ନୂଆଦିଲ୍ଲୀ, ୧୮।୧: ରିପବ୍ଲିକ୍ ଟିଭି ମୁଖ୍ୟ ସମ୍ପାଦକ ଅର୍ଣ୍ଣବ ଗୋସ୍ବାମୀ ଏବଂ ଟେଲିଭିଜନ ରେଟିଂ ସଂସ୍ଥା ବିଏଆର୍ସିର ପୂର୍ବତନ ସିଇଓ ପାର୍ଥୋ ଦାସଗୁପ୍ତାଙ୍କ ମଧ୍ୟରେ ହୋଇଥିବା ହ୍ବାଟ୍ସଆପ୍ ଚାଟିଂର ସ୍କ୍ରିନ୍ଶଟ୍ ସୋସିଆଲ ମିଡିଆରେ ଲିକ୍ ଘଟଣାକୁ ନେଇ ରାଜନୈତିକ ଝଡ଼ ସୃଷ୍ଟି ହୋଇଛି। କଂଗ୍ରେସ ସମେତ ବିରୋଧୀ ଦଳଗୁଡ଼ିକ ଏହାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି। ଅର୍ଣ୍ଣବଙ୍କ ଚାଟ୍ ଲିକ୍ ଭିତିରି ଷଡ଼ଯନ୍ତ୍ର ଓ ଦେଶର ନିରାପତ୍ତା ସମ୍ପର୍କିତ ତଥ୍ୟ ପ୍ରଘଟ କରିଥିବା ସେମାନେ ଅଭିଯୋଗ କରିଛନ୍ତି। ତେବେ ଭାଜପାର ଚ୍ୟାନେଲଗୁଡ଼ିକ ଏହି ପ୍ରସଙ୍ଗରେ ମୁହଁ ଖୋଲୁନାହାନ୍ତି।
ବାଲାକୋଟ ଏୟାର ଷ୍ଟ୍ରାଇକ୍ର ଦୁଇ ତିନି ଦିନ ପୂର୍ବରୁ ଅର୍ଣ୍ଣବ ଓ ଦାସଗୁପ୍ତାଙ୍କ ମଧ୍ୟରେ ଏ ସମ୍ପର୍କରେ ପୂର୍ବରୁ ସେମାନେ ଚାଟିଂ କରିଥିଲେ ବୋଲି ଜଣାପଡ଼ିଛି। ସେହିପରି ଅନୁଚ୍ଛେଦ ୩୭୦ ଉଚ୍ଛେଦ ସମ୍ପର୍କରେ ଚାଟିଂ ହୋଇଥିଲା। ଏଥିରେ ପିଏମ୍ଓ (ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ) ସମ୍ପର୍କରେ ଏକାଧିକ ଥର ଉଲ୍ଲେଖ କରାଯାଇଥିବାରୁ ବିରୋଧୀ ଦଳ ଏହାର ତଦନ୍ତ ଦାବି କରିଛି। ଟିଆର୍ପି ଦୁର୍ନୀତି ମାମଲାରେ ମୁମ୍ବାଇ ପୋଲିସ ଦାଖଲ କରିଥିବା ୩,୬୦୦ ପୃଷ୍ଠାର ଅତିରିକ୍ତ ଚାର୍ଜଶିଟ୍ରେ ହ୍ବାଟ୍ସଆପ୍ ଚାଟିଂ ସମ୍ପର୍କରେ ଉଲ୍ଲେଖ ରହିଛି। ଘଟଣାର ଯୁଗ୍ମ ସଂସଦୀୟ କମିଟି ଦ୍ୱାରା ତଦନ୍ତ କରିବା ଲାଗି ପୂର୍ବତନ କେନ୍ଦ୍ରମନ୍ତ୍ରୀ ପି. ଚିଦାମ୍ବରମ ଏବଂ କଂଗ୍ରେସ ଏମ୍ପି ମନୀଷ ତିଓ୍ବାରୀ ଆହ୍ବାନ ଦେଇଛନ୍ତି। ନିର୍ଦ୍ଦିଷ୍ଟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଯଦି ସତ୍ୟ ହୋଇଥାଏ, ତେବେ ବାଲାକୋଟ ଏୟାରଷ୍ଟ୍ରାଇକ୍ ଏବଂ ୨୦୧୯ ସାଧାରଣ ନିର୍ବାଚନ ମଧ୍ୟରେ ପ୍ରତ୍ୟକ୍ଷ ସମ୍ପର୍କ ଆଡ଼କୁ ଅଙ୍ଗୁଳି ନିର୍ଦ୍ଦେଶ କରୁଛି। ନିର୍ବାଚନ ଉଦ୍ଦେଶ୍ୟରେ ଜାତୀୟ ନିରାପତ୍ତାକୁ ବିପନ୍ନ କରାଯାଇଥିଲା କି ବୋଲି ତିଓ୍ବାରୀ ଟୁଇଟ୍ କରିବା ସହ ଏହାର ଜେପିସି ତଦନ୍ତ ଆବଶ୍ୟକ ବୋଲି କହିଛନ୍ତି। ଏହି ପ୍ରସଙ୍ଗରେ ଚିଦାମ୍ବରମ୍ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କୁ ଟାର୍ଗେଟ କରିଛନ୍ତି। ଯଦି ବାଲାକୋଟ ଆକ୍ରମଣ ଘଟଣାକୁ ରାଜନାଥଙ୍କ ବନ୍ଧୁ ତଥା ସାମ୍ବାଦିକ ୩ ଦିନ ପୂର୍ବରୁ ଜାଣିଥିବା ଠିକ୍, ତେବେ ସେମାନଙ୍କ ସୂତ୍ର ଏହି ତଥ୍ୟକୁ ପାକିସ୍ତାନ ପାଇଁ କାର୍ଯ୍ୟ କରୁଥିବା ସୂଚନାଦାତାଙ୍କୁ ଯେ ଜଣାଇ ନ ଥିବ ଏହାର କ’ଣ ଗ୍ୟାରେଣ୍ଟି ଅଛି ବୋଲି ଚିଦାମ୍ବରମ୍ ପ୍ରଶ୍ନ କରିଛନ୍ତି।
