ଆଳି,୮ା୯(ବନମାଳୀ ସେନାପତି):ଝିଅ ବିବାହଯୋଗ୍ୟା ହେବା ପରେ ତାକୁ ଭଲ ବର ଏବଂ ଭଲ ଘର ଦେଖି ବିବାହ ଦେବାକୁ ପ୍ରତ୍ୟେକ ମା’ବାପାଙ୍କ ଇଚ୍ଛା ଥାଏ। ମାତ୍ର ଝିଅ ଯେତେବେଳେ ମା’ବାପାଙ୍କ ଇଚ୍ଛାକୁ ପ୍ରତ୍ୟାଖ୍ୟାନ କରି କୌଣସି ଯୁବକଙ୍କୁ ପ୍ରେମ କରି ଚାଲିଯାଏ, ସେତେବେଳେ ମା’ବାପା ଭାଙ୍ଗି ପଡ଼ନ୍ତି। ଏପରି କି କେହି କେହି ଝିଅର ମୁହଁ ଆଉ ଜୀବନରେ ଚାହଁିବେନି ବୋଲି ପ୍ରତିଜ୍ଞା ମଧ୍ୟ କରନ୍ତି। ଏଭଳି ଏକ ଅଭାବନୀୟ ଘଟଣା ଘଟିଛି କେନ୍ଦ୍ରାପଡ଼ା ଆଳି ଅଞ୍ଚଳରେ। ଜଣେ ଯୁବତୀ ନିଜ ଇଚ୍ଛାରେ ତାଙ୍କ ଗ୍ରାମର ଜଣେ ଯୁବକଙ୍କୁ ପ୍ରେମ ବିବାହ କରିବା ପରେ ମା’ବାପା ଝିଅର ଜୀବନ୍ତ ଅବସ୍ଥାରେ ଶୁଦ୍ଧି ହୋଇଛନ୍ତି। ଏପରି କି ଘର ସମ୍ମୁଖରେ ଝିଅର ଫଟୋ ରଖି ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି।
ମିଳିଥିବା ସୂଚନା ଅନୁଯାୟୀ, ଆଳି ଥାନା ଅନ୍ତର୍ଗତ ନୂଆବଜାର ନିକଟ ଲକ୍ଷ୍ମୀଧର ମଳିକଙ୍କ ଝିଅ ଦୀପାଞ୍ଜଳି ସେହି ଗ୍ରାମର ଅନାମ ମଳିକଙ୍କ ପୁଅ ରାଜେନ୍ଦ୍ରଙ୍କୁ ବୁଧବାର ପ୍ରେମ ବିବାହ କରିଛନ୍ତି। ଏହି ବିବାହକୁ ପୂର୍ବରୁ ଦୀପାଞ୍ଜଳିଙ୍କ ପରିବାର ଲୋକ ବିରୋଧ କରି ଆସୁଥିଲେ ସୁଦ୍ଧା କେହି ଶୁଣି ନ ଥିଲେ। ପରିବାରର ଅନିଚ୍ଛା ସତ୍ତ୍ୱେ ଝିଅ ପ୍ରେମ ବିବାହ କରିବାରୁ ମା’ବାପା ଗୁରୁବାର ଦୀପାଞ୍ଜଳିଙ୍କ ପାଇଁ ଶୁଦ୍ଧି ହୋଇଛନ୍ତି। ଏପରି କିି ଘର ସମ୍ମୁଖରେ ଦୀପାଞ୍ଜଳିଙ୍କ ଫଟୋ ଏବଂ ଶ୍ରଦ୍ଧାଞ୍ଜଳି ପୋଷ୍ଟର ଲଗାଇଛନ୍ତି। ଗୋଟିଏ ପଟେ ଦୀପାଞ୍ଜଳିଙ୍କ ଶାଶୁଘରେ ବିବାହର ଚତୁର୍ଥୀ ପାଇଁ ପ୍ରସ୍ତୁତି ଚାଲିଥିବାବେଳେ ତାଙ୍କ ବାପଘର ଲୋକମାନେ ପଣ୍ଡିତ ଡକାଇ ବିଧିବିଧାନ ଅନୁସାରେ ଝିଅ ଜୀବିତ ଥାଇ ଶୁଦ୍ଧି ହେବା ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଦୀପାଞ୍ଜଳିଙ୍କ ଶାଶୁଘର ଓ ବାପଘରର ଦୂରତ୍ୱ ମାତ୍ର ଶହେ ମିଟର ହୋଇଥିବାରୁ ଏହା ଅଧିକ ଚର୍ଚ୍ଚାର ପରିସରକୁ ଆସିଛି। ଏ ନେଇ ରାଜେନ୍ଦ୍ରଙ୍କ ବାପା ଅନାମଙ୍କୁ ପଚାରିବାରେ ସରକାରୀ ଆଇନକାନୁନ ଓ ବିଧିବିଧାନ ଅନୁସାରେ ସେ ତାଙ୍କ ପୁଅର ବାହାଘର କରିଛନ୍ତି। ଉଭୟେ ପୁଅ ଏବଂ ବୋହୂ ସାବାଳକ। କିନ୍ତୁ ସେମାନେ ମୋ ବୋହୂର ଜୀବନ୍ତ ଶୁଦ୍ଧି ହେବା ସହ ଆଳି ନୂଆବଜାରରେ ତା’ର ଶ୍ରଦ୍ଧାଞ୍ଜଳି ବ୍ୟାନର ଲଗାଇଛନ୍ତି, ଯାହାକି ଅତ୍ୟନ୍ତ ନିନ୍ଦନୀୟ। ଅପରପକ୍ଷରେ ଦୀପାଞ୍ଜଳିଙ୍କ ଦାଦା ବାବୁରାମ କୁହନ୍ତି, ସେମାନେ ଦୀର୍ଘଦିନ ହେବ ଏହି ପ୍ରେମ ସମ୍ପର୍କରେ ଜାଣିବା ପରେ ବିରୋଧ କରୁଥିଲେ। ଝିଅ ତାଙ୍କ କଥା ନ ମାନି ଘର ଛାଡ଼ି ପଳାଇ ପ୍ରେମ ବିବାହ କରିଥିବାରୁ ଏଭଳି ଏକ ଚରମ ନିଷ୍ପତ୍ତି ନିଆଯାଇଛି।
