ନୂଆଦିଲ୍ଲୀ,୧୨।୮: ସଂସଦର ମୌସୁମୀ ଅଧିବେଶନ ହଟ୍ଟଗୋଳ ମଧ୍ୟରେ ଶେଷ ହେବା ପରେ ସୋନିଆ ଗାନ୍ଧୀ ବିରୋଧୀଙ୍କୁ ଏକଜୁଟ କରିବାକୁ ଉଦ୍ୟମ ଆରମ୍ଭ କରିଛନ୍ତି। ଏଥିପାଇଁ ସୋନିଆ ବିରୋଧୀ ଦଳର ବହୁ ବଡ ନେତାଙ୍କ ସହ ଏକ ବୈଠକ କରିବାକୁ ଯୋଜନା କରିଛନ୍ତି। କୁହାଯାଉଛି ଯେ ସୋନିଆ ଗାନ୍ଧୀ ଡିନର କୂଟନୀତି ଅନ୍ତର୍ଗତ ବିରୋଧୀ ଦଳର ନେତାମାନଙ୍କୁ ରାତ୍ରୀ ଭୋଜନ ପାଇଁ ନିମନ୍ତ୍ରଣ କରିବେ। ଏଥିମଧ୍ୟରେ ମମତା ବାନାର୍ଜୀ, ଶରଦ ପାୱାର, ଉଦ୍ଧବ ଠାକରେ, ଏମ.କେ ଷ୍ଟାଲିନଙ୍କ ସମେତ ଅନ୍ୟାନ୍ୟ ବରିଷ୍ଠ ନେତାଙ୍କ ନାମ ଅନ୍ତର୍ଭୁକ୍ତ କରାଯାଇଛି। ତେବେ ଏନେଇ ତାରିଖ ସ୍ଥିର କରାଯାଇ ନାହିଁ। ନିକଟରେ କଂଗ୍ରେସର ବରିଷ୍ଠ ନେତା କପିଲ ସିବଲ ମଧ୍ୟ ତାଙ୍କ ଜନ୍ମଦିନରେ ବିରୋଧୀ ଦଳର ନେତାମାନଙ୍କୁ ନିମନ୍ତ୍ରଣ କରିଥିଲେ। ଏଥିରେ ବହୁ ନେତା ଯୋଗ ଦେଇଥିଲେ ଯେଉଁମାନେ କଂଗ୍ରେସର ଶୀର୍ଷ ନେତୃତ୍ୱକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି। ଏନେଇ ସୋନିଆ ଗାନ୍ଧୀଙ୍କ ଚିନ୍ତା ମଧ୍ୟ ବୃଦ୍ଧି ପାଇଛି। ତେଣୁ ବିରୋଧୀଙ୍କୁ ଏକଜୁଟ ରଖିବା ସୋନିଆଙ୍କ ପାଇଁ ଏକ ବଡ ଆହ୍ବାନ ସୃଷ୍ଟି କରିଛି।
ସଂସଦର ମୌସୁମୀ ଅଧିବେଶନରେ ବିରୋଧୀଦଳର ନେତାଙ୍କ ମଧ୍ୟରେ ଏକତା ଦେଖିବାକୁ ମିଳିଥିଲା। ବିରୋଧୀ ମଧ୍ୟ ସରକାରଙ୍କୁ ଘେରିବାରେ ସଫଳ ହୋଇଥିଲେ। ଏଭଳି ପରିସ୍ଥିତିରେ ବିରୋଧୀଙ୍କ ଏକତା ବଜାୟ ରଖିବା ପାଇଁ କଂଗ୍ରେସ ଯୋଜନା କରିଛି। ସୋନିଆ ଗାନ୍ଧୀ ନିଜେ ଏହି କାର୍ଯ୍ୟକୁ ହାତକୁ ନେଇଛନ୍ତି।
