ଜଟଣୀ,୨୮ା୬ (ଡି.ଏନ୍.ଏ.):ଜଟଣୀ ଥାନା ଅଧୀନ ବଡ଼ତୋଟା ବିଏସ୍ଏଫ୍ କ୍ୟାମ୍ପ ସମ୍ମୁଖ ରାସ୍ତା ପାର୍ଶ୍ୱରେ ଥିବା ବାବା ସାହେବ ଆମ୍ବେଡ୍କରଙ୍କ ପ୍ରତିମୂର୍ତ୍ତିର ହାତକୁ କେହି ଦୁର୍ବୃତ୍ତ ଭାଙ୍ଗି ଦେଇଛନ୍ତି। ଏନେଇ ସୋମବାର ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇବା ସହ ଭୀମ ଆର୍ମି ଏକତା ମିଶନ, ଦଳିତ ଆଦିବାସୀ ମହାସଂଘ ଓ ସ୍ଥାନୀୟ ଦଳିତ ଆଦିବାସୀ ପରିବାର ୪ ଦଫା ଦାବିରେ ଘଟଣାସ୍ଥଳରେ ୫ ଘଣ୍ଟା ରାସ୍ତାରୋକୋ କରିଥିଲେ। ସୂଚନା ମୁତାବକ, ବାବା ସାହେବ ଆମ୍ବେଡକର ମିଶନ ଅଫ ଓଡ଼ିଶା ପକ୍ଷରୁ ଗତ ଏପ୍ରିଲ ୧୪ରେ ବଡ଼ତୋଟା ଗ୍ରାମସ୍ଥ ବିଏସ୍ଏଫ୍ କ୍ୟାମ୍ପ ସମ୍ମୁଖ ଜଟଣୀ-ଖୋର୍ଦ୍ଧା ମୁଖ୍ୟରାସ୍ତା ପାର୍ଶ୍ୱରେ ଆମ୍ବେଡକରଙ୍କ ପ୍ରତିମୂର୍ତ୍ତି ସ୍ଥାପନ କରାଯାଇଥିଲା। ରବିବାର ରାତିରେ କେହି ଦୁର୍ବୃତ୍ତ ଏହି ପ୍ରତିମୂର୍ତ୍ତିର ହାତକୁ ଭାଙ୍ଗିଦେଇଛନ୍ତି। ଏହି ଘଟଣା ପ୍ରଚାରିତ ହେବା ପରେ ଭୀମ ଆର୍ମି ଏକତା ମିଶନ ସହଯୋଗରେ ସ୍ଥାନୀୟ ଦଳିତ ଆଦିବାସୀ ପରିବାରର ସାଧାରଣ ସମ୍ପାଦକ ସର୍ବେଶ୍ୱର ନାୟକ, ଦଳିତ ଆଦିବାସୀ ମହାସଂଘର ମୋହନ ନାୟକ, କୁନ୍ଦନ ନାୟକ ପ୍ରମୁଖ ୪ ଦଫା ଦାବିରେ ସୋମବାର ଭୋର୍ ୫ଟାରୁ ରାସ୍ତାରୋକୋ କରିଥିଲେ। ଫଳରେ ଉଭୟ ପାର୍ଶ୍ୱରୁ ଆସୁଥିବା ଯାନବାହନ ଅଟକି ରହିଥିଲା। ପୁନଃ ନୂତନ ପ୍ରତିମୂର୍ତ୍ତି ସ୍ଥାପନ, ବାରିକେଡ୍ ନିର୍ମାଣ, ଦୁଇଦିନ ମଧ୍ୟରେ ଦୁର୍ବୃତ୍ତଙ୍କୁ ଗିରଫ ଏବଂ ପ୍ରତିମୂର୍ତ୍ତି ସ୍ଥାପନ ସ୍ଥାନକୁ ସଙ୍ଗଠନ ନାମରେ ନାମିତ କରିବା ପାଇଁ ଦାବି କରିଥିଲେ। ଖବର ପାଇ ଜଟଣୀ ଥାନା ଅଧିକାରୀ ଦୟାନିଧି ନାୟକ ପହଞ୍ଚି ଆନ୍ଦୋଳନକାରୀଙ୍କୁ ବୁଝାଶୁଝା କରିବା ପରେ ପୂର୍ବାହ୍ନ ୧୦ଟାରେ ରାସ୍ତାରୋକୋ ପ୍ରତ୍ୟାହୃତ ହୋଇଥିଲା। ପରେ ଯାନବାହନ ଚଳାଚଳ ସ୍ବାଭାବିକ ହୋଇଥିଲା। ଦାବି ପୂରଣ ନ ହେଲେ ଆଗାମୀ ଦିନରେ ଜଟଣୀ ଥାନା ଏବଂ ଜିଲାପାଳଙ୍କ କାର୍ଯ୍ୟାଳୟ ଘେରାଉ କରାଯିବ ବୋଲି ସଙ୍ଗଠନ ପକ୍ଷରୁ ଚେତାବନୀ ଦିଆଯାଇଛି।
