ଭୁବନେଶ୍ୱର,୨୨।୧(ବ୍ୟୁରୋ): ଜାତୀୟ ହକି ତାରକାଙ୍କ ସରକାରୀ କ୍ୱାର୍ଟର୍ସରେ କଳାକନା ବୁଲାଇଲେ ଦୁର୍ବୃତ୍ତ। ଭୁବନେଶ୍ୱରର ୟୁନିଟ-୬ ଅଞ୍ଚଳରେ ଥିବା ସରକାରୀ କ୍ୱାର୍ଟର୍ସରେ ରହୁଥିବା ପ୍ରବୋଧ ତିର୍କୀଙ୍କ ଘରୁ ଶୁକ୍ରବାର ବିଳମ୍ବିତ ରାତିରେ ଚୋରି ହୋଇଥିବା ଜଣାପଡ଼ିଛି।
ଦୁର୍ବୃତ୍ତମାନେ କ୍ୱାର୍ଟର୍ସରେ ଥିବା ପ୍ରବୋଧଙ୍କ ଟିଭି, କମ୍ପ୍ୟୁଟର, ପଦକ ଏବଂ ଅଳଙ୍କାର ଆଦି ଲୁଟି ନେଇଛନ୍ତି। ଏ ସମ୍ପର୍କରେ ଜାଣିବା ପରେ ସେ କ୍ୟାପିଟାଲ ଥାନାରେ ଅଭିଯୋଗ କରିଛନ୍ତି। କମିଶନରେଟ ପୋଲିସ ବିଭିନ୍ନ ଦିଗରୁ ଘଟଣାର ତଦନ୍ତ ଚଳାଇଥିବା ବେଳେ ଏଯାବତ ଅଭିଯୁକ୍ତଙ୍କ ବିଷୟରେ ସୁରାକ ପାଇନାହିଁ।
ସୂଚନାନୁଯାୟୀ, ଉକ୍ତ କ୍ୱାର୍ଟର୍ସରେ ପ୍ରବୋଧ ପରିବାରଲୋକଙ୍କ ସହ ରହୁଥିଲେ। ହେଲେ ଏବେ ବିଶ୍ୱ କପ୍ ହକି ଚାଲିଥିବାରୁ ପ୍ରବୋଧ ରାଉରକେଲାରେ ଅଛନ୍ତି। ତାଙ୍କ ପରିବାରଲୋକେ ମଧ୍ୟ ଗାଁକୁ ପଳାଇ ଯାଇଛନ୍ତି। ଏଣୁ କ୍ୱାର୍ଟର୍ସରେ କେହି ରହୁ ନ ଥିଲେ। ଏହାର ସୁଯୋଗ ନେଇ ଲୁଟେରା ଏଭଳି କାଣ୍ଡ ଘଟାଇଛନ୍ତି।
ଗୋଟିଏ ପଟେ ରାଜଧାନୀରେ ହକି ମହାକୁମ୍ଭକୁ ନେଇ ବ୍ୟାପକ ପୋଲିସ ମୁତୟନ ହୋଇଛି। ହେଲେ କମିଶନରେଟ ପୋଲିସକୁ ଖୋଲା ଚ୍ୟାଲେଞ୍ଜ ଦେଇ ଦୁର୍ବୃତ୍ତମାନେ କଳାକନା ବୁଲାଇବା ଏବେ ଚର୍ଚ୍ଚାର ବିଷୟ ପାଲଟିଛି।
