ଭୁବନେଶ୍ୱର,୧୬।୫(ବ୍ୟୁରୋ): ପାକିସ୍ତାନର ଗୋଇନ୍ଦା ସଂସ୍ଥା ଇଣ୍ଟର ସର୍ଭିସେସ୍ ଇଣ୍ଟେଲିଜେନ୍ସ (ଆଇଏସ୍ଆଇ) ଏଜେଣ୍ଟଙ୍କୁ ଓଟିପି ଶେୟାରିଂ ମାମଲାରେ କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ଅଧିକ ତଦନ୍ତ ଜାରି ରଖିଛି। ୩ ଅଭିଯୁକ୍ତ ପଠାଣିସାମନ୍ତ ଲେଙ୍କା, ସରୋଜ କୁମାର ନାୟକ ଓ ସୌମ୍ୟ ପଟ୍ଟନାୟକ ଜେଲରେ ଥିବାବେଳେ ସେମାନଙ୍କୁ ରିମାଣ୍ଡରେ ଆଣି ଜେରା କରିବାକୁ ଯୋଜନା କରିଛି। ତେବେ ଏହା ପୂର୍ବରୁ ମାମଲାର ବିଭିନ୍ନ ଦିଗକୁ ନେଇ ସବୁଆଡ଼ୁ ଏସ୍ଟିଏଫ୍ ତଥ୍ୟ ହାସଲ କରୁଛି। ଓଟିପି ଶେୟାରିଂ କରି ଅଭିଯୁକ୍ତମାନେ ଗୁଗଲ୍ପେ, ଫୋନ୍ପେ, ପେଟିଏମ୍ ଆଦିରୁ ୟୁପିଆଇ (ୟୁନିଫାଏଡ୍ ପେମେଣ୍ଟ୍ସ ଇଣ୍ଟରଫେସ୍) ଜରିଆରେ ଆଇଏସ୍ଆଇ ଏଜେଣ୍ଟଙ୍କଠାରୁ ବିପୁଳ ଟଙ୍କା ପାଉଥିଲେ। ତେଣୁ ୟୁପିଆଇ ଦ୍ୱାରା ଅଭିଯୁକ୍ତମାନଙ୍କୁ କେତେଟଙ୍କା ଓ କେଉଁମାନେ ଦେଇଛନ୍ତି ତାହା ଜାଣିବାକୁ ଏନ୍ପିସିଆଇ (ନ୍ୟାଶନାଲ୍ ପେମେଣ୍ଟ୍ସ କର୍ପୋରେଶନ ଅଫ୍ ଇଣ୍ଡିଆ)କୁ ଚିଠି ଲେଖିଛି ଏସ୍ଟିଏଫ୍। ଅନ୍ୟପକ୍ଷରେ ପଶ୍ଚିମବଙ୍ଗ ଏସ୍ଟିଏଫ୍ ସିଲିଗୁଡ଼ିରୁ ଗତବର୍ଷ ଡିସେମ୍ବରରୁ ଗିରଫ କରିଥିବା ଆଇଏସ୍ଆଇ ଏଜେଣ୍ଟ ଗୁଡୁ କୁମାରଙ୍କ ସହ ପଠାଣିସାମନ୍ତଙ୍କ ଲିଙ୍କ୍ ଥିବା ସନ୍ଦେହ କରି ଏସ୍ଟିଏଫ୍ ଏହି ଦିଗକୁ ନେଇ ମଧ୍ୟ ଅଧିକ ଖୋଳତାଡ଼ କରୁଛି। ଏସ୍ଟିଏଫ୍ ଡିଆଇଜି ଜୟନାରାୟଣ ପଙ୍କଜ କହିଛନ୍ତି, ଏନ୍ପିସିଆଇଠାରୁ ୟୁପିଆଇ ସମ୍ବନ୍ଧୀୟ ତଥ୍ୟ ଆସିବା ପରେ ଟ୍ରାଞ୍ଜାକ୍ସନ୍ ନେଇ ବ୍ୟାଙ୍କଗୁଡ଼ିକୁ ତଥ୍ୟ ମଗାଯିବ। ଏଥିସହ ସେମାନେ ଶେୟାର କରୁଥିବା ଗ୍ରୁପ୍ ଆଦିର ଅଧିକ ଖୋଳତାଡ଼ କରାଯାଉଛି। ଆଇଏସ୍ଆଇ ଏଜେଣ୍ଟ ଗୁଡୁ କୁମାରଙ୍କ ସହ ଏମାନଙ୍କର ଲିଙ୍କ୍ ଅଛି କି ନାହିଁ ତାହାର ତଦନ୍ତ କରାଯାଉଛି। ଅଭିଯୁକ୍ତଙ୍କୁ ୫ ଦିନିଆ ରିମାଣ୍ଡରେ ଆଣିବାକୁ ୨ ଦିନ ଭିତରେ ଆବେଦନ କରାଯିବ। ବ୍ୟାଙ୍କ ଟ୍ରାଞ୍ଜାକ୍ସନର ମୂଳରୁ ଶେଷ ପର୍ଯ୍ୟନ୍ତ ସମସ୍ତ ତଥ୍ୟ ଦେବାକୁ କର୍ତ୍ତୃପକ୍ଷଙ୍କୁ ଚିଠି ଲେଖାଯିବ ବୋଲି ସେ କହିଛନ୍ତି।
ଅଭିଯୁକ୍ତମାନେ ଅନ୍ୟ ନଁାରେ ମୋବାଇଲ ସିମ୍ ଆଣି ବିଭିନ୍ନ ସୋସିଆଲ ମିଡିଆ ଗ୍ରୁପ୍ ଦ୍ୱାରା ଆଇଏସ୍ଆଇ ଏଜେଣ୍ଟଙ୍କୁ ଓଟିପି ଶେୟାର କରି ବିପୁଳ ଟଙ୍କା ପାଉଥିଲେ। ଆଇଏସ୍ଆଇ ଏଜେଣ୍ଟମାନେ ଉକ୍ତ ଓଟିପିକୁ ଆଧାର କରି ହ୍ବାଟ୍ସଆପ୍, ଟେଲିଗ୍ରାମ, ଫେସ୍ବୁକ୍, ଇନ୍ଷ୍ଟାଗ୍ରାମ, ଟୁଇଟର୍ ଆଦି ସୋସିଆଲ ମିଡିଆ, ଆମାଜନ, ଫ୍ଲିପ୍କାର୍ଟ ଭଳି ଶପିଂ ଆପ୍ରେ ଆକାଉଣ୍ଟ ଅପରେଟ୍ କରୁଛନ୍ତି। କିଛିଦିନ ତଳେ ଏଭଳି ଏକ ହ୍ବାଟ୍ସଆପ୍ ଗ୍ରୁପ୍ର ସନ୍ଧାନ ପାଇଥିଲା ଏସ୍ଟିଏଫ୍। ସେଥିରେ ବହୁ ସଦସ୍ୟ ଥିବାବେଳେ ଏସ୍ଟିଏଫ୍ ଉପରୋକ୍ତ ୩ ଅଭିଯୁକ୍ତଙ୍କ ପରିଚୟ ପାଇଥିଲା। ନୟାଗଡ଼ ଜିଲାରୁ ପଠାଣିସାମନ୍ତ, ସରୋଜ ଓ ଯାଜପୁର ଜିଲା ବରୀ ରାମଚନ୍ଦ୍ରପୁରରୁ ସୌମ୍ୟଙ୍କୁ ଶନିବାର ଏସ୍ଟିଏଫ୍ ଗିରଫ କରିଥିଲା।
