କଲମ୍ବୋ,୧୮ ।୫: ଶ୍ରୀଲଙ୍କାରେ ହିଂସକ ପ୍ରଦର୍ଶନ ପରେ ସେଠାରେ ଏବେ ନୂଆ ସରକାର ଗଠନ ସରିଛି । ହେଲେ ଆର୍ଥିକସ୍ଥିତି ପୂର୍ବାପେକ୍ଷା ଆହୁରି ଖରାପ ହେବାରେ ଲାଗିଛି । ଏହି ଅର୍ଥ ବ୍ୟବସ୍ଥାକୁ ପୂର୍ବ ସ୍ଥିତିକୁ ଫେରାଇ ଆଣିବାକୁ ନୂଆ ସରକାର କିଛି ଯୋଜନା ପ୍ରସ୍ତୁତ କରିଥିବା ଜଣାପଡିଛି । ଏଥିରେ ନୂଆ କରେନ୍ସି ଛାପିବା ଓ ଏୟାର ଲାଇନ୍ସକୁ ବିକ୍ରି କରିବାକୁ ଯୋଜନା ଥିବା କୁହାଯାଉଛି ।
ସୂଚନାଯୋଗ୍ୟ, ଶ୍ରୀଲଙ୍କା ସରକାରଙ୍କ ପାଖରେ ସରକାରୀ କର୍ମଚାରୀଙ୍କୁ ଦରମା ଦେବାକୁ ବି ଅର୍ଥ କମ୍ ପଡିଥିବା ଜଣାପଡିଛି । ସେଥିପାଇଁ ନୂଆ କରେନ୍ସି ଛାପିବାର ଯୋଜନା କରାଯାଉଛି । ଏହାସହ ସରକାରୀ ଏୟାରଲାଇନ୍ସକୁ ବି ବିକ୍ରି କରିବାର ଯୋଜନା କରାଯାଉଛି । ଏହାପୂର୍ବରୁ ପ୍ରଧାନମନ୍ତ୍ରୀ ରାନିଲ ବିକ୍ରମାସିଂଘେ କହିଥିଲେ ସରକାର ଶ୍ରୀଲଙ୍କା ଏୟାର ଲାଇନ୍ସକୁ ଘରୋଇ କରଣକରିବାକୁ ଯାଉଛନ୍ତି । କାରଣ ଏଥିରେ ବହୁତ କ୍ଷତି ହେଉଛି । ଯାହା ଦେଶର ଆର୍ଥିକ ସଙ୍କଟ ଉପରେ ବି ପ୍ରଭାବ ପକାଉଛି । ତେବେ ଏହି ଆର୍ଥିକ ସ୍ଥିତି ସୁଧୁରିବା ପୁର୍ବରୁ ଏହା ଆହୁରି ଖରାପ ହେବ ବୋଲି ବି ପ୍ରଧାନମନ୍ତ୍ରୀ ପୂର୍ବରୁ ସୂଚନା ଦେଇସାରିଛନ୍ତି ।
