ଆବୁଧାବି,୨୩।୧୦: ଚଳିତ ଟି୨୦ ବିଶ୍ୱକପ୍ର ପ୍ରଥମ ମ୍ୟାଚ୍ରେ ଅଷ୍ଟ୍ରେଲିଆ ୫ ଉଇକେଟରେ ଦକ୍ଷିଣ ଆଫ୍ରିକାକୁ ହରାଇ ଦେଇଛି। ଲୋ ସ୍କୋରିଂ ମ୍ୟାଚ୍ରେ ପ୍ରଥମେ ବ୍ୟାଟିଂ କରି ୧୧୮ ରନ୍ କରିଥିଲା ଦକ୍ଷିଣ ଆଫ୍ରିକା। ଲାଗୁଥିଲା ଅଷ୍ଟ୍ରେଲିଆ ସହଜରେ ମ୍ୟାଚ୍ ଜିତି ନେବ। କିନ୍ତୁ ତାହା କରେଇ ଦେଇ ନ ଥିଲେ ପ୍ରତିପକ୍ଷ ବୋଲର କାଗିସୋ ରବାଡା, ଅନରିଚ ନର୍ଟଜେ (୨ ଉଇକେଟ) ଓ କେଶବ ମହାରାଜ। ଏମାନେ କ୍ରମାଗତ ବ୍ୟବଧାନରେ ଉଇକେଟ ନେବାରୁ ଅଷ୍ଟ୍ରେଲିଆକୁ ଜିତିବା ପାଇଁ ଶେଷ ଓଭର ପର୍ଯ୍ୟନ୍ତ ସଂଘର୍ଷ କରିବାକୁ ପଡ଼ିଥିଲା। ଶେଷରେ ୧୯.୪ ଓଭରରେ ୫ ଉଇକେଟ ହରାଇ ଅଷ୍ଟ୍ରେଲିଆ ବିଜୟ ଲକ୍ଷ୍ୟ ହାସଲ କରି ନେଇଛି। ଦଳ ପାଇଁ ଷ୍ଟିଭ ସ୍ମିଥ ୩୫ ଓ ମାର୍କସ ଷ୍ଟୋଇନିସ ୨୪* ରନ୍ କରିଥିଲେ।
ପୂର୍ବରୁ ଦକ୍ଷିଣ ଆଫ୍ରିକା ଆରମ୍ଭରୁ ବ୍ୟାଟିଂ ବିପର୍ଯ୍ୟୟ ସମ୍ମୁଖୀନ ହୋଇଥିଲା। ଏପରି କି ପାଓ୍ବର ପ୍ଲେ ମଧ୍ୟରେ ଦଳ ୩ ଉଇକେଟ ହରାଇ ସାରିଥିଲା। ଦଳର ୫ ଜଣ ବ୍ୟାଟର ଦୁଇ ଅଙ୍କ ସ୍କୋର ଛୁଇଁଥିଲେ, ହେଲେ କେହି ବଡ଼ ସ୍କୋର କରି ପାରି ନ ଥିଲେ। ଫଳରେ ଦକ୍ଷିଣ ଆଫ୍ରିକା ୨୦ ଓଭରରେ ୯ ଉଇକେଟ ହରାଇ ୧୧୮ ରନ୍ କରିଥିଲା।
