କଲମ୍ବୋ,୧୦।୧ : ଶ୍ରୀଲଙ୍କାରେ ଆର୍ଥିକ ସଙ୍କଟ ଘନେଇବାରେ ଲାଗିଛି। ଉତିମଧ୍ୟରେ ସମସ୍ତ ମନ୍ତ୍ରଣାଳୟକୁ ଶ୍ରୀଲଙ୍କା ରାଷ୍ଟ୍ରପତି ରାନିଲ ୱିକ୍ରମସିଙ୍ଘେ ଏକ ବିଶେଷ ନିର୍ଦ୍ଦେଶ ଦେଇଛନ୍ତି। ସେହି ଅନୁଯାୟୀ, ଚଳିତ ବର୍ଷର ବଜେଟରେ ସେମାନଙ୍କୁ ଦିଆଯାଇଥିବା ଆନୁମାନିକ ଖର୍ଚ୍ଚକୁ ପାଞ୍ଚ ପ୍ରତିଶତ ହ୍ରାସ କରିବାକୁ ନିର୍ଦ୍ଦେଶ ଦିଆଯାଇଛି। ଫଳରେ ଶ୍ରୀଲଙ୍କାର ଆର୍ଥିକ ସଙ୍କଟ ଆହୁରି ଗୁରୁତର ହୋଇଛି। ନଗଦ ଅର୍ଥରାଶି ଦେଶର ଆର୍ଥିକ ସଙ୍କଟ ପୂର୍ବ ଆକଳନଠାରୁ ବହୁ ଅଧିକ ରହିଛି।
ଏହାପୂର୍ବରୁ ବୈଦେଶିକ ମୁଦ୍ରା ସଙ୍କଟ ଯୋଗୁ ଶ୍ରୀଲଙ୍କା ଗତ ବର୍ଷ ଏପ୍ରିଲରେ ଅନ୍ତର୍ଜାତୀୟ ଋଣ କ୍ଷେତ୍ରରେ ଡିଫଲ୍ଟର ଘୋଷଣା କରିଥିଲା। ଏହି ସମୟରେ କ୍ୟାବିନେଟ ମୁଖପାତ୍ର ତଥା ପରିବହନ ମନ୍ତ୍ରୀ ବାନ୍ଦୁଲା ଗୁନାୱାର୍ଡେନ କହିଛନ୍ତି ଯେ ରାଷ୍ଟ୍ରପତି ୱିକ୍ରମସିଙ୍ଘେ କ୍ୟାବିନେଟକୁ ସୂଚନା ଦେଇଛନ୍ତି ଯେ ସରକାରୀ ପାଣ୍ଠି ଯଥେଷ୍ଟ ହ୍ରାସ ପାଇଛି।
ଗୁନାୱାର୍ଡେନ କହିଛନ୍ତି ଯେ ୨୦୨୩ ର ପ୍ରଥମ କିଛି ମାସରେ ଟିକସ ମାଧ୍ୟମରେ ଅନେକ କିଛି ରୋଜଗାର ହୋଇପାରିଥାନ୍ତା, କିନ୍ତୁ ଗତ ବର୍ଷ ଠାରୁ ଜାରି ରହିଥିବା ଅଥନୈତିକ ସଙ୍କଟ ଯୋଗୁଁ ଏଥିରେ ବହୁତ ହ୍ରାସ ଘଟିଛି। ଆମେ ଆଶା କରିଥିବା ଅପେକ୍ଷା ଆର୍ଥିକ ସଙ୍କଟ ଅଧିକ ଗମ୍ଭୀର ହେବାରେ ଲାଗିଛି। ୨୦୨୩ ବଜେଟରେ ବିଭିନ୍ନ ମନ୍ତ୍ରଣାଳୟ ଦେଇଥିବା ପ୍ରସ୍ତାବକୁ ପାଞ୍ଚ ପ୍ରତିଶତ ହ୍ରାସ କରିବାକୁ ରାଷ୍ଟ୍ରପତି ସୋମବାର କ୍ୟାବିନେଟକୁ ନିର୍ଦ୍ଦେଶ ଦେଇଛନ୍ତି। ଫଳରେ ଜାନୁଆରୀ ଏବଂ ଫେବୃଆରୀରେ ସରକାରୀ କର୍ମଚାରୀଙ୍କ ଦରମା ପ୍ରଦାନ ନେଇ ଅନିଶ୍ଚିତତା ଦେଖାଦେଇଛି।
