ନୂଆଦିଲ୍ଲୀ, ୨୩।୧୨: ଉତ୍ତରପଶ୍ଚିମ ୟୁରୋପରେ କରୋନା ଭୂତାଣୁର ଏକ ନୂଆ ରୂପ ବ୍ୟାପିବା ଫଳରେ ନିକଟରେ ବ୍ରିଟେନ ଯାତ୍ରା କରିଥିବା ଲୋକଙ୍କ ପାଇଁ କେନ୍ଦ୍ର ସରକାର ମଙ୍ଗଳବାର ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର (ଏସ୍ଓପି) ଜାରି କରିଛନ୍ତି। କୋଭିଡ୍ର ଏହି ନୂଆ ରୂପ ଦ୍ରୁତ ସଂକ୍ରମିତ ହେବା ସହ ଯୁବବର୍ଗଙ୍କୁ ଅଧିକ ପ୍ରଭାବିତ କରୁଛି। ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଜାରି ଏସ୍ଓପିରେ ସମସ୍ତ ଅନ୍ତର୍ଜାତୀୟ ବିମାନଯାତ୍ରୀଙ୍କୁ ଗତ ୧୪ ଦିନର ଟ୍ରାଭେଲ୍ ହିଷ୍ଟ୍ରି ଘୋଷଣା କରି ଆତ୍ମଘୋଷିତ ଫର୍ମ ପୂରଣ କରିବାକୁ କୁହାଯାଇଛି। ଯେଉଁମାନେ ନଭେମ୍ବର ୨୫ରୁ ଡିସେମ୍ବର ୮ ମଧ୍ୟରେ ବ୍ରିଟେନରୁ ଫେରିଛନ୍ତି ସେମାନଙ୍କୁ ଆର୍ଟି-ପିସିଆର୍ ପରୀକ୍ଷା କରାଇବାକୁ ହେବ। ଯଦି ରିପୋର୍ଟ ପଜିଟିଭ୍ ଆସେ ତେବେ ଭୂତାଣୁ ନୂଆ ରୂପର ଆର୍ଟି-ପିସିଆର୍ ପରୀକ୍ଷା କରାଯିବ। ପଜିଟିଭ୍ ଚିହ୍ନଟ ଯାତ୍ରୀଙ୍କୁ ସମ୍ପୃକ୍ତ ରାଜ୍ୟ କର୍ତ୍ତୃପକ୍ଷ ଆନୁଷ୍ଠାନିକ ଆଇସୋଲେଶନ କେନ୍ଦ୍ରକୁ ପଠାଇବେ। ନୂଆ ଷ୍ଟ୍ରେନ୍ ଚିହ୍ନଟ ହେଲେ ସମ୍ପୃକ୍ତ ବ୍ୟକ୍ତିଙ୍କୁ ଚିକିତ୍ସା ପାଇଁ ପଠାଯିବ ଓ ସେ ଅଲଗା ଆଇସୋଲେଶନରେ ରହିବେ।
କୋଭିଡ୍ର ନୂଆ ରୂପ ବ୍ରିଟେନରେ ସେପ୍ଟେମ୍ବରରୁ ଚିହ୍ନଟ ହୋଇଥିଲାବେଳେ ଭାରତରେ ଏପର୍ଯ୍ୟନ୍ତ ତାହା ଦେଖାଯାଇ ନ ଥିବା ସରକାରଙ୍କ ପକ୍ଷରୁ କୁହାଯାଇଛି।
ଫାଇଜର-ବାୟୋଏନ୍ଟେକ୍ କମ୍ପାନୀ ପ୍ରସ୍ତୁତ ଟିକା ବ୍ରିଟେନରେ ଚିହ୍ନଟ ହୋଇଥିବା କୋଭିଡ୍ ଭୂତାଣୁର ନୂଆ ଷ୍ଟ୍ରେନ୍ ପାଇଁ କାମ କରିବ ବୋଲି ବାୟୋଏନ୍ଟେକ୍ର ସହପ୍ରତିଷ୍ଠାତା ଉଗୁର ସାହିନ କହିଛନ୍ତି। ଆବଶ୍ୟକ ପଡ଼ିଲେ ଆଗାମୀ ୬ ସପ୍ତାହ ମଧ୍ୟରେ ଏଥିପାଇଁ ସ୍ବତନ୍ତ୍ର ଟିକା ପ୍ରସ୍ତୁତ ହୋଇପାରିବ।
୧୨ ଫେରନ୍ତାଙ୍କୁ କରୋନା
ବ୍ରିଟେନରୁ ଫେରିଥିବା ୧୨ ବିମାନ ଯାତ୍ରୀଙ୍କଠାରେ କରୋନା ପଜିଟିଭ୍ ଚିହ୍ନଟ ହୋଇଛି। ସୋମବାର ରାତିରେ ଦିଲ୍ଲୀ ବିମାନବନ୍ଦରରେ ପହଞ୍ଚତ୍ବା ୬ ଜଣ ଯାତ୍ରୀ କରୋନା ଆକ୍ରାନ୍ତ ଜଣାପଡ଼ିଛି। ସେହିପରି କୋଲକାତା ବିମାନବନ୍ଦରରେ ରବିବାର ରାତିରେ ୨ ଜଣଙ୍କଠାରେ ପଜିଟିଭ୍ ଚିହ୍ନଟ ହୋଇଥିଲା। ଅହମଦାବାଦ ବିମାନବନ୍ଦରରେ ୪ ଜଣ ବ୍ରିଟେନ ଫେରନ୍ତାଙ୍କଠାରେ କୋଭିଡ୍ ଭୂତାଣୁ ଥବା ପରୀକ୍ଷାରୁ ଜଣାପଡିଛି। ବ୍ରିଟେନରେ ଭୂତାଣୁର ଏକ ନୂଆ ରୂପ ଦ୍ରୁତ ସଂକ୍ରମଣ ହେଉଥିବାରୁ ଭାରତ ସମେତ ବିଭିନ୍ନ ଦେଶ ବିମାନ ଚଳାଚଳ ଉପରେ କଟକଣା ଲଗାଇବା ସହ ସେଠାରୁ ଫେରୁଥିବା ଯାତ୍ରୀଙ୍କ କୋଭିଡ୍ ପରୀକ୍ଷା କରାଉଛନ୍ତି।
