ଭବାନୀପାଟଣା,୨୩ା୧୦(ସ୍ବ.ପ୍ର): କଳାହାଣ୍ଡି ଜିଲା କେଗାଁ ଥାନା ମହାଲିଙ୍ଗ ଘରୋଇ ସ୍କୁଲ ଅଧ୍ୟକ୍ଷା ମମିତା ମେହେର ହତ୍ୟା ଘଟଣାର ମୁଖ୍ୟ ଅଭିଯୁକ୍ତ କୁହାଯାଉଥିବା ଗୋବିନ୍ଦ ସାହୁ ଏବେ ପୋଲିସ କବଜାରେ ରହିଛନ୍ତି। ଗୋବିନ୍ଦ ଶୁକ୍ରବାର ହତ୍ୟା ଘଟଣାର ସିନ୍ ରିକ୍ରିଏଶନ କରିଥିଲେ । ଏହାର ଭିଡିଓ ଏବେ ଭାଇରାଲ ହେଉଥିବା ବେଳେ ଏହି ଘଟଣାକୁ ନେଇ ଏବେ ବି ବହୁ ଅସମାହିତ ପ୍ରଶ୍ନ ଉପରୁ ପରଦା ଉଠି ପାରିନାହିଁ । ଏପରି ସମୟରେ ଚର୍ଚ୍ଚାକୁ ଆସିଛି ରୁମ୍ ନଂ-୨୦।
ସ୍କୁଲ ପରିସରରେ ଥିବା କଲେଜର ଯୁକ୍ତ ୩ ଲେଡିଜ୍ ହଷ୍ଟେଲର ସବୁ ରୁମରେ ଗୋଟିଏ ପ୍ରକାର ତାଲା ପଡ଼ିଥିବା ବେଳେ ରୁମ୍ ନଂ ୨୦ରେ ପଡ଼ିଛି ଭିନ୍ନ ତାଲା। କ’ଣ ପାଇଁ ଏହି ରୁମରେ ଅଲଗା ତାଲା ପଡ଼ିଛି, କିଏ କରିଛି ଏପରି କାମ, କ’ଣ ରହିଛି ଏଥିରେ ଗୁମର ଏହାକୁ ନେଇ ଏବେ ଦେଖାଦେଇଛି ସସପେନ୍ସ। ମମିତା ମର୍ଡର ମିଷ୍ଟ୍ରିର ତଦନ୍ତ କରୁ କରୁ ବଲାଙ୍ଗୀର ପୋଲିସ କଳାହାଣ୍ଡି ଜିଲା ମହାଲିଙ୍ଗ କଲେଜର ଯୁକ୍ତ ୩ ଲେଡିଜ୍ ହଷ୍ଟେଲରେ ପହଞ୍ଚିଥିଲା। ମାତ୍ର ସେଠାରେ ରୁମ୍ ନଂ-୨୦ରେ ଏକ ଅଲଗା ତାଲା ପଡିଥିବା ବେଳେ ତାହାର ଚାବି ପାଇ ନ ଥିଲା ପୋଲିସ। ଏପରି କି ୱାଡେନ ବି ଏ ସମ୍ପର୍କରେ ପୋଲିସକୁ ସନ୍ତୋଷଜନକ ଉତ୍ତର ଦେଇ ନ ଥିଲେ ।
ଗତ ୮ ତାରିଖରେ ମମିତାଙ୍କୁ ହତ୍ୟା କରାଯାଇଥିଲେ ହେଁ ୧୩ ତାରିଖ ପର୍ଯ୍ୟନ୍ତ ଖୁଲମଖୁଲା ବୁଲିଥିଲେ ଗୋବିନ୍ଦ। ଏହି ସମୟରେ ରୁମ୍ ନଂ-୨୦କୁ ଯାଇ ସେଠାରେ ଥିବା ପ୍ରମାଣ ନଷ୍ଟ କରିଥିବା ଅଭିଯୋଗ ହେଉଛି। ସେଠାରେ ରହୁଥିବା ଅନ୍ତେବାସୀଙ୍କୁ ବଲାଙ୍ଗୀର ପୋଲିସ ବାରମ୍ବାର ପଚରାଉଚରା କରିଥିଲା। ତେଣୁ ମମିତା ମର୍ଡର ମିଷ୍ଟ୍ରି ସହ ରୁମ୍ ନଂ-୨୦ର ଲିଙ୍କ୍ ଥିବା ଚର୍ଚ୍ଚା ହେଉଛି।
