ଆନନ୍ଦପୁର/କଣ୍ଟିପାଳ,୨୦।୫ (ସ୍ବ.ପ୍ର./ଡି.ଏନ୍.ଏ.) ୫ଟି ଯୋଜନାରେ ବିଦ୍ୟାଳୟର ନୂତନ ରୂପରେଖ ଦିଆଯାଉଛି। ସରକାରୀ ବିଦ୍ୟାଳୟ ପ୍ରତି ଛାତ୍ରଛାତ୍ରୀମାନଙ୍କୁ ଆକୃଷ୍ଟ କରିବାକୁ ବିଦ୍ୟାଳୟକୁ ଏକ ଶୈକ୍ଷିକ ବାତାବରଣ ଦେବାକୁ ଉଦ୍ୟମ କରାଯାଉଛି। ତେବେ ଏଭଳି କ୍ଷେତ୍ରରେ ଆନନ୍ଦପୁର ବ୍ଲକ କଣ୍ଟିପାଳ ପଞ୍ଚାୟତ ରାଇପାଳ ସରକାରୀ ପ୍ରାଥମିକ ବିଦ୍ୟାଳୟର ଅବସ୍ଥାକୁ ଦେଖିଲେ ଶିକ୍ଷାବ୍ୟବସ୍ଥା ପ୍ରତି ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ନା ବସିବାକୁ ଶ୍ରେଣୀଗୃହ ଅଛି ନା ପାଠ ପଢ଼ାଇବାକୁ ଶିକ୍ଷକ ଅଛନ୍ତି। ବିଭିନ୍ନ ସମସ୍ୟା ଦେଇ ଗତି କରୁଛି ଉକ୍ତ ବିଦ୍ୟାଳୟ। କେତେକ ଗଣମାଧ୍ୟମ ପ୍ରତିନିଧି ଗୁରୁବାର ଏହି ବିଦ୍ୟାଳୟରେ ପହଞ୍ଚିଥିଲେ। ବିଦ୍ୟାଳୟର ଛାତ୍ରୀଛାତ୍ରମାନେ ଖୋଲାମେଲା ଅବସ୍ଥାରେ ପଢୁଥିବା ଦେଖି ସେମାନଙ୍କୁ ଏହାର କାରଣ ପଚରାଯିବାରୁ ବିଦ୍ୟାଳୟର ଶ୍ରେଣୀଗୃହରୁ ପ୍ଲାଷ୍ଟର ଖସୁଥିବାରୁ ଆମେ ବାହାରେ ପଢୁଛୁ ବୋଲି ଉତ୍ତର ରଖିଥିଲେ। ଜଣେ ପଞ୍ଚମ ଶେଣୀ ଛାତ୍ରଙ୍କ ଉତ୍ତର ସମସ୍ତଙ୍କୁ ସ୍ତବ୍ଧ କରିଥିଲା। ସରକାର ସବୁଆଡେ ବିଦ୍ୟାଳୟ ପାଇଁ ଗୃହ ଦେଉଛନ୍ତି, ବିଦ୍ୟାଳୟ ଗୁଡିକୁ ଚିକ୍ ଚିକ୍ କରୁଛନ୍ତି, ଆମକୁ ଘର ଖଣ୍ଡେ ଦିଅନ୍ତୁ ବୋଲି କହିଥିଲେ।
ବିଦ୍ୟାଳୟରେ ପ୍ରଥମରୁ ପଞ୍ଚମ ଶ୍ରେଣୀରେ ୫୫ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ସେମାନଙ୍କୁ ପଢ଼ାଇବା ପାଇଁ ଜଣେ ଶିକ୍ଷକ ଓ ଜଣେ ଶିକ୍ଷୟତ୍ରୀ ଅଛନ୍ତି। ପିଲାମାନଙ୍କ ପାଠପଢା ପାଇଁ ରହିଛି ଗୋଟିଏ ମାତ୍ର ଶ୍ରେଣୀ ଗୃହ। ୧୫ ଦିନ ତଳେ ସେହି ଶ୍ରେଣୀ ଗୃହର ପ୍ଲାଷ୍ଟର ଖସି ଜଣେ ଛାତ୍ର ଆହତ ହୋଇଥିଲେ। ଏଭଳି ଘଟଣାକୁ ନେଇ ଅଭିଭାବକମାନେ ସେମାନଙ୍କ ପିଲାଙ୍କୁ ବିଦ୍ୟାଳୟକୁ ଛାଡିବାକୁ ଅମଙ୍ଗ ହୋଇଥିଲେ। ପରବର୍ତ୍ତୀ ସମୟରେ ଶ୍ରେଣୀ ଗୃହ ବାହାରେ ପାଠପଢ଼ାଇବାର ବ୍ୟବସ୍ଥା ଗ୍ରହଣ କରାଯିବା ପରେ ଛାତ୍ରୀଛାତ୍ରମାନେ ସ୍ବାଭାବିକ ଭାବେ ବିଦ୍ୟାଳୟକୁ ଆସିଥିଲେ। ବିଦ୍ୟାଳୟର ଏଭଳି ଅବସ୍ଥାକୁ ନେଇ ବହୁବାର ଉଚ୍ଚ ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ ଏହାର କୌଣସି ସମାଧାନ ହେଉନାହିଁ। ତୁରନ୍ତ ବିଦ୍ୟାଳୟ ସମସ୍ୟା ସମାଧାନ କରିବାକୁ ଅଭିଭାବକ ଓ ଛାତ୍ରୀଛାତ୍ରମାନେ ପ୍ରଶାସନକୁ ନିବେଦନ କରିଛନ୍ତି।
