ଖୋର୍ଦ୍ଧା ଅଫିସ,୧୦ା୨: ଭୁବନେଶ୍ୱର ଏୟାରପୋର୍ଟ ଥାନା ପଳାସପଲ୍ଲୀ ଅଞ୍ଚଳରେ ଥିବା ନିଖିଳ ଉକତ୍ଳ ଶାରୀରିକ ଭିନ୍ନକ୍ଷମ କଲ୍ୟାଣ ମହାସଂଘ ତାଲିମ କେନ୍ଦ୍ରରେ ଯୌନ ଶୋଷଣ ଘଟଣା ପଦାକୁ ଆସିବା ପରେ ରାଜ୍ୟରେ ହଇଚଇ ସୃଷ୍ଟି ହୋଇଛି। ଏହି ଘଟଣାର ମୁଖ୍ୟ ଅଭିଯୁକ୍ତ ତଥା ଅନୁଷ୍ଠାନର ସମ୍ପାଦକ ସୁରେଶ ବେହେରାଙ୍କ ସମେତ ୬ଜଣଙ୍କୁ ରବିବାର ଏୟାରପୋର୍ଟ ଥାନା ପୋଲିସ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ଖୋର୍ଦ୍ଧା ଜିଲା ସମାଜ ମଙ୍ଗଳ କାର୍ଯ୍ୟାଳୟରେ ସାମାଜିକ ସୁରକ୍ଷା ଅଧିକାରୀ (ଏସ୍ଏସ୍ଓ) ଭାବେ କାର୍ଯ୍ୟକରୁଥିବା ଚନ୍ଦକା ମେଣ୍ଢାଶାଳ ଅଞ୍ଚଳର ସଂଗ୍ରାମ କେଶରୀ ଦାସ, ତାଲିମ୍ କେନ୍ଦ୍ରର ଦୁଇଜଣ ମହିଳା କର୍ମଚାରୀ କଟକ ସିଡିଏ ଫେଜ୍-୨ରେ ରହୁଥିବା ନୟାଗଡ଼ର ବାସନ୍ତୀ ସାହୁ ଓ ମଞ୍ଚେଶ୍ୱର ଥାନା ଅନ୍ତର୍ଗତ ଜିଜିପି କଲୋନୀର ସଞ୍ଜୁ ଓରଫ ସଂଯୁକ୍ତା ମେହେର, ଖୋର୍ଦ୍ଧା ସଦର ଅଞ୍ଚଳର ଲାଲୁ ଓରଫ ଉମେଶଚନ୍ଦ୍ର ରାଉତରାୟ ଏବଂ କଟକ ନିଆଳି ଅଞ୍ଚଳର ରାକେଶ କୁମାର ଷଡ଼ଙ୍ଗୀ। ଗିରଫ ଅଭିଯୁକ୍ତମାନେ ଏବେ ଜେଲ୍ ହାଜତରେ ଥିବାବେଳେ ଜିଲା ସମାଜ ମଙ୍ଗଳ ଅଧିକାରୀଙ୍କ ରିପୋର୍ଟକୁ ଆଧାର କରି ମଙ୍ଗଳବାର ଜିଲାପାଳ ସନତ୍ ମହାନ୍ତି ଏସ୍ଏସ୍ଓ ଦାସଙ୍କୁ ଚାକିରିରୁ ନିଲମ୍ବନ କରିଛନ୍ତି।
ଅନ୍ୟପଟେ ଅଭିଯୁକ୍ତ ଉମେଶ ଏବଂ ବାସନ୍ତିଙ୍କୁ ରିମାଣ୍ଡରେ ଆଣିବା ଲାଗି କମିଶନରେଟ ପୋଲିସ ଭୁବନେଶ୍ୱର ଏସ୍ଡିଜେଏମଙ୍କ କୋର୍ଟରେ ଆବେଦନ କରିଛି। ଉମେଶ ଏବଂ ବାସନ୍ତୀ ଅନ୍ୟ କେଉଁମାନଙ୍କୁ ଯୁବତୀ ଚାଲାଣ କରୁଥିଲେ, ତାହା ପଚରାଉଚରା ପରେ ଘଟଣା ଜଣାପଡ଼ିବ ବୋଲି ଡିସିପି ଉମାଶଙ୍କର ଦାଶ କହିଛନ୍ତି। ଯୁବତୀଙ୍କୁ ଉପଭୋଗ କରିଥିବା ବାବୁମାନେ ଏବେ ଛାନିଆ ହୋଇପଡିଛନ୍ତି। ଘଟଣା ପଦାରେ ପଡ଼ିବା ଆଶଙ୍କାରେ ବାବୁ ମାନଙ୍କ ନିଦ ଏକପ୍ରକାର ହଜିଯାଇଥିବା ସାଧାରଣରେ ଆଲୋଚନା ହେଉଛି। ତେବେ ଏସ୍ଏସ୍ଓ ବନ୍ଧା ହେବା ପରେ ବହୁ ଗୁମର ତଥ୍ୟ ପଦାକୁ ଆସିଛି। ଏହି ଘଟଣା ପଛରେ ବହୁ ବଡ଼ବଡ଼ିଆଙ୍କ ହାତ ରହିଥିବା ସାଧାରଣରେ ସନ୍ଦେହ ସୃଷ୍ଟି ହୋଇଛି। ଜଣେ ଏସ୍ଏସ୍ଓ ଏଭଳି ଜଘନ୍ୟ କାର୍ଯ୍ୟ କରୁଥିବାବେଳେ କିପରି ଉପରିସ୍ଥ ଅଧିକାରୀମାନେ କିଛି ଜାଣି ପାରୁ ନ ଥିଲେ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏତେବଡ଼ କୋଳଙ୍କାରୀ ପଛରେ କେଉଁ ଅଧିକାରୀମାନଙ୍କ ହାତ ରହିଛି, ତଦନ୍ତ କରାଗଲେ ଜଣାପଡ଼ିବ ବୋଲି ସାଧାରଣରେ ଚର୍ଚ୍ଚା ହେଉଛି। ଘଟଣାର ନିରପେକ୍ଷ ତଦନ୍ତ କରାଗଲେ, ଠିକ୍ ତଥ୍ୟ ସାମନାକୁ ଆସିବ ବୋଲି ମତ ପ୍ରକାଶ ପାଇଛି।
