ଭୁବନେଶ୍ୱର,୧୦।୧୦(ବ୍ୟୁରୋ): ପାରଳାଖେମୁଣ୍ଡି ଏସିଏଫ୍ ସୌମ୍ୟରଞ୍ଜନ ମହାପାତ୍ର ମୃତ୍ୟୁ ମାମଲାରେ ବିଦ୍ୟାଭାରତୀ ହିଁ ଅଭିଯୁକ୍ତ ବୋଲି କ୍ରାଇମବ୍ରାଞ୍ଚ ଦର୍ଶାଉଛି। ୮୧ ଜଣ ସାକ୍ଷୀଙ୍କ ବୟାନକୁ ଆଧାରକରି ପାରଳାଖେମୁଣ୍ଡି କୋର୍ଟରେ ବିଦ୍ୟାଭାରତୀଙ୍କ ନଁାରେ ଆଇପିସି ଦଫା ୨୮୫ ଓ ୩୦୪(ଏ)ରେ ୩୦୦ପୃଷ୍ଠାର ଚାର୍ଜଶିଟ୍ ଦାଖଲ କରାଯାଇଛି। ଏହାସହ ଆଇପିସି ୪୧ ଧାରାରେ ବିଦ୍ୟାଭାରତୀଙ୍କୁ ନୋଟିସ୍ କରାଯାଇଛି ବୋଲି ଶନିବାର ଭୁବନେଶ୍ୱରରେ ଏଡିଜି ସଞ୍ଜୀବ ପଣ୍ଡା କହିଛନ୍ତି। ତେବେ କେବଳ ବିଦ୍ୟାଭାରତୀ ହିଁ ଦୋଷୀ କି ପ୍ରଶ୍ନକୁ ଏଡ଼ାଇ ଯାଇଛନ୍ତି ଏଡିଜି। ତଦନ୍ତରେ ଯେତିକି ମିଳିଲା ଚାର୍ଜଶିଟ୍ରେ ସେତିକି ଦିଆଯାଇଛି ବୋଲି ସେ କହିଛନ୍ତି। ତେବେ କ୍ରାଇମବ୍ରାଞ୍ଚର ଏହି ତଦନ୍ତ ପ୍ରକ୍ରିୟା ଓ ଚାର୍ଜଶିଟ୍କୁ ନେଇ ସନ୍ତୁଷ୍ଟ ନାହାନ୍ତି ସୌମ୍ୟରଞ୍ଜନଙ୍କ ବାପା ଓ ଓକିଲ। ବିଦ୍ୟାଭାରତୀଙ୍କ ନଁାରେ ଲାଗିଥିବା ଦୁଇ ଦଫାରେ ସର୍ବାଧିକ ୩ ବର୍ଷ ଯାଏ ଦଣ୍ଡବିଧାନ ହୋଇପାରିବ। କୌଣସି ବ୍ୟକ୍ତିର ଅବହେଳା କିମ୍ବା ଅସାବଧାନରୁ ଅପରପକ୍ଷର ଜୀବନହାନି ହେଲେ ଦଫା ୩୦୪(ଏ) ଲାଗୁ ହୋଇଥାଏ। ଏଥିରେ ସର୍ବାଧିକ ୨ ବର୍ଷ ଜେଲ୍ କିମ୍ବା ଜରିମାନା କିମ୍ବା ଉଭୟ ଦଣ୍ଡବିଧାନର ପ୍ରାବଧାନ ରହିଛି। ଦଫା ୨୮୫ ହେଉଛି କୌଣସି ଜ୍ୱଳନ ପଦାର୍ଥ ଦ୍ୱାରା କ୍ଷତି ପହଞ୍ଚାଇବା କିମ୍ବା ସଙ୍କଟାପନ୍ନ ସ୍ଥିତି ସୃଷ୍ଟି କରିବା। ଏଥିରେ ଦୋଷୀ ସାବ୍ୟସ୍ତ ହେଲେ ୬ମାସ ଯାଏ ଜେଲ୍ ଦଣ୍ଡ ଓ ଜରିମାନା ରହିଛି। ହେଲେ ଏତେ ସମ୍ବେଦନଶୀଳ ଘଟଣାରେ ବିଦ୍ୟାଭାରତୀଙ୍କ ବିରୋଧରେ ଲାଗିଥିବା ଦଫାକୁ ନେଇ ପ୍ରଶ୍ନ ଉଠାଇବା ସହ ଘଟଣାକୁ ଭିନ୍ନ ଦିଗ ଦେବାକୁ ଚେଷ୍ଟା କରାଯାଇଥିବା ପୂର୍ବତନ ବିଚାରପତି ଜଷ୍ଟିସ୍ ରତ୍ନାକର ଦାସ କହିଛନ୍ତି। ସୌମ୍ୟଙ୍କ ଓକିଲ ପାର୍ଥସାରଥୀ ନାୟକ କହିଛନ୍ତି, ଯେଉଁ ଦଫା ଲଗାଯାଇଛି, ତାହା ପ୍ରମାଣିତ କରିବା ମୁସ୍କିଲ। ତେଣୁ ସିବିଆଇ ତଦନ୍ତ ଦାବିରେ ହାଇକୋର୍ଟରେ ସୌମ୍ୟଙ୍କ ବାପା ଆବେଦନ କରିଛନ୍ତି।
