ନୂଆଦିଲ୍ଲୀ,୨୪।୧୦ : ରାଷ୍ଟ୍ରପତି ଶି ଜିନପିଙ୍ଗ ଲଗାତାର ତୃତୀୟ ଥର ପାଇଁ ଚାଇନାରେ କ୍ଷମତା ହାସଲ କରିଛନ୍ତି। ଏହାଦ୍ୱାରା ଭାରତ-ଚାଇନା ସମ୍ପର୍କରେ ତିକ୍ତତା ପୁଣି ବଢ଼ିବାର ଆଶଙ୍କା ପ୍ରକାଶ ପାଇଛି। ବିଶେଷଜ୍ଞମାନେ କହିଛନ୍ତି ଯେ ଜିନପିଙ୍ଗଙ୍କର ଅଭିଳାଷ ହେଉଛି ଦୁଇଦେଶର ସମ୍ପର୍କକୁ ଆଉ ସ୍ବାଭାବିକ ହେବାକୁ ଦିଆଯିବ ନାହିଁ।
ପ୍ରତିରକ୍ଷା ବିଶେଷଜ୍ଞ ଲ୍ୟୁଟନାଟ ଜେନେରାଲ ରାଜେନ୍ଦ୍ର ସିଂଙ୍କ ଅନୁଯାୟୀ ଚାଇନା ବିଶ୍ୱର ଦ୍ୱିତୀୟ ବୃହତ୍ତମ ଅର୍ଥନୀତି ଏବଂ ଜିନପିଙ୍ଗ ଚାହୁଁଛନ୍ତି ତାଙ୍କ ଦେଶ ପ୍ରଥମ ଅର୍ଥନୀତି ହେଉ। ଅପରପକ୍ଷରେ, ଚାଇନା ନିଜକୁ ଏକ ପ୍ରମୁଖ ସାମରିକ ଶକ୍ତି ଭାବରେ ପରିଚୟ ସୃଷ୍ଟି କରିଛି। ତେଣୁ ଏସିଆ ସମେତ ସମଗ୍ର ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ନିଜର ସର୍ବୋଚ୍ଚତା ପ୍ରତିଷ୍ଠା କରିବାକୁ ଚାହୁଁଛନ୍ତି। ଯେତେବେଳେ କି ଭାରତ ଚାଇନା ଯୋଜନା ବାଧା ଦେବାକୁ ଚେଷ୍ଟା କରୁଛି।
ଭାରତର ଅର୍ଥନୀତି ମଧ୍ୟ ଦ୍ରୁତ ଗତିରେ ଆଗକୁ ବଢୁଛି। ତେଣୁ ଚାଇନା ଅନୁଭବ କରୁଛି ଯେ ଭବିଷ୍ୟତରେ ଭାରତ ଏକ ଚ୍ୟାଲେଞ୍ଜ ସୃଷ୍ଟି କରିପାରିବ। ସେହିଭଳି ଭାରତ ମଧ୍ୟ ସାମରିକ ଶକ୍ତି ବୃଦ୍ଧିରେ ଦ୍ରୁତ ଗତି କରୁଛି। ଭାରତ-ପ୍ରଶାନ୍ତ ମହାସାଗରରେ ଭାରତ କ୍ୱାଡ ମାଧ୍ୟମରେ ପ୍ରଧାନନ୍ତ୍ରୀ ନରେନ୍ଦ୍ର ମୋଦି ଚାଇନାକୁ ଘେରିଛନ୍ତି। ତେଣୁ ଭାରତ ଦ୍ୱାରା ଉପସ୍ଥାପିତ ଚ୍ୟାଲେଞ୍ଜଗୁଡ଼ିକ ଚାଇନାକୁ ବ୍ୟଥିତ କରୁଛି।
ରାଜେନ୍ଦ୍ର ସିଂଙ୍କ କହିବାନୁସାରେ, ଗୋଟିଏ ପଟେ ଚାଇନା ଭାରତର ଅଗ୍ରଗତି ପାଇଁ ଭୟଭୀତ ଏବଂ ଅନ୍ୟପଟେ ଏହା ମଧ୍ୟ ଭାରତର ବିଶାଳ ବଜାର ଆବଶ୍ୟକ କରେ। ତେଣୁ ସେ ଭାରତ ସହିତ ସମ୍ପୂର୍ଣ୍ଣ ଶତ୍ରୁତା ଦେଖାଇବାକୁ ଚାହୁଁନାହିଁ। କିନ୍ତୁ ସେ ଏଲଏସିର ଡୋକଲାମ, ପୂର୍ବ ଲଦାଖ ଅଞ୍ଚଳରେ ଭାରତ ସମ୍ମୁଖରେ ଚ୍ୟାଲେଞ୍ଜ ସୃଷ୍ଟି କରିବାକୁ ଚେଷ୍ଟା କରୁଛି।
ଫଳରେ ଏଲଏସିରେ ଶୀଘ୍ର ସ୍ଥିତିରେ ସୁଧାର ହେବାର ଆଶା କମ୍ ରହିଛି। ଚାଇନାର ନଜର ଭାରତର ରାଜନୈତିକ ପରିସ୍ଥିତି, ଅର୍ଥନୈତିକ ପ୍ରଗତି ଏବଂ ସେନାର ଶକ୍ତି ପରି ପଦକ୍ଷେପ ଉପରେ ରହିଛି। ତେଣୁ ଏହି କ୍ଷେତ୍ରରେ ଭାରତକୁ ଅଧିକ ଶକ୍ତିଶାଳୀ ହେବାକୁ ପଡିବ। ଜିନପିଙ୍ଗଙ୍କ ତୃତୀୟ କାର୍ଯ୍ୟକାଳରେ ଏକ ଆହ୍ବାନ ହେଉଛି ଏଥର ତାଙ୍କ ଦଳରେ ବଡ଼ ପରିବର୍ତ୍ତନ କରାଯାଇଛି। ଦଳରେ ନୂତନ ଲୋକଙ୍କୁ ଯୋଡି ଦିଆଯାଇଛି। ସେମାନଙ୍କ ମଧ୍ୟରୁ ଅଧିକାଂଶ ଜିନପିଙ୍ଗଙ୍କ ସମର୍ଥକ। ତେଣୁ ଭାରତ ପ୍ରତି ସେମାନଙ୍କର ମନୋଭାବ କ’ଣ ତାହା ଦେଖିବା କଷ୍ଟକର ହେବ।
