ନୂଆଦିଲ୍ଲୀ,୧୦।୨: ଅର୍ଥମନ୍ତ୍ରୀ ନିର୍ମଳା ସିତାରମଣ କଂଗ୍ରେସ ଏବଂ ୟୁପିଏ ସରକାରଙ୍କୁ କଟାକ୍ଷ କରିଛନ୍ତି। କଂଗ୍ରେସ ସରକାରରେ ଥିବା ବେଳେ ଶାସନ ଦିଗହୀନ ଏବଂ ନେତୃତ୍ୱହୀନ ରହିଥିଲା। ସେତେବେଳେ ସୋନିଆ ଗାନ୍ଧୀ ‘ସୁପର ପ୍ରଧାନମନ୍ତ୍ରୀ’ ଭାବେ କାମ କରିଥିଲେ ବୋଲି ସେ କହିଛନ୍ତି। ଶୁକ୍ରବାର ଲୋକ ସଭାରେ ଶ୍ୱେତ ପତ୍ରକୁ ନେଇ ଆଲୋଚନା କାଳରେ ସିତାରମଣ ୨୦୦୪ରୁ ୨୦୧୪ ଯାଏ କଂଗ୍ରେସର ନେତୃତ୍ୱାଧିନ ୟୁପିଏ ଏବଂ ପରେ ଭାଜପାର ଏନ୍ଡିଏର ଅର୍ଥବ୍ୟବସ୍ଥାର ତୁଳନା କରିଛନ୍ତି।
୨୦୧୩ରେ ମନମୋହନ ସିଂ ସରକାରଙ୍କ ସମୟରେ ଚିରି ଦିଆଯାଇଥିବା ଏକ ପ୍ରସ୍ତାବର ଅଧ୍ୟାଦେଶ ପ୍ରସଙ୍ଗ ଉଠାଇଥିଲେ ସିତାରମଣ। କିଭଳି ରାହୁଲ ଗାନ୍ଧି ତାକୁ ଚିରି ଦେଇଥିଲେ ବୋଲି ମନେପକାଇ ତାଙ୍କୁ ଜଣେ ଅହଂକାରୀ ବୋଲି କହିଥିଲେ। ଏପରି କରି ସେ ପ୍ରଧାନମନ୍ତ୍ରୀଙ୍କ ଅପମାନ କରିଥିଲେ ବୋଲି ମଧ୍ୟ ସେ କହିଥିଲେ।
ଅର୍ଥବ୍ୟବସ୍ଥା ଉପରେ ସୁଧାର ଆଣିବା ଲାଗି ୧୦ ବର୍ଷ ଧରି ଚେଷ୍ଟା କରାଯିବା ପରେ ଏବେ ଭାରତ ‘ଫ୍ରାଜାଇଲ ୫’ରୁ ୫ମ ସର୍ବବୃହତ ଅର୍ଥବ୍ୟବସ୍ଥା ପାଲଟିଛି। ଆଗାମୀ ଦିନରେ ଖୁବ୍ଶୀଘ୍ର ସେ ତୃତୀୟ ସର୍ବବୃହତ ଅର୍ଥବ୍ୟବସ୍ଥା ହେବ ବୋଲି ସେ କହିଥିଲେ।
ସେହିଭଳି ୟୁପିଏ ସରକାରର ଶାସନକାଳ ସମୟରେ ସମସ୍ୟା ଏବଂ କୁପ୍ରବନ୍ଧନ ନେତୃତ୍ୱର କାରଣ ଥିଲା। ସମସ୍ୟାର ମୂଳ କାରଣ ଥିଲା ନେତୃତ୍ୱ। ଦିଗହୀନ, ନେତୃତ୍ୱହୀନ ନେତୃତ୍ୱ ୟୁପିଏର ୧୦ ବର୍ଷର ଘୋଟାଲାର କେନ୍ଦ୍ର ଥିଲା। ସୋନିଆ ରାଷ୍ଟ୍ରୀୟ ପରାମର୍ଶଦାତା ପରିଷଦର ଅଧ୍ୟକ୍ଷ ଭାବେ ସୁପର ପ୍ରଧାନମନ୍ତ୍ରୀ ଥିଲେ ବୋଲି ସିତାରମଣ କହିଛନ୍ତି। ଏହି ସମୟରେ ସରକାରଙ୍କ ଦ୍ୱାରା ୭୧୦ ଫାଇଲ୍ ଅନୁମତି ଲାଗି ଏନ୍ଏସି ପାଖକୁ ପଠାଯାଇଥିବା ସେ ଅଭିଯୋଗ କରିଛନ୍ତି।
