ଲଣ୍ଡନ,୧୫।୮: ଚଳିତ ଲଡର୍ସ ଟେଷ୍ଟର ତୃତୀୟ ଦିନ ଶେଷ ଆଡ଼କୁ ଭାରତୀୟ ପେସର ଯଶପ୍ରୀତ ବୁମରା ଓ ଇଂଲଣ୍ଡର ଜିମ୍ମି ଆଣ୍ଡରସନଙ୍କ ମଧ୍ୟରେ ଏକ ରୋମାଞ୍ଚକର ପ୍ରତିଯୋଗିତା ଦେଖିବାକୁ ମିଳିଥିଲା। ଇଂଲଣ୍ଡର ୧୧ ନମ୍ବର ବ୍ୟାଟ୍ସମ୍ୟାନ ଆଣ୍ଡରସନଙ୍କୁ ଗୋଟିଏ ଓଭରରେ ଲଗାତାର ବାଉନ୍ସର ମାରିଥିଲେ ବୁମରା। ଏହି ପ୍ରକ୍ରିୟାରେ ସେ ୪ ଥର ଓଭରଷ୍ଟେପ କରିଥିଲେ। ଫଳରେ ଗୋଟିଏ ଓଭରରେ ବୁମରାଙ୍କୁ ୧୦ ବଲ ପକାଇବାକୁ ପଡ଼ିଥିଲା।
ପ୍ରଥମ ବଲ ଆଣ୍ଡରସନଙ୍କ ହେଲମେଟ୍ରେ ବାଜିଥିଲା। ଏହା ପରେ ମଧ୍ୟ ଭେଟେରାନ ଖେଳାଳିଙ୍କୁ ବାଉନ୍ସର ଓ ଶର୍ଟ ପିଚ୍ ବଲ ପକାଇ ଚାଲିଥିଲେ ବୁମରା। ଫଳରେ କିଛି ବଲ ଆଣ୍ଡରସନଙ୍କ ଦେହରେ ମଧ୍ୟ ବାଜିଥିଲା। ଇଂଲଣ୍ଡର ଅନ୍ତିମ ଉଇକେଟ ପଡ଼ିବା ପରେ ବୁମରାଙ୍କ ସହ କଥା ହୋଇଥିଲେ ଆଣ୍ଡରସନ। ଦୁଇ ଦଳର ପ୍ରମୁଖ ବୋଲରଙ୍କ ମଧ୍ୟରେ ଏଭଳି ପ୍ରତିଯୋଗିତା ପରେ ଚଳିତ ସିରିଜ୍ରୁ ବାଦ୍ ପଡ଼ିଥିବା ଘରୋଇ ଦଳର ପେସର ଷ୍ଟୁଆର୍ଟ ବ୍ରର୍ଡ ଟୁଇଟ୍ କରି ପରୋକ୍ଷ ଭାବେ ଭାରତୀୟ ଦଳକୁ ସମାଲୋଚନା କରିଥିଲେ। ”ଲଡର୍ସ ଟେଷ୍ଟର ଆଜିର ଦିନରେ କ’ଣ ଘଟୁଛି, ତାହାକୁ ମୁଁ ଅପେକ୍ଷା କରିଛି“ ବୋଲି ଲେଖିଛନ୍ତି ବ୍ରଡ।
