ଭୁବନେଶ୍ୱର,୨୭ା୬(ବ୍ୟୁରୋ): ଜାତୀୟ ଶିକ୍ଷା ନୀତି(ଏନ୍ଇପି)-୨୦୨୨ ନୂତନ ଜ୍ଞାନ କୌଶଳ ଓ ଭାରତୀୟ ସଂସ୍କୃତିକୁ ଆଧାର କରି ପ୍ରସ୍ତୁତ ହୋଇଛି। ଶିକ୍ଷା କ୍ଷେତ୍ରରେ ବିଶ୍ୱସ୍ତରରେ ଯେପରି ଭାରତ ଅନ୍ୟ ଦେଶ ସହ ସମକକ୍ଷ ହୋଇପାରିବ ସେ ନେଇ ଏଥିରେ ବ୍ୟବସ୍ଥା ହୋଇଛି। ଏହାସହ ଧନ୍ଦାମୂଳକ ଶିକ୍ଷା, କୋଡିଂକୁ ଗୁରୁତ୍ୱ ଦିଆଯାଇଛି ବୋଲି ନ୍ୟାଶନାଲ କାଉନସିଲ ଅଫ୍ ଏଜୁକେଶନାଲ ରିସର୍ଚ୍ଚ ଆଣ୍ଡ୍ ଟ୍ରେନିଂ (ଏନ୍ସିଇଆର୍ଟି) ନିର୍ଦ୍ଦେଶକ ପ୍ରଫେସର ଦିନେଶ ପ୍ରସାଦ ସକଲାନି କହିଛନ୍ତି। ଦିନେଶ ପ୍ରସାଦ ରବିବାର ଭୁବନେଶ୍ୱର ଗସ୍ତରେ ଆସିଥିବାବେଳେ ଜାତୀୟ ଶିକ୍ଷା ନୀତି ସମ୍ପର୍କରେ ସୂଚନା ଦେଇ କହିଛନ୍ତି, ଖୁବ୍ଶୀଘ୍ର ଦେଶରେ ଜାତୀୟ ଶିକ୍ଷାନୀତି କାର୍ଯ୍ୟକାରୀ ହେବ। ଏଥିପାଇଁ ପର୍ଯ୍ୟାୟକ୍ରମେ କାର୍ଯ୍ୟ ଚାଲିଛି। ସ୍କୁଲ୍ଗୁଡ଼ିକରେ ସ୍ବତନ୍ତ୍ର ତାଲିମ ସହ ପିଲାଙ୍କୁ ଗୁଣାତ୍ମକ ଶିକ୍ଷା ଦେବାକୁ ଯୋଜନା ହୋଇଛି। ଏନ୍ଇପିରେ ମାତୃଭାଷା ସହ ବହୁ ଭାଷା ଶିକ୍ଷାକୁ ପ୍ରାଥମିକତା ଦିଆଯାଉଛି। ପିଲାମାନେ ନିଜ ମାତୃଭାଷା ଜାଣିବା ସହିତ ଅନ୍ୟାନ୍ୟ ଭାଷା ଜାଣିଲେ ତା’ର ଉନ୍ନତି ହେବ। ପିଲାମାନଙ୍କୁ କେବଳ ପୁସ୍ତକ ପଢ଼ିବା ପାଇଁ ନୁହେଁ, ବରଂ ସବୁକିଛି ବୁଝିପାରୁଥିବା ଭଳି ମଣିଷଟିଏ ଗଢ଼ିବାକୁ ହେବ। ପିଲାଙ୍କୁ ଭଲ ମଣିଷ ଗଢ଼ି ତୋଳିବା ଆମର ଲକ୍ଷ୍ୟ। ଉଚିତ ଶିକ୍ଷା ସହିତ ଭଲ ମଣିଷ ହେଲେ ପିଲାଟି ଯେଉଁ କ୍ଷେତ୍ରକୁ ଯିବ ଭଲ ପ୍ରଦର୍ଶନ କରିବ। ସେହିଭଳି ଘରୋଇ ସ୍କୁଲର ମନମାନିକୁ ରୋକିବାକୁ ଆମକୁ ପ୍ରୟାସ କରିବାକୁ ହେବ। ରାଜ୍ୟର ଏନ୍ସିଇଆର୍ଟି ସହ ସମନ୍ବୟ ରଖି ବହି ପ୍ରସ୍ତୁତିରେ କାମ କରାଯାଉଛି ବୋଲି ସେ କହିଛନ୍ତି।
ସେପଟେ ଘରୋଇ ସ୍କୁଲରେ ଏନ୍ସିଇଆର୍ଟି ବହି ବ୍ୟବହାର ନ କରି ଘରୋଇ ପ୍ରକାଶନ ପୁସ୍ତକ ବ୍ୟବହାର କରାଯିବା ଘଟଣାକୁ ନେଇ ଏନ୍ସିଇଆର୍ଟି ନିର୍ଦ୍ଦେଶକ ଉଦ୍ବେଗ ପ୍ରକାଶ କରିଛନ୍ତି। ସେ କହିଛନ୍ତି, ଏହାକୁ ରୋକିବାକୁ ହେଲେ ଆମ ସମସ୍ତଙ୍କୁ ମିଳିମିଶି କାମ କରିବାକୁ ପଡ଼ିବ। ଏଥିପ୍ରତି ରାଜ୍ୟ ସରକାରଙ୍କୁ ଦୃଢ଼ ପଦକ୍ଷେପ ନେବାକୁ ପଡ଼ିବ ବୋଲି ସେ କହିଛନ୍ତି। ଛାତ୍ରୀଛାତ୍ରଙ୍କ ପାଖରେ ଯେଭଳି ନକଲି ବହି ପହଞ୍ଚତ୍ବନି, ସେ ଦିଗରେ ଧ୍ୟାନ ଦେବାକୁ ହେବ ବୋଲି ଏନ୍ସିଇଆର୍ଟି ନିର୍ଦ୍ଦେଶକ କହିଛନ୍ତି।
ସୂଚନାଯୋଗ୍ୟ, ରାଜ୍ୟରେ ବହୁ ଘରୋଇ ସ୍କୁଲ ପିଲାମାନଙ୍କୁ ଏନ୍ସିଇଆର୍ଟି ପୁସ୍ତକ ବଦଳରେ ଘରୋଇ ପ୍ରକାଶନ ପୁସ୍ତକ ନେବା ପାଇଁ ବାଧ୍ୟ କରୁଛନ୍ତି। ଏପରିକି ବହୁ ସ୍କୁଲରେ ଘରୋଇ ପ୍ରକାଶନ ପୁସ୍ତକ ହିଁ ପଢ଼ାଯାଉଛି। ଆଉ କିଛି ସ୍କୁଲରେ ଉଭୟ ଏନ୍ସିଇଆର୍ଟି ଏବଂ ଅନ୍ୟ ପ୍ରକାଶନ ପୁସ୍ତକ ପିଲାଙ୍କୁ ପଢ଼ାଯାଉଛି। ଏ ନେଇ ବହୁ ଅଭିଭାବକ ଅଭିଯୋଗ କଲେ ମଧ୍ୟ କୌଣସି ସୁଫଳ ମିଳିପାରୁ ନ ଥିବାରୁ କିଛିଦିନ ହେବ ଏହାକୁ ନେଇ ବିବାଦ ଲାଗି ରହିଛି।
