ଖଇରା,୬।୬(ଡି.ଏନ.ଏ.) ବାଲେଶ୍ୱର ଜିଲା ଖଇରା ବ୍ଲକ ବର୍ତ୍ତନା ଗ୍ରାମ ପଞ୍ଚାୟତ ଅଧୀନ ପଦୁନା ଅଙ୍ଗନୱାଡି କେନ୍ଦ୍ରରେ କର୍ମୀ ଓ ଲୋକପ୍ରତିନିଧିଙ୍କ ମଧ୍ୟରେ ସମନ୍ବୟ ଅଭାବରୁ ୨୦୧୪ରୁ ଲାଗି ରହିଥିବା ଅଚଳାବସ୍ଥା ଜିଲାପାଳଙ୍କ ହସ୍ତକ୍ଷେପ ପରେ ମଧ୍ୟ ହଟିପାରୁନି। ଯାହାର ପରିଣାମ କେନ୍ଦ୍ରରେ ଗ୍ରାମରୁ ପଢୁଥିବା ଶିଶୁ,ପ୍ରସୂତି ଓ ଗର୍ଭବତୀଙ୍କୁ ଭୋଗିବାକୁ ପଡୁଛି। ସମସ୍ୟାର ସ୍ଥାୟୀ ସମାଧାନ କରି ଅଚଳାବସ୍ଥା ହଟାଇବାକୁ ପଦୁନା ଗ୍ରାମବାସୀ ପ୍ରଶାସନ ନିକଟରେ ଦାବି କରିଛନ୍ତି ା ଜଏଣ୍ଟ ଆକାଉଣ୍ଟରୁ ଅର୍ଥ ଉଠାଣକୁ ନେଇ ୨୦୧୪ରେ କର୍ମୀ ସଂଯୁକ୍ତା ସେଣ୍ଡ ଓ ୱାର୍ଡସଭ୍ୟ ନାରାୟଣ ଚନ୍ଦ୍ର ବେହେରାଙ୍କ ମଧ୍ୟରେ ବିବାଦ ଉଗ୍ରରୁପ ଧାରଣ କରିଥିଲା। ପରେ ତତ୍କାଳୀନ ଜିଲାପାଳ ସୁପରଭାଇଜର ଓ କର୍ମୀଙ୍କ ନାମରେ ଜଏଣ୍ଟ ଆକାଉଣ୍ଟ ଖୋଲିବାକୁ ନିର୍ଦ୍ଦେଶ ଦେଇଥିଲେ। ହେଲେ ପରବର୍ତ୍ତୀ ସମୟରେ ସୁପରଭାଇଜରଙ୍କ ନାମରେ ଏଭଳି ଆକାଉଣ୍ଟ ଖୋଲାକୁ କିଛି ଲୋକପ୍ରତିନିଧି ଓ ଜଣେ ଶିଶୁ ବିକାଶ ପ୍ରକଳ୍ପ ଅଧିକାରିଣୀ ପ୍ରତ୍ୟାହାର କରିନେଇଥିଲେ। କେନ୍ଦ୍ରର ଦାୟିତ୍ୱ ପଡ଼ୋଶୀ ସାନକମାରୀ ଅଙ୍ଗନୱାଡି କେନ୍ଦ୍ରର କର୍ମୀଙ୍କୁ ପ୍ରଦାନ କରାଗଲା, ହେଲେ ୨୦୧୬ରୁ ୨୦୨୨ ମସିହାରେ ୩ବର୍ଷରୁ ୬ବର୍ଷ ପର୍ଯ୍ୟନ୍ତ ପିଲାଙ୍କ ସୁଇଟର ଓ ଜୋତା ପାଇଁ ଆସିଥିବା ଟଙ୍କା ବାଟମାରଣା ହେବା ପରେ ଗ୍ରାମବାସୀଙ୍କ ପକ୍ଷରୁ ଜୋରଦାର ବିରୋଧ ହୋଇଥିଲା ା ପରବର୍ତ୍ତୀ ସମୟରେ ସାନକମାରୀ କେନ୍ଦ୍ରର କର୍ମୀ ଦାୟିତ୍ୱରୁ ଅପସରି ଯାଇଥିଲେ। ପୁନଶ୍ଚ କୋଭିଡ୍ ଯୋଗୁଁ ବନ୍ଦ ପଡ଼ିଥିବା ଅଙ୍ଗନୱାଡି ମାର୍ଚ୍ଚ ମାସରେ ଖୋଲିବା ପରେ ମାର୍ଚ୍ଚ ୧୯ତାରିଖରେ ସମନ୍ନିତ ଶିଶୁ ଓ ମହିଳା ବିକାଶ ଅଧିକାରିଣୀଙ୍କ ଅଧ୍ୟକ୍ଷତାରେ ସମସ୍ୟାର ସମାଧାନ ସହ କେନ୍ଦ୍ର ମାର୍ଚ୍ଚ ୨୮ ତାରିଖରୁ ଖୋଲିବା ସଂକ୍ରାନ୍ତରେ ଆଲୋଚନା କରାଯାଇଥିଲା। ମାତୃ କମିଟି ଓ ଯାଞ୍ଚ କମିଟିକୁ ପୁନର୍ଗଠନ ସହ ସରପଞ୍ଚ ଓ କର୍ମୀଙ୍କ ନାମରେ ଜଏଣ୍ଟ ଆକାଉଣ୍ଟ ଖୋଲିବାକୁ ନିଷ୍ପତ୍ତି ନିଆଯାଇଥିଲା ା ତେବେ ପୂର୍ବରୁ ରନ୍ଧାଖାଦ୍ୟ ଓ ଅନ୍ୟାନ୍ୟ ଖର୍ଚ୍ଚ କରାଯିବା ପରେ ଉଠାଯାଇଥିବା ଅର୍ଥକୁ ଫେରାଇବାକୁ ସ୍ଥାନୀୟ ସରପଞ୍ଚ କହିବା ପରେ ଏହାକୁ ନେଇ ପୁଣି ବିବାଦ ଆରମ୍ଭ ହୋଇଛି ା ଯାହା ଫଳରେ ମାର୍ଚ୍ଚ ୨୮ରୁ ଅଦ୍ୟାବଧି ପଢୁଥିବା ପିଲା,ଗର୍ଭବତୀ ଓ ପ୍ରସୂତିଙ୍କୁ ଖାଦ୍ୟ ମିଳି ପାରିନାହିଁ କି ଜନ୍ମିତ ପିଲାଙ୍କର ଅନ୍ନପ୍ରାସନ୍ନ କାର୍ଯ୍ୟକ୍ରମ ହୋଇ ପାରିନାହିଁ। ଏ ସମ୍ପର୍କରେ ଖଇରା ବ୍ଲକ ଶିଶୁ ଓ ମହିଳା ବିକାଶ ଅଧିକାରିଣୀ ରଞ୍ଜୁରାଣୀ ଦାସଙ୍କୁ ଯୋଗାଯୋଗ କରିବାରେ ସମାଧାନ ପାଇଁ ବୈଠକ ଡାକି ସବୁ ପ୍ରକାର ଉଦ୍ୟମ କରିଥିଲେ ହେଁ ଅଚଳାବସ୍ଥା ହଟୁନାହିଁ। ଏ ସମ୍ପର୍କରେ ସେ ଜିଲାପାଳ ଏବଂ ଜିଲାସ୍ତରୀୟ ବିଭାଗୀୟ ଅଧିକାରିଣୀଙ୍କୁ ଜଣାଇସାରିଥିବା କହିଛନ୍ତି।
