ନୂଆଦିଲ୍ଲୀ,୨୦।୨: ଆଇପିଏଲ୍ ୧୪ ଲାଗି ଆୟୋଜିତ ଖେଳାଳି ନିଲାମୀ ପ୍ରକ୍ରିୟାରେ ଅନେକ ଖେଳାଳି ବିକ୍ରି ହୋଇଛନ୍ତି। କିଛି କୋଟି କୋଟି ଟଙ୍କା ରୋଜଗାର କରିଥିବା ବେଳେ କିଛି ଲକ୍ଷାଧିକ ଟଙ୍କା କମାଇଥିଲେ। ହେଲେ କିଛି ଖେଳାଳି ଏଭଳି ଥିଲେ ଯେଉଁମାନେ ନାମାଙ୍କନ କରିଥିଲେ ହେଁ ନିଲାମୀରେ ଭାଗ ନେଇପାରି ନ ଥିଲେ। ସେଥିରୁ ଜଣେ ହେଲେ ଭାରତୀୟ ବୋଲର୍ ଏସ୍.ଶ୍ରୀସନ୍ତ। ଶୁକ୍ରବାର ରାତିରେ ଅଚାନକ ସୋସିଆଲ ମିଡିଆରେ ସେ ଟ୍ରେଣ୍ଡ ହେବାକୁ ଲାଗିଥିଲେ। ପ୍ରଶଂସକମାନେ ଶ୍ରୀସନ୍ତଙ୍କୁ ଆଇପିଏଲ୍ରେ ନିଆଯାଉ ବୋଲି ଦାବି କରିଥିଲେ।
ଏହା ପୂର୍ବରୁ ଅଭିନେତ୍ରୀ ପ୍ରୀତି ଜିଣ୍ଟା ନିଲାମୀ ପୂର୍ବରୁ ଇନ୍ଷ୍ଟାଗ୍ରାମରେ ଏକ ଫଟୋ ପୋଷ୍ଟ କରି କେଉଁ ଖେଳାଳିଙ୍କୁ ଦଳରେ ନେବା ଉଚିତ ସେନେଇ ପରାମର୍ଶ ଦେବାକୁ କହିଥିଲେ। ଏହାର ଜବାବରେ ଶ୍ରୀସନ୍ତ ତିନୋଟି ଉତ୍ତର ଦେଇଥିଲେ। ପ୍ରଥମେ ନିଜର ନାମ ଦଳରେ ସାମିଲ କରିବାକୁ କହିଥିଲେ। ପରେ ନିଲାମୀରେ ନ ଥିବାରୁ ବିନା ମୂଲ୍ୟରେ ଦଳରେ ସାମିଲ କରିପାରିବେ ବୋଲି କହିଥିଲେ। ଶେଷ ତଥା ଅନ୍ତିମ ଜବାବରେ ସେ ଅଲ୍ ଦ ବେଷ୍ଟ। ଖୁସିରେ ରୁହନ୍ତୁ। ଭଗବାନଙ୍କ ଆଶୀର୍ବାଦ ଆପଣ ସମସ୍ତଙ୍କ ଉପରେ ରହୁ ବୋଲି କହିଥିଲେ।
ଏହି ଘଟଣା ପରେ ଟୁଇଟରରେ ‘ଶ୍ରୀସନ୍ତ ଫର ଆଇପିଏଲ୍’ ଟ୍ରେଣ୍ଡ କରିଥିଲା। ଯଦି ଅର୍ଜୁନ ତେନ୍ଦୁଲକରଙ୍କୁ ସାମିଲ କରାଯାଇପାରୁଛି ତେବେ ଶ୍ରୀସନ୍ତଙ୍କୁ କାହିଁକି ନୁହେଁ ବୋଲି ପ୍ରଶଂସକ କହିଥିଲେ।
