ଭୁବନେଶ୍ୱର: ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ର ଆଗାମୀ ସପ୍ତମ ସଂସ୍କରଣ ପାଇଁ ଓଡ଼ିଶା ଏଫ୍ସି ନୂଆ ଅଧିନାୟକ ନିଯୁକ୍ତ କରିଛି। ପୂର୍ବତନ ନ୍ୟୁ କ୍ୟାସେଲ ଡିଫେଣ୍ଡର ତଥା ୩୪ ବର୍ଷୀୟ ଇଂଲଣ୍ଡର ପେସାଦାର ଫୁଟବଲର ଷ୍ଟିଭେନ୍ ଟେଲରଙ୍କୁ ଓଡ଼ିଶା ଏଫ୍ସିର ନେତୃତ୍ୱ ପ୍ରଦାନ କରାଯାଇଛି। ଶନିବାର ଅନୁଷ୍ଠିତ ଟିମ୍ ବୈଠକରେ ଏ ସମ୍ପର୍କରେ ନିଷ୍ପତ୍ତି ନିଆଯାଇଛି। ହେଡ୍ କୋଚ୍ ଷ୍ଟୁଆର୍ଟ ବକ୍ସଟର ଏନେଇ ଆନୁଷ୍ଠାନିକ ଭାବେ ଘୋଷଣା କରିଛନ୍ତି। ଆଗାମୀ ସେସନରେ ଟେଲର ନେତୃତ୍ୱର ପରାକାଷ୍ଠ ପ୍ରତିପାଦନ କରିବେ ଓ ସଫଳ ଅଧିନାୟକ ଭାବେ ଉଭା ହେବେ ବୋଲି ସେ କହିଛନ୍ତି। ଟେଲର ଜଣେ ପ୍ରତିଭାସମ୍ପନ୍ନ ଖେଳାଳି ଓ ତାଙ୍କ ପାଖରେ ନେତୃତ୍ୱ ନେବାର ଦକ୍ଷତା ରହିଛି। ଦଳର ନେତୃତ୍ୱ ନେବା ପାଇଁ ଉତ୍ସାହିତ ଅଛି ବୋଲି ଟେଲର କହିଛନ୍ତି। ଆଗମୀ ସେସନରେ ଦଳ ଭଲ ପ୍ରଦର୍ଶନ କରିବ ବୋଲି ସେ ଆଶାପ୍ରକାଶ କରିଛନ୍ତି। ଦଳଗତ ପ୍ରଦର୍ଶନ ସହ ଆତ୍ମବିଶ୍ୱାସର ସହ ଖେଳିବା ଉପରେ ସେ ଗୁରୁତ୍ୱ ଦେଇଛନ୍ତି। ପ୍ରତ୍ୟେକ ଟ୍ରେନିଂ ସେସନ ଓ ମ୍ୟାଚରୁ ଆମେ ଶିକ୍ଷା ଲାଭ କରି ଆଗକୁ ବଢ଼ିବୁ ବୋଲି ଟେଲର କହିଛନ୍ତି। ଆସନ୍ତା ୨୩ ତାରିଖରେ ହାଇଦ୍ରାବାଦ ଏଫ୍ସି ବିପକ୍ଷରେ ଟେଲର ଓଡ଼ିଶା ଏଫ୍ସି ପାଇଁ ପ୍ରଥମ ମ୍ୟାଚ୍ରେ ନେତୃତ୍ୱ ନେବେ।
