ବାଲେଶ୍ୱର ଅଫିସ, ୨୯ା୭: ଜମି ହାତେଇବା ପାଇଁ ବାଲେଶ୍ୱର ଶିଳ୍ପାଞ୍ଚଳ ଥାନା ବାମପଦା ଗାଁର ରଘୁନାଥ ନାୟକଙ୍କୁ ମୃତ ଦର୍ଶାଯାଇଥିଲା। ଏନେଇ ତାଙ୍କ ସ୍ତ୍ରୀ ଓ ସାନପୁଅ ଗିରଫ ହୋଇଛନ୍ତି। ପୋଲିସ ଉଭୟଙ୍କୁ ୨୬ତାରିଖରେ କୋର୍ଟଚାଲାଣ କରିଛି। ହେଲେ ଦୀର୍ଘଦିନର ଆଇନ ଲଢେଇ ପରେ ରଘୁନାଥଙ୍କୁ ଜୀବିତ ବୋଲି ପ୍ରମାଣ କରିଛନ୍ତି ତାଙ୍କ ବଡପୁଅ ହରିନାରାୟଣ।
ରଘୁନାଥ ନାୟକଙ୍କର ୧୯୬୭ରେ ମୃତ୍ୟୁ ହୋଇଯାଇଥିବା ଦର୍ଶାଇ ତାଙ୍କ ସ୍ତ୍ରୀ ମାଳତୀ ଓ ସାନପୁଅ ମହେନ୍ଦ୍ର କୁମାର ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରୁ ୨୧ା୭ା୨୦୧୬ରେ ମୃତ୍ୟୁ ପ୍ରମାଣପତ୍ର ହାସଲ କରିଥିଲେ। ପରେ ରେମୁଣା ତହସିଲର କେତେଜଣ ଅସାଧୁ କର୍ମଚାରୀ ଓ ତତ୍କାଳୀନ ବଡଗାଁ ରାଜସ୍ବ ନିରୀକ୍ଷକ (ଆରଆଇ)ଙ୍କ ସହାୟତାରେ ସେମାନେ ଉତ୍ତରାଧିକାରୀ ପ୍ରମାଣପତ୍ର ହାତେଇଥିଲେ। ଏକଥା ଜଣାପଡିବା ପରେ ରଘୁନାଥଙ୍କ ବଡପୁଅ ହରିନାରାୟଣ ଶିଳ୍ପାଞ୍ଚଳ ଥାନାରେ ୨୦୧୭ରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ପୋଲିସ ଏକ ମାମଲା(ନଂ.୫୦/୨୦୧୭) ରୁଜୁ କରି ତଦନ୍ତ ଆରମ୍ଭ କରିଥିଲା। ଇତିମଧ୍ୟରେ ୩ଜଣ ଥାନାଧିକାରୀଙ୍କର ବଦଳି ହୋଇଥିଲା ବେଳେ ଏକାଧିକ ତଦନ୍ତକାରୀ ଅଫିସର ମଧ୍ୟ ବଦଳିଗଲେଣି। ତେବେ ନ୍ୟାୟ ନ ମିଳିବାରେ ବିଳମ୍ବ ହେଉଥିବାରୁ ହରିନାରାୟଣ ଉଚ୍ଚ ନ୍ୟାୟାଳୟ ଆଶ୍ରୟ ନେଇଥିଲେ। ଶେଷରେ ଉଚ୍ଚନ୍ୟାୟାଳୟଙ୍କ ନିର୍ଦ୍ଦେଶକ୍ରମେ ଥାନାଧିକାରୀ ମିନତି ବିଶ୍ବାଳ ମାମଲାକୁ ଶେଷ କରିବାକୁ ତତ୍ପରତା ଦେଖାଇଥିଲେ। ଏନେଇ ଶିଳ୍ପାଞ୍ଚଳ ଥାନାଧିକାରୀ ବିଶ୍ବାଳ କହିଛନ୍ତି, ଜମି ଜାଲିଆତି କରି ହଡ଼ପ କରିବାକୁ ଏଭଳି ଯୋଜନା ହୋଇଥିଲା। ତଦନ୍ତରେ ମା’ ମାଳତୀ ଓ ଭାଇ ମହେନ୍ଦ୍ର ଦୋଷୀ ବୋଲି ଜଣାପଡିବାରୁ ଉଭୟଙ୍କୁ ଗିରଫ କରାଯାଇଥିବା ଥାନାଧିକାରୀ ବିଶ୍ୱାଳ କହିଛନ୍ତି।
