ପ୍ୟାରିସ: ମଙ୍ଗଳ ଗ୍ରହରେ ପ୍ରଥମ ଥର ପାଇଁ ଏକ ଧୂଳିଝଡ଼ର ଶବ୍ଦ ରେକର୍ଡ କରାଯାଇଛି। ଆମେରିକାର ମହାକାଶ ଗବେଷଣା ସଂସ୍ଥା ନାସା ପକ୍ଷରୁ ପଠାଯାଇଥିବା ପର୍ସେଭେରେନ୍ସ ରୋଭର୍ର ଉପର ଭାଗ ଦେଇ ଧୂଳିଝଡ଼ ଅତିକ୍ରମ କରୁଥିବାବେଳେ ତହିଁରୁ ସୃଷ୍ଟ ଶବ୍ଦକୁ ମାଇକ୍ରୋ ଫୋନ୍ କଏଦ କରିଥିଲା। ଲାଲ୍ ଗ୍ରହରେ ପାଣିପାଗ ଓ ଜଳବାୟୁ ସମ୍ପର୍କରେ ଅଧିକ ତଥ୍ୟ ହାସଲ ଦିଗରେ ଏହି ରେକର୍ଡିଂ ବିଶେଷ ସହାୟକ ହେବ। ମଙ୍ଗଳ ପୃଷ୍ଠରେ ଏକଦା ଜୀବସତ୍ତା ଥିବାନେଇ ଧାରଣାକୁ ଏହା ବଳ ଦେବ ବୋଲି ଗବେଷଣାର ନେତୃତ୍ୱ ନେଇଥିବ ନାଓମି ମୁରଡୋଚ୍ କହିଛନ୍ତି।
ପୃଷ୍ଠ ଓ ବାୟୁ ତାପମାତ୍ରା ମଧ୍ୟରେ ବଡ଼ ବ୍ୟବଧାନ ସୃଷ୍ଟି ହେଲେ ଏଭଳି ଧୂଳିପୂର୍ଣ୍ଣ ଝଡ଼ ଦେଖାଦିଏ। ୨୦୨୧ ଫେବୃୟାରୀରୁ ପର୍ସେଭେରେନ୍ସ ରୋଭର୍ କାର୍ଯ୍ୟକ୍ଷମ ଥିବା ସତ୍ତ୍ୱେ କେବେ କୌଣସି ଶବ୍ଦ ରେକର୍ଡ କରିପାରି ନ ଥିଲା। ୨୦୨୧ ସେପ୍ଟେମ୍ବର ୨୭ରେ ଆକସ୍ମିକ ଭାବେ ୧୧୮ ମିଟର ଉଚ୍ଚତା ବିଶିଷ୍ଟ ଏକ ଧୂଳିଝଡ଼ ଏହା ଉପର ଦେଇ ଗତି କରିଥିଲା। ଏଥର ରୋଭର୍ର ସୁପରକ୍ୟାମ୍ ଧୂଳି ଝଡ଼ର ‘ଟକ୍ ଟକ୍ ଟକ୍’ ଶବ୍ଦକୁ ସାଉଁଟି ସାଇତି ରଖିଛି। ଧୂଳି ଝଡ଼ର ଢାଞ୍ଚା ଓ ବ୍ୟବହାର ସମ୍ପର୍କରେ ଅଧ୍ୟୟନ ପାଇଁ ଆବଶ୍ୟକ କଣିକାର ସଂଖ୍ୟା ଗଣନାରେ ଗବେଷକମାନଙ୍କ କାମରେ ଏହା ଆସିବ।
