ଭଞ୍ଜନଗର,୧୮ା୬(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡ ଅନ୍ତର୍ଗତ ଜଗନ୍ନାଥପ୍ରସାଦ ରେଞ୍ଜକୁ ଗୋଟିଏ ପରେ ଗୋଟିଏ ବିପଦ ଗୋଡ଼ାଉଛ। ଦୁଇଦିନ ପୂର୍ବେ ରେଞ୍ଜ କାର୍ଯ୍ୟାଳୟକୁ ବୋମାମାଡ଼ ହୋଇଥିଲା। ଏହି ଘଟଣାର ପ୍ରକୃତ ରହସ୍ୟ ବର୍ତ୍ତମାନ ପର୍ଯ୍ୟନ୍ତ ଜଣାପଡ଼ିନାହିଁ। ମଙ୍ଗଳବାର ସନ୍ଧ୍ୟାରେ ସାଇଣ୍ଟିଫିକ ଟିମ୍ ଆସି ଘଟଣାର ତଦନ୍ତ କରି ଫେରିଯାଇଛି। ଅନ୍ୟପଟେ ଉକ୍ତ ରେଞ୍ଜର ବନ ସୁରକ୍ଷା ସମିତି କର୍ମକର୍ତ୍ତାମାନେ ବିଭାଗୀୟ କର୍ମଚାରୀଙ୍କ ବିରୋଧରେ ଅସନ୍ତୋଷ ବ୍ୟକ୍ତ କରୁଛନ୍ତି। ତେଣୁ ସେମାନେ ଆଜକୁ କିଛିଦିନ ହେବ ବିଭାଗ ବିରୋଧରେ ମେଳି ବାନ୍ଧିଛନ୍ତି। ସେହିଭଳି ଓଡ଼ିଶା ଅଣ ଗେଜେଟେଡ୍ ବନସେବା ସଂଘ ଅଧୀନରେ ଆସୁଥିବା ବନପାଳ, ବନରକ୍ଷୀମାନେ ମଧ୍ୟ ଗତ ରବିବାର ଠାରୁ ୩ ଦଫା ଦାବି ନେଇ କଳାବ୍ୟାଜ୍ ପିନ୍ଧିବା ସହ ନୂଆ କେସ୍ ନ କାଟିବା ପାଇଁ ନିଷ୍ପତ୍ତି ନେଇଛନ୍ତି। ଏହାର ସୁଯୋଗ ନେଇ ଉକ୍ତ ରେଞ୍ଜରେ କାଠ ଚୋରି ଏବଂ ବନ୍ୟପ୍ରାଣୀ ଶିକାର ବଢ଼ିଯାଇଛି। ଯାହାକି ବିଭାଗ ପାଇଁ ସମସ୍ୟା ଆଣୁଛି।
କଥାରେ ଅଛି ଯେ ପାଞ୍ଚେ ପର ମନ୍ଦ, ତା’ ମନ୍ଦ ପାଞ୍ଚନ୍ତି ଗୋବିନ୍ଦ। ଅର୍ଥାତ୍ ଶିକାର କରିବାକୁ ବିଦ୍ୟୁତ୍ତାର ବିଛାଇ ଥିବାବେଳେ ବିଦ୍ୟୁତ୍ତାରରେ ଲାଗି ଜଣେ ଶିକାରୀ ମୃତ୍ୟୁବରଣ କରିଛନ୍ତି। ମଙ୍ଗଳବାର ରାତିରେ ଜଗନ୍ନାଥପ୍ରସାଦ ରେଞ୍ଜରେ ଶିକାର ପାଇଁ ବିଛା ହୋଇଥିବା ବିଦ୍ୟୁତ୍ତାରରେ ଜଗନ୍ନାଥପ୍ରସାଦ ବ୍ଲକ କୁଡୁତାଇ ପଞ୍ଚାୟତ ଚାଞ୍ଚରାପଲ୍ଲୀର ସୁରଥ ପ୍ରଧାନ (୪୫)ଲାଗି ମୃତ୍ୟୁ ଘଟିଛି।। ଏହି ଘଟଣା ବୁଧବାର ସକାଳେ ଜଣାପଡ଼ିବା ବନ ବିଭାଗ କର୍ମଚାରୀ କିମ୍ବା ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଚଳାଇଛି। ଏହି ଘଟଣାକୁ ନେଇ ସମ୍ପୁକ୍ତ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି।
ଲୋକଙ୍କ ସୁତ୍ରରୁ ପ୍ରକାଶ ଯେ, ସୁରଥ ଗତକାଲି ରାତିରେ ବିଲମାଳ ଆଡ଼େ କୌଣସି କାମରେ ଯାଇଥିଲେ। ରାତିରେ ବିଲମାଳର ଏକ ଲଟା ବୁଦା ଅଞ୍ଚଳରେ ଶିକାର ପାଇଁ ବିଦ୍ୟୁତ୍ତାର ବିଛା ହୋଇଥିଲା। ଉକ୍ତ ତାରରେ ଲାଗି ସୁରଥଙ୍କ ମୃତ୍ୟୁ ଘଟିଛି। ଏହି ଘଟଣା ଆଜି ସକାଳେ ଜଣାପଡ଼ିଛି।
ଅପରପକ୍ଷରେ ଡିଏଫ୍ଓ ହିମାଂଶୁ ଶେଖର ମହାନ୍ତିଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି ଯେ, ଗତକାଲି ରାତିରେ ୩ ଜଣ ଶିକାର କରିବାକୁ ବିଲମାଳକୁ ଯାଇଥିଲେ। ତେଣୁ ସେମାନେ ବିଦ୍ୟୁତ୍ତାର ବିଛାଇଥିଲେ। ଏହି ସମୟରେ ସେମାନଙ୍କ ମଧ୍ୟରୁ ଜଣେ ଉକ୍ତ ତାରରେ ଲାଗି ମୃତ୍ୟୁବରଣ କରିଛନ୍ତି। ଅନ୍ୟ ଦୁଇଜଣ ଏହି ଘଟଣା ପରେ ଫେରାର ହୋଇଯାଇଛନ୍ତି। ବିଭାଗୀୟ କର୍ମଚାରୀ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଚଳାଇଛନ୍ତି ବୋଲି ଡିଏଫ୍ଓ ମହାନ୍ତି କହିଛନ୍ତି।
