ଆରଡ଼ି, ୩୧।୧ (ଡି.ଏନ.ଏ.) ଅର୍ଥ ନୁହେଁ ପ୍ରାର୍ଥୀଙ୍କୁ ଦେଖନ୍ତୁ, ବକ୍ତବ୍ୟ ନୁହେଁ ବ୍ୟକ୍ତିଙ୍କୁ ଦେଖନ୍ତୁ, ଚିତ୍ର ନୁହେଁ ଚରିତ୍ର ଦେଖନ୍ତୁ। ଏଭଳି ଲେଖାଥିବା ପୁସିଂ କାର୍ଡ ଧରି ଘରକୁ ଘର ବୁଲୁଛନ୍ତି ସରପଞ୍ଚ ପ୍ରାର୍ଥୀ ୭୭ ବର୍ଷୀୟ ସୁବାସ ଚନ୍ଦ୍ର ନାୟକ। କେବଳ ସେତିକି ନୁହେଁ ପୋଷ୍ଟରରେ ନିଜ ଫଟୋ ସହ ତାଙ୍କ ଗଡ୍ଫାଦର ବିଜୁ ପଟ୍ଟନାୟକଙ୍କ ଫଟୋ ମଧ୍ୟ ରଖିଛନ୍ତି। ଭଦ୍ରକ ଜିଲା ଚାନ୍ଦବାଲି ବ୍ଲକ ଅଧୀନ ଓଳଗ ପଞ୍ଚାୟତରେ ସେ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଛନ୍ତି। ସେବା କରିବାର ଅଭିପ୍ସା ରଖି ସେ ଭୋଟରଙ୍କୁ ଭେଟୁଛନ୍ତି।
ଏକଦା ଜନତା ଦଳରେ ସେ ଜଣେ ଟାଣୁଆ ନେତା ଭାବେ ସ୍ଥାନୀୟ ଅଞ୍ଚଳରେ ପରିଚିତ ଥିଲେ। ବିଜୁ ପଟ୍ଟନାୟକ ତାଙ୍କ ପ୍ରତିଭାକୁ ଚିହ୍ନିଥିବା ସେ କହନ୍ତି। ବିଜୁବାବୁ ଗଲା ପରେ ନିଜେ କୟଁାଗୋଲାଠାରେ ବୈତରଣୀ ନଦୀପଠାରେ ତାଙ୍କ ପ୍ରତିମୂର୍ତ୍ତି ନିର୍ମାଣ କରିଛନ୍ତି। ଏପରିକି ନିଜ ସାନପୁଅଙ୍କ ନଁା ବିଜୁ ପଟ୍ଟ ରଖିଛନ୍ତି। ଏବେ ତାଙ୍କୁ ଦଳ ପକ୍ଷରୁ ଅଣଦେଖା କରାଯାଇଥିବା ସେ କହିଛନ୍ତି। ଏବେ ବିଜେଡିର ଯେଉଁମାନେ ଉକ୍ତ ପଞ୍ଚାୟତରେ ନେତୃତ୍ୱ ନେଉଛନ୍ତି, ସେମାନେ ଦୁର୍ନୀତିରେ ବୁଡ଼ି ରହିଛନ୍ତି। ଯାହାଙ୍କର ୩ ମହଲା କୋଠା ଅଛି ତାଙ୍କୁ ଆବାସ ଯୋଜନାରେ ସାମିଲ କରାଯାଉଛି। ଯେଉଁମାନଙ୍କର ଚଳିବାର ସାମର୍ଥ୍ୟ ରହିଛି, ସେମାନଙ୍କୁ ରାଶନ କାର୍ଡ ଦିଆଯାଉଥିବା ସେ ଅଭିଯୋଗ କରିଛନ୍ତି। ନିର୍ବାଚନରେ ଜିତିଲେ ସାଧାରଣ ଲୋକଙ୍କ ସେବା କରିବାର ସଂକଳ୍ପ ନେଇଥିବା ସୁବାସ କହିଛନ୍ତି।
