ଧରିଛି। ୧୯୯୦ରୁ ଅଦ୍ୟାବଧି ୫ଥର ବିଧାୟକ ଓ ଥରେ ସାଂସଦ ଭାବେ ନିର୍ବାଚିତ ହୋଇ ସେ ଲୋକଙ୍କ ପ୍ରିୟପାତ୍ର ହୋଇପାରିଛନ୍ତି। ୨୦୦୪ରେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା(ଜେଏମ୍ଏମ୍)ରୁ ପ୍ରାର୍ଥୀ ହୋଇ ପ୍ରଥମେ ଲୋକସଭାକୁ ନିର୍ବାଚିତ ହୋଇଥିଲେ। ୨୦୦୯ରେ ଜେଏମ୍ଏମ୍ରୁ ପୁନର୍ବାର ଟିକଟ ପାଇ ରାଜନୀତି ମଇଦାନରେ ଦ୍ୱିତୀୟ ସ୍ଥାନରେ ରହିଯାଇଥିଲେ। ପରେ ଜେଏମ୍ଏମ୍ ଛାଡ଼ି ବିଜେଡିରେ ମିଶିବା ପରେ ୨୦୧୪ରେ ବାଙ୍ଗରିପୋଷିରୁ ବିଧାୟକ ଭାବେ ନିର୍ବାଚିତ ହୋଇ ମନ୍ତ୍ରୀ ପଦ ହାତେଇଥିଲେ।
ସେହିପରି ନବଚରଣ ମାଝି ପ୍ରଥମ ଥର ବିଧାନସଭାକୁ ନିର୍ବାଚିତ ହେବା ପରେ ଭାଜପା ଦଳ ପକ୍ଷରୁ ଲୋକସଭା ପ୍ରାର୍ଥୀ ଭାବେ ମନୋନୀତ ହୋଇଛନ୍ତି। ସୁଦାମଙ୍କ ଭଳି ଟାଣୁଆ ନେତାଙ୍କ ପାଖରେ ନବଚରଣଙ୍କ ଲୋକପ୍ରିୟତା କମ୍ ରହିଛି। କେବଳ ରାଷ୍ଟ୍ରପତିଙ୍କ ଜିଲା ଭାବେ ଜିଲାବାସୀଙ୍କ ଅନୁକମ୍ପା ଭୋଟ ହାତେଇବା ପାଇଁ ତାଙ୍କୁ ପ୍ରାର୍ଥୀ କରାଯାଇଥିବା ଆଲୋଚନା ହେଉଛି। ତେବେ ଗତ ପଞ୍ଚାୟତ ନିର୍ବାଚନରେ ବିଜେଡିକୁ ଅପୂର୍ବ ସଫଳତା ମିଳିଥିଲା। ତେବେ ଏଭଳି ସ୍ଥିତିରେ ଭାଜପା ପ୍ରାର୍ଥୀ ଭୋଟରଙ୍କୁ କେତେ ଆକୃଷ୍ଟ କରି ପାରୁଛନ୍ତି ତାହା ଆଗାମୀ ଦିନରେ ଜଣାପଡ଼ିବ। ତେବେ ୨୦୧୭ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଭାଜପାର ସଙ୍ଗଠନ ନ ଥିବା ସତ୍ତ୍ୱେ ୫୬ ଜିଲା ପରିଷଦ ଆସନରୁ ୪୯ ଆସନ ଅକ୍ତିଆର କରିଥିଲା ା ୨୦୧୯ରେ ୯ ବିଧାନସଭା ଆସନରୁ ଭାଜପା ୬ଟି ହାତେଇ ଥିଲା ା ଏହା ସହିତ ଲୋକସଭା ଆସନକୁ ମଧ୍ୟ ନିଜ ଖାତାକୁ ନେଇଥିଲା ା
ଅନ୍ୟ ପକ୍ଷରେ ମତଦାତାଳ, ଅନ୍ୟ ଦଳର କର୍ମୀଙ୍କ ମନରେ ଦ୍ୱନ୍ଦ ଓ ଆଶଙ୍କା କେନ୍ଦ୍ରୀଭୂତ ହୋଇଛି। ନିର୍ବାଚନ ଫଳାଫଳ ପରେ ଉଭୟ ଦଳ ପୁଣି ପରସ୍ପରକୁ ସହଯୋଗ କରିବେ ବୋଲି ଅନ୍ୟ ଦଳର ନେତାଙ୍କଠାରୁ ଶୁଣିବାକୁ ମିଳୁଛି। ତେବେ ଭାଜପା ଓ ବିଜେଡି ଲଢ଼େଇରେ ତୃତୀୟ ଦଳ ବାଜିମାତ୍ କରିପାରେ ବୋଲି ଆଲୋଚନା ଚାଲିଲାଣି।
