ନୂଆଦିଲ୍ଲୀ,୨୭।୧୨: ପୂର୍ବତନ ପ୍ରଧାନମନ୍ତ୍ରୀ ଡା. ମନମୋହନ ସିଂଙ୍କୁ ଶ୍ରଦ୍ଧାଞ୍ଜଳି ଦେବା ଲାଗି ଶୁକ୍ରବାର ଅପରାହ୍ନରେ କଂଗ୍ରେସ କାର୍ଯ୍ୟକାରିଣୀ ବୈଠକ ବସିଥିଲା। ଏଥିରେ ଏକ ସଂକଳ୍ପ ପାରିତ ହୋଇ ପୂର୍ବତନ ପ୍ରଧାନମନ୍ତ୍ରୀଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରାଯାଇଛି। କଂଗ୍ରେସ ସଂସଦୀୟ ଦଳର ସଭାପତି ସୋନିଆ ଗାନ୍ଧୀ ମନମୋହନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। କଂଗ୍ରେସ ପକ୍ଷରୁ ସୋସିଆଲ ମିଡିଆ ଆକାଉଣ୍ଟରେ ସୋନିଆଙ୍କ ଶୋକବାର୍ତ୍ତାକୁ ପ୍ରକାଶ କରାଯାଇଛି।
ଶୋକବାର୍ତ୍ତାରେ ସୋନିଆ କହିଛନ୍ତି, ମୋ ପାଇଁ ଡା. ମନମୋହନଙ୍କ ପରଲୋକ ବ୍ୟକ୍ତିଗତ କ୍ଷତି। ସେ ମୋର ବନ୍ଧୁ, ଦାର୍ଶନିକ ଏବଂ ମାର୍ଗଦର୍ଶକ ଥିଲେ। ସେ ତାଙ୍କ ବ୍ୟବହାରରେ ବହୁତ ବିନମ୍ର ଥିଲେ। ହେଲେ ନିଜର ବିଶ୍ୱାସରେ ଦୃଢ଼ ଥିଲେ। ତାଙ୍କୁ ହରାଇ ଆମେ ଏଭଳି ଜଣେ ନେତାଙ୍କୁ ହରାଇଛେ, ଯିଏକି ବୁଦ୍ଧିମତା, ବିନମ୍ରତାର ପ୍ରତୀକ ଥିଲେ। ସେ ହୃଦୟ ଏବଂ ମନରେ ଆମ ଦେଶର ସେବା କରିଥିଲେ। କଂଗ୍ରେସ ଦଳ ପାଇଁ ଜଣେ ଉଜ୍ୱଳ ଏବଂ ପ୍ରୀୟ ମାର୍ଗଦର୍ଶକ, ତାଙ୍କ କରୁଣା ଏବଂ ଦୂରଦର୍ଶିତା ଯୋଗୁ ଲକ୍ଷ ଲକ୍ଷ ଭାରତୀୟଙ୍କ ଜୀବନ ବଦଳିଛି ଏବଂ ସଶକ୍ତ ହୋଇଛି ବୋଲି ସେ କହିଛନ୍ତି।
ମନମୋହନଙ୍କୁ ତାଙ୍କ ନିର୍ମଳ ହୃଦୟ ଏବଂ ଉତ୍କୃଷ୍ଟ ବୁଦ୍ଧି ପାଇଁ ଭାରତର ଲୋକେ ଭଲ ପାଇଥାନ୍ତି। ତାଙ୍କର ପରାମର୍ଶ, ଚିନ୍ତାଧାରା ଆମ ଦେଶର ରାଜନୈତିକ କ୍ଷେତ୍ରରେ ଉତ୍ସାହର ସହ ଆବଶ୍ୟକତା ପଡ଼ିଛି। ତାଙ୍କୁ ବହୁତ ସମ୍ମାନ କରାଯାଉଥିଲା। ତାଙ୍କୁ ବିଶ୍ୱର ନେତା ଏବଂ ବିଦ୍ୱାନମାନେ ସମ୍ମାନିତ ଏବଂ ପ୍ରଶଂସା କରୁଥିଲେ। ସେ ସମ୍ଭାଳିଥିବା ପ୍ରତ୍ୟେକ ଉଚ୍ଚ ପଦବୀରେ ପ୍ରତିଭା ଏବଂ ବିଶିଷ୍ଟତା ଆଣିଥିଲେ। ସେ ଭାରତକୁ ଗୌରବ ଏବଂ ସମ୍ମାନ ଦେଇଥିଲେ।
ସାମାଜିକ ନ୍ୟାୟ, ଧର୍ମନିରପେକ୍ଷତା, ଗଣତାନ୍ତ୍ରିକ ମୂଲ୍ୟବୋଧ ପ୍ରତି ତାଙ୍କର ପ୍ରତିବଦ୍ଧତା ଗଭୀର ଏବଂ ଅତୁଟ ଥିଲା। ତାଙ୍କ ସହ ସମୟ ବିତାଇବା ସମୟରେ ତାଙ୍କ ସଚ୍ଚୋଟତା ଏବଂ ନିଷ୍ଠା ଦ୍ୱାରା ପ୍ରଭାବିତ ହେଉଥିଲି। ସେ ଆମର ଜାତୀୟ ଜୀବନରେ ଏକ ଶୂନ୍ୟସ୍ଥାନ ଛାଡ଼ିଛନ୍ତି, ଯାହା କେବେ ପୂରଣ ହୋଇପାରିବ ନାହିଁ। କଂଗ୍ରେସ ଦଳରେ ଆମେ ଏବଂ ଭାରତବାସୀ ସର୍ବଦା ଗର୍ବିତ ଏବଂ କୃତଜ୍ଞ ରହିବୁ ଯେ ଆମ ପାଖରେ ଏଭଳି ଜଣେ ନେତା ଥିଲେ, ଯାହାର ଭାରତର ପ୍ରଗତି ଏବଂ ବିକାଶରେ ଅବଦାନ ଅତୁଳନୀୟ ଥିଲା ବୋଲି ସୋନିଆ କହିଛନ୍ତି।
𝐂𝐨𝐧𝐠𝐫𝐞𝐬𝐬 𝐏𝐚𝐫𝐥𝐢𝐚𝐦𝐞𝐧𝐭𝐚𝐫𝐲 𝐏𝐚𝐫𝐭𝐲 𝐂𝐡𝐚𝐢𝐫𝐩𝐞𝐫𝐬𝐨𝐧 𝐒𝐦𝐭. 𝐒𝐨𝐧𝐢𝐚 𝐆𝐚𝐧𝐝𝐡𝐢 𝐣𝐢’𝐬 𝐦𝐞𝐬𝐬𝐚𝐠𝐞 𝐨𝐧 𝐭𝐡𝐞 𝐩𝐚𝐬𝐬𝐢𝐧𝐠 𝐨𝐟 𝐃𝐫 𝐌𝐚𝐧𝐦𝐨𝐡𝐚𝐧 𝐒𝐢𝐧𝐠𝐡 𝐣𝐢.
In Dr Manmohan Singh’s passing, we have lost a leader who was the epitome… pic.twitter.com/3rE8I8u8TE
— Congress (@INCIndia) December 27, 2024
