ଭୁବନେଶ୍ୱର,୧୬।୭: ଥମୁନି ବାଲେଶ୍ୱର ଜିଲା ଏଫ୍ଏମ୍ କଲେଜ ଛାତ୍ରୀ ସୌମ୍ୟାଶ୍ରୀ ଆତ୍ମାହୁତିର ନିଆଁ। ସାରା ରାଜ୍ୟରେ ଏହି ଘଟଣାକୁ ନେଇ ହଇଚଇ ସୃଷ୍ଟି ହୋଇଥିବା ବେଳେ ବିରୋଧୀମାନେ ବନ୍ଦ ଡ଼ାକରା ଦେଇଛନ୍ତି। ଏସବୁ ମଧ୍ୟରେ ବଡ଼ ବୟାନ ଦେଇଛନ୍ତି ମୃତା ଛାତ୍ରୀଙ୍କ ବାପା। ସୌମ୍ୟାଶ୍ରୀ ଆତ୍ମାହୁତି କରିନାହାନ୍ତି, ବରଂ ତାଙ୍କୁ ହତ୍ୟା କରାଯାଇଛି। ସମସ୍ତେ ମିଶି ତାଙ୍କୁ ମରିବା ପାଇଁ ବାଧ୍ୟ କରିଛନ୍ତି ବୋଲି ସାଂଘାତିକ ଅଭିଯୋଗ କରିଛନ୍ତି ମୃତ ଛାତ୍ରୀଙ୍କ ବାପା।
ସୌମ୍ୟାଶ୍ରୀଙ୍କ ବାପା କହିଛନ୍ତି, ଘଟଣା ଦିନ ପ୍ରିନ୍ସିପାଲ ରୁମରେ କିଛି ନିହାତି ଘଟିଥିଲା, ଯେଉଁଥିଲାଗି ଝିଅ ଚାମ୍ବରରୁ ବାହାରି ଏମିତି ଘଟଣା ଘଟାଇଥିଲା। ପ୍ରିନ୍ସିିପାଲ କହିଥିଲେ ଯେ ମାମଲାର ତଦନ୍ତ ଆଭ୍ୟନ୍ତରୀଣ ଅଭିଯୋଗ କମିଟି କରୁଛି । ରିପୋର୍ଟ ଆସିବା ପରେ ଆପଣଙ୍କ ସାମ୍ନାରେ ତା’ର ସିଲ ଖୋଲାଯିବ। ତା’ପୂର୍ବରୁ କେମିତି ରିପୋର୍ଟ ଖୁଲାସା ହୋଇଗଲା।ଯଦି ଝିଅର ଆଟେଣ୍ଡାନ୍ସ କମ୍ ଥିଲା, ଅଭିଭାବକ ହିସାବରେ ମୋତେ କାହିଁକି ଅବଗତ କରାଗଲା ନାହିଁ? ପରୀକ୍ଷା ରୋକାଯାଇଥିବା ୯ ପିଲାଙ୍କ ମଧ୍ୟରୁ ପରବର୍ତ୍ତୀ ସମୟରେ ୮ ଜଣଙ୍କୁ ଅନୁମତି ଦିଆଗଲା। କିନ୍ତୁ ମୋ’ ମେଧାବୀ ଝିଅ କି ଦୋଷ କରିଥିଲା ଯେ, ପରୀକ୍ଷା ପାଇଁ ଅନୁମତି ଦିଆଗଲା ନାହିଁ ? HOD ସମୀର ସାହୁଙ୍କ ପୂର୍ବ ରେକର୍ଡ ବି ଖରାପ ରହିଛି। ସେ କଲେଜରେ ରାକେଟ୍ ଚଲାଉଥିଲେ ବୋଲି ଛାତ୍ରୀଙ୍କ ବାପା କହିଛନ୍ତି।
ସୂଚନାଯୋଗ୍ୟ ସୌମ୍ୟଶ୍ରୀ ବିଶୀ, ଜଣେ ବି.ଏଡ୍ ଛାତ୍ରୀ, ଜୁଲାଇ ୧୨ରେ କଲେଜ ପରିସରରେ ଆତ୍ମାହୁତି ଦେବାକୁ ଚେଷ୍ଟା କରିଥିଲେ। ସେ ବିଭାଗୀୟ ମୁଖ୍ୟ ସମୀର କୁମାର ସାହୁଙ୍କ ବିରୋଧରେ ଯୌନ ଉତ୍ପୀଡ଼ନର ଅଭିଯୋଗ ଆଣିଥିଲେ। ଅଭିଯୋଗ ଅନୁସାରେ, ସେ ପ୍ରିନ୍ସିପାଲଙ୍କ ଚାମ୍ବର ସାମ୍ନାରେ ନିଜ ଉପରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ, କାରଣ ତାଙ୍କ ଅଭିଯୋଗରେ କୌଣସି କାର୍ଯ୍ୟାନୁଷ୍ଠାନ ହୋଇନଥିବାରୁ ସେ ମାନସିକ ଭାବେ ବିଚଳିତ ହୋଇପଡ଼ିଥିଲେ। ସୌମ୍ୟଶ୍ରୀଙ୍କ ଶରୀରରେ ୯୦-୯୫% ପୋଡ଼ିଯାଇଥିଲା। ପ୍ରଥମେ ତାଙ୍କୁ ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା, ପରେ ଉନ୍ନତ ଚିକିତ୍ସା ପାଇଁ ଏଇମସ ଭୁବନେଶ୍ୱରକୁ ସ୍ଥାନାନ୍ତର କରାଯାଇଥିଲା। ମେକାନିକାଲ ଭେଣ୍ଟିଲେସନ ଓ ରେନାଲ ରିପ୍ଲେସମେଣ୍ଟ ଥେରାପି ଭଳି ଚିକିତ୍ସା ସତ୍ତ୍ୱେ ଜୁଲାଇ ୧୪ ରାତି ୧୧:୪୬ରେ ତାଙ୍କୁ ମୃତ ଘୋଷଣା କରାଗଲା।
ଏହା ପୂର୍ବରୁ ସୌମ୍ୟଶ୍ରୀ କଲେଜ ନିକଟରେ ଏକ ଧାରଣାରେ ବସି ସାହୁଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ। ତାଙ୍କ ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ନହେବାରୁ ସେ ଏହି ଚରମ ପଦକ୍ଷେପ ନେଇଥିଲେ। ସାହେବଖୁଣ୍ଟା ପୁଲିସ ସାହୁଙ୍କୁ ଭାରତୀୟ ନ୍ୟାୟ ସଂହିତାର ଧାରା ୧୦୮ (ଆତ୍ମହତ୍ୟା ପାଇଁ ପ୍ରରୋଚନା) ଓ ଧାରା ୭୫(୧)(ତୃତୀୟ) (ଯୌନ ଉତ୍ପୀଡ଼ନ) ଅନୁଯାୟୀ ଗିରଫ କରିଛି।
