ବେଜିଂ,୧୬।୨ : ଅନିଲ କପୁରଙ୍କ ଫିଲ୍ମ ମିଷ୍ଟର ଇଣ୍ଡିଆରେ ଏକ ଘଣ୍ଟା ପିନ୍ଧି ସେ ଅଦୃଶ୍ୟ ହୋଇଯାଉଥିଲେ। ବାସ୍ତବ ଜୀବନରେ ଚାଇନାର ଛାତ୍ରମାନେ ଏପରି ଏକ ଉଦ୍ଭାବନ କରିଛନ୍ତି। ଛାତ୍ରମାନେ ଏକ ଏଆଇ ଆଧାରିତ କୋଟ ତିଆରି କରିଛନ୍ତି ଯାହାକୁ ପିନ୍ଧି ଜଣେ ବ୍ୟକ୍ତିଙ୍କୁ ଅଦୃଶ୍ୟ କରିହେବ। କେବଳ ଏତିକି ନୁହେଁ, ଏହି ହାଇ-ଟେକ କୋଟର ବିଶେଷତ୍ୱ ହେଉଛି ସୁରକ୍ଷା କ୍ୟାମେରା ମଧ୍ୟ ଏହାକୁ ଧରିପାରିବ ନାହିଁ। ତେବେ ଚାଇନା ସରକାର ଏହି କୋଟ ଉପରେ ପ୍ରତିବନ୍ଧକ ଲଗାଇଛନ୍ତି।
ଛାତ୍ରମାନେ ଏହି ହାଇ-ଟେକ କୋଟକୁ ‘ଇନଭିସ ଡିଫେନ୍ସ’ ନାମରେ ନାମିତ କରିଛନ୍ତି। ଏହା ଏକ କୃତ୍ରିମ ବୁଦ୍ଧିମତା ଭିତ୍ତିକ କୋଟ। ଛାତ୍ରମାନେ କହିଛନ୍ତି ଯେ ଏହି କୋଟ ପିନ୍ଧିବା ପରେ ଜଣେ ଦୃଶ୍ୟମାନ ହେବେ ନାହିଁ ଏବଂ ସୁରକ୍ଷା କ୍ୟାମେରା ସାହାଯ୍ୟରେ ସମ୍ପୃକ୍ତ ବ୍ୟକ୍ତିଙ୍କୁ ଧରାଯାଇପାରିବ ନାହିଁ।
ଚାଇନା ସରକାର ଏହାର ନାଗରିକମାନଙ୍କୁ ସୁରକ୍ଷା ପାଇଁ କ୍ୟାମେରା ସାହାଯ୍ୟରେ ନଜର ରଖିଛନ୍ତି। ଏହା ଲୋକମାନଙ୍କର ପ୍ରତ୍ୟେକ କାର୍ଯ୍ୟକଳାପ ବିଷୟରେ ସୂଚନା ଦେଇଥାଏ। ସେମାନେ କେଉଁଠାରୁ ଯାଉଛନ୍ତି ସେମାନେ କ’ଣ କରୁଛନ୍ତି ତାହା ସରକାରଙ୍କ ପାଖରେ ରହିଥାଏ। ତେଣୁ ମନିଟରିଂ ଏବଂ ସିସିଟିଭିରୁ ଦୂରେଇ ରହିବା ପାଇଁ ଛାତ୍ରମାନେ ଏହି କୋଟ ତିଆରି କରିଛନ୍ତି ।
ଏହି କୋଟ ରାତିରେ ଏକ ଏଆଇ ମନିଟର ଉତ୍ତାପ ସଙ୍କେତ ସୃଷ୍ଟି କରିଥାଏ, ଯେଉଁଥିପାଇଁ ସୁରକ୍ଷା କ୍ୟାମେରା ମଧ୍ୟ ଏହାକୁ ଧରି ପାରି ନ ଥାଏ ।
ଇନଭିସ ଡିଫେନ୍ସ କୋର ହାଇ-ଟେକ ବୈଶିଷ୍ଟ୍ୟ ଦେଖି ଚାଇନା ସରକାର ଏହି କୋଟ ଉପରେ ପ୍ରତିବନ୍ଧକ ଲଗାଇଛନ୍ତି। ଚାଇନାର ନ୍ୟୁଜ ପ୍ରକାଶକ ସାଉଥ ଚାଇନା ମର୍ନିଂ ପୋଷ୍ଟର ରିପୋର୍ଟ ଅନୁଯାୟୀ ସରକାର ଏହି କୋଟକୁ ସୁରକ୍ଷା ବିପଦ ବୋଲି କହି ନିଷିଦ୍ଧ କରିଛନ୍ତି। ସରକାର କହିଛନ୍ତି ଯେ ଏହି କୋଟ ସାହାଯ୍ୟରେ ଯେକେହି ସନ୍ଦେହଜନକ ସାମଗ୍ରୀ ଏଠାରୁ ସେଠାକୁ ନେଇପାରିବେ ଏବଂ ସେମାନଙ୍କୁ ଧରିବା କଷ୍ଟକର ହେବ।
