ବାରିପଦା ଅଫିସ,୨୦ା୧୨: ବାରିପଦା ତକତପୁର ସ୍ଥିତ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱ ବିଦ୍ୟାଳୟରେ ତ୍ରୁଟିପୂର୍ଣ୍ଣ ମାର୍କିଂକୁ ନେଇ ପୁନର୍ବାର ଛାତ୍ର ଅଶାନ୍ତି ଦେଖାଦେଇଛି। ପ୍ରତିଶ୍ରୁତି ମୁତାବକ ସମାଧାନ କରାଯାଇ ନ ଥିବାରୁ ଛାତ୍ରୀଛାତ୍ରମାନେ ମୁଖ୍ୟ ଫାଟକ ସମ୍ମୁଖରେ ଧାରଣା ପୂର୍ବକ ବିକ୍ଷୋଭ ପ୍ରଦର୍ଶନ ଜାରି ରଖିଛନ୍ତି। ସିଲାବସ ଅନୁଯାୟୀ ପ୍ରଶ୍ନପତ୍ର ପଡ଼ି ନ ଥିବାରୁ ଶତାଧିକ ବିଦ୍ୟାର୍ଥୀ ପରୀକ୍ଷାରେ ଅକୃତକାର୍ଯ୍ୟ ହୋଇଥିବା ବେଳେ ଗ୍ରେସ୍ ମାର୍କ ଦେଇ ଏହାର ସମାଧାନ କରିବାକୁ ଦାବି କରିଛନ୍ତି। ଦାବି ପୂରଣ ନ ହେଲେ ଆନ୍ଦୋଳନକୁ ବ୍ୟାପକ କରାଯିବ ବୋଲି ଉତ୍ତ୍ୟକ୍ତ ଛାତ୍ରୀଛାତ୍ରମାନେ କଡ଼ା ଚେତାବନୀ ଦେଇଛନ୍ତି।
ସୂଚନାଯୋଗ୍ୟ, +୩ ଦ୍ୱିତୀୟ ବର୍ଷର ତୃତୀୟ ସେମିଷ୍ଟାର ପରୀକ୍ଷାରେ ଜିଲାର ଅନେକ ମହାବିଦ୍ୟାଳୟର ୯୦ ପ୍ରତିଶତ ଛାତ୍ରୀଛାତ୍ର ଇଂରାଜୀ ବିଷୟରେ କୃତକାର୍ଯ୍ୟ ହୋଇପାରି ନାହାନ୍ତି। ଉକ୍ତ ପରୀକ୍ଷାରେ ସିଲାବସ ଅନୁଯାୟୀ ପ୍ରଶ୍ନପତ୍ର ପଡ଼ି ନ ଥିବା ବେଳେ ବାହାରୁ ପ୍ରଶ୍ନ ଆସିଥିଲା। ଯାହାକୁ ନେଇ ଛାତ୍ରୀଛାତ୍ରଙ୍କୁ ଅବଗତ କରାଯାଇ ନ ଥିବାରୁ ପରୀକ୍ଷାରେ ଫେଲ ହୋଇଥିଲେ। ଏ ନେଇ ଗତ ୧୨ତାରିଖରେ ଛାତ୍ରୀଛାତ୍ରମାନେ ବିଶ୍ୱବିଦ୍ୟାଳୟ ସମ୍ମୁଖରେ ଧାରଣା ଦେଇଥିଲେ। ଗ୍ରେସ୍ ନମ୍ବର ଦେଇ ସମସ୍ତଙ୍କୁ ପାସ କରାଇବାକୁ ଛାତ୍ରୀଛାତ୍ରମାନେ ଭାରପ୍ରାପ୍ତ କୁଳପତିଙ୍କ ନିକଟରେ ଦାବି କରିଥିଲେ । ଏହାର ସମାଧାନ ଦିଗରେ ଯାଞ୍ଚ କରାଯାଇ ୭ଦିନ ମଧ୍ୟରେ ସମାଧାନ କରିବାକୁ ବିଶ୍ୱବିଦ୍ୟାଳୟର କର୍ତ୍ତୃପକ୍ଷ ପ୍ରତିଶ୍ରୁତି ଦେଇଥିଲେ। ତେବେ ସମୟ ଅବଧି ବିତି ଯାଇଥିଲେ ସୁଦ୍ଧା କୌଣସି ପଦକ୍ଷେପ ଗ୍ରହଣ କରି ନ ଥିବାରୁ ବିଭିନ୍ନ ମହାବିଦ୍ୟାଳୟର ଛାତ୍ରୀଛାତ୍ରମାନେ ମୁଖ୍ୟ ଫାଟକ ବନ୍ଦ କରି ବିକ୍ଷୋଭ ପ୍ରଦର୍ଶନ କରିଛନ୍ତି। ତେବେ ଆଗକୁ ତ୍ରୁଟିପୂର୍ଣ୍ଣ ମାକିର୍ର୍ଂର ସମାଧାନ ନ ହେଲେ ଛାତ୍ରୀଛାତ୍ରମାନେ ଆନ୍ଦୋଳନାମତ୍କ ପନ୍ଥା ଆପଣାଇବେ ବୋଲି ଶୁଭମ ପାଣି, ଶଙ୍କର୍ଷଣ ପଣ୍ଡା, ଜ୍ୟୋତିର୍ମୟୀ ପାଣ୍ଡେ, ଡଲିରାଣୀ ଗିରି, ଦେବସ୍ମିତା ବେହେରା ପ୍ରମୁଖ ଚେତାବନୀ ଦେଇଛନ୍ତି।
