ଜୁନାଗଡ଼,୧୫।୧୦(ଡି.ଏନ.ଏ.) କଳାହାଣ୍ଡି ଜିଲା ଜୁନାଗଡ଼ ବ୍ଲକ ଭାଜପା ପକ୍ଷରୁ ବୁଧବାର ରାଜ୍ୟପାଳଙ୍କ ଉଦ୍ଦେଶ୍ୟରେ ଏକ ୬ ଦଫା ଦାବିପତ୍ର ସ୍ଥାନୀୟ ବିଡ଼ିଓ ଦୁଲାରାମ ମାରାଣ୍ଡିଙ୍କୁ ପ୍ରଦାନ କରାଯାଇଛି। ମହାମାରୀ କରୋନା ସାରା ଦେଶକୁ ଆକ୍ରାନ୍ତ କରିଥିବା ବେଳେ ଓଡ଼ିଶାରେ ମଧ୍ୟ ଅଢେଇ ଲକ୍ଷରୁ ଊଦ୍ଧର୍ବ ସଂକ୍ରମିତ। ୧ ହଜାରରୁ ଅଧିକ ଲୋକଙ୍କ ମୃତ୍ୟୁ ଘଟି ସାରିଲେଣି । ତାଲା ବନ୍ଦ ସମୟରେ ନିଜ ଘରକୁ ପ୍ରତ୍ୟାବର୍ତ୍ତନ କରିଥିବା ଜିଲାର ଲକ୍ଷାଧିକ ଶ୍ରମିକ ରାଜ୍ୟ ସରକାର ଓ ପ୍ରଶାସନିକ ଦୂରଦୃଷ୍ଟିର ଅଭାବ ଯୋଗୁ ନିଜ ଅଞ୍ଚଳରେ କାମ ପାଇ ପାରୁନାହାନ୍ତି । ଫଳରେ ଫେରିଆସିଥିବା ଦାଦନ ଶ୍ରମିକମାନେ ପୁଣିଥରେ ଅନ୍ୟ ରାଜ୍ୟକୁ ଦାଦନ ଖଟିବାକୁ ଗଲେଣି । କେନ୍ଦ୍ର ସରକାରଙ୍କ ଗରିବ କଲ୍ୟାଣ ଯୋଜନାଗୁଡିକୁ ରାଜ୍ୟ ସରକାର ଠିକ ଢଙ୍ଗରେ ଚଳାଇ ନ ପାରି ତହିଁରେ ଦୁର୍ନୀତି, ଭ୍ରଷ୍ଟାଚାର ଭରି ଦେଇଛନ୍ତି । କେନ୍ଦ୍ର ସରକାରଙ୍କ କୃଷକ କଲ୍ୟାଣ ନିଧି ଯୋଜନାରେ ରାଜ୍ୟ ସରକାରଙ୍କ ତ୍ରୁଟିପୂର୍ଣ୍ଣ ନୀତି ଠିକ୍ ତାଲିକା କରିବାରେ ବିଫଳତା କାରଣରୁ ଚାଷୀମାନେ ସୁବିଧା ପାଇବାରୁ ବଞ୍ଚିତ ହୋଇଛନ୍ତି। ତେଣୁ ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଯୋଜନାରେ ପ୍ରକୃତ ଗରିବ ହିତାଧିକାରୀଙ୍କୁ ବାଦ ଦିଆଯାଇ ଆନୁଗତ୍ୟ ଆଧାରରେ ଘର ପ୍ରଦାନ କରାଯାଉଛି । ଏହାର ଅନୁଧ୍ୟାନ କରି ଯୋଗ୍ୟ ହିତାଧିକାରୀଙ୍କୁ ଘର ପ୍ରଦାନ କରାଯାଉ। ତାଲା ବନ୍ଦ ସମୟରେ କେନ୍ଦ୍ର ସରକାର ଗରିବଙ୍କ ପାଇଁ ମାଗଣାରେ ଚାଉଳ, ଡାଲିର ବ୍ୟବସ୍ଥା କରିଥିଲେ। ତାହା ଠିକ ଢଙ୍ଗରେ ଗରିବଙ୍କୁ ପ୍ରଦାନ କରାଯାଉ। ଜୁନାଗଡ଼ ବ୍ଲକରେ ୟୁରିଆ ସାରର ଘୋର ଅଭାବ ଦେଖା ଦେଇଥିଲା । ମୁନାଫାଖୋର ବ୍ୟବସାୟୀମାନଙ୍କ ସହିତ ସରକାରୀ ଅଧିକାରୀ ଓ କର୍ମଚାରୀମାନେ ଏହାର ଲୁଣ୍ଠନ କରିଥିଲେ । ଏହାର ଏକ ଉଚ୍ଚସ୍ତରୀୟ ତଦନ୍ତ କରାଯାଉ। ଜୁନାଗଡ଼ ବ୍ଲକର ଅନେକ ପଞ୍ଚାୟତରେ ସାମ୍ପ୍ରତିକ ପରିସ୍ଥିତିରେ ଧାନଚାଷ ଅଧିକାଂଶ କ୍ଷତି ହୋଇଛି । ତାହାର ଠିକ୍ ଆକଳନ କରି ରିହାତି ଦରରେ ଔଷଧ ଯୋଗାଇ ଦିଆଯାଉ। ଚଳିତବର୍ଷ ପ୍ରାୟ ଲଘୁଚାପ କାରଣରୁ ବର୍ଷା ଲାଗି ରହିଛି। ବର୍ତ୍ତମାନ ଅନେକ ପଞ୍ଚାୟତରେ ଧାନ ଅମଳ ହେଲାଣି । ବର୍ଷା ଯୋଗୁ ଧାନ କ୍ଷତି ହେଲାଣି। ଏହାର ଅନୁଧ୍ୟାନ କରି କ୍ଷତିପୂରଣ ଦିଆଯାଉ। ତାଲା ବନ୍ଦ ସମୟରେ କେନ୍ଦ୍ର ସରକାର ରାଜ୍ୟ ସରକାରଙ୍କୁ ୮୦୦ କୋଟିରୁ ଉଦ୍ଧର୍ବ ଟଙ୍କା ପ୍ରଦାନ କରିଥିଲେ । ରାଜ୍ୟ ସରକାର ପଞ୍ଚାୟତସ୍ତରରେ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର ଖୋଲିଥିଲେ । କିନ୍ତୁ ସ୍ବାସ୍ଥ୍ୟକେନ୍ଦ୍ରଗୁଡ଼ିକରେ ସାନିଟାଇଜ ନ କରି ବିଲ୍ ଉଠିଛି । କୋଭିଡ-୧୯ର ତ୍ରୁଟିପୂର୍ଣ୍ଣ ପରିଚାଳନା ଯୋଗୁ କରୋନା ବୃଦ୍ଧି ପାଇବାରେ ଲାଗିଛି । ଏହାର ଏକ ଉଚ୍ଚସ୍ତରୀୟ ତଦନ୍ତ କରାଯାଉ। ଏହା ସହିତ ସଙ୍ଗରୋଧ କେନ୍ଦ୍ରରେ ଥିବା ପ୍ରବାସୀମାନଙ୍କୁ ଯୁଦ୍ଧକାଳୀନ ଭିତ୍ତିରେ ୨୦୦୦ ହଜାର ଟଙ୍କା ଲେଖାଏ ପ୍ରଦାନ କରିବା ଆଦି ଦାବି ଉଲ୍ଲେଖ କରାଯାଇଛି। ଏହି ଦାବି ପ୍ରଦାନ ସମୟରେ ରାଜ୍ୟ ସମ୍ପାଦିକା ଶର୍ମିଷ୍ଠା ମେହେର, ବ୍ଲକ ଉପାଧ୍ୟକ ଟଙ୍କଧର ନାଏକ, ପୂର୍ବତନ କାଉନସିଲର ମୁକେଶ ଅଗ୍ରୱାଲ, କାଳେନ୍ଦ୍ରୀ ପାଣିଗ୍ରାହୀ, ସତ୍ୟ ନାରାୟଣ ବେହେରା, ଶିବରାମ ରାଉତ, ଉତ୍ତମ ପାତ୍ର, ସୀମାଞ୍ଚଳ ବୈଠାରୁ, ସତ୍ୟ ନାରାୟଣ ପଣ୍ଡା, ମୀନକେତନ ରଣା, ପିତାମ୍ବର ପାତ୍ର, ଲକ୍ଷ୍ମୀ ନାରାୟଣ ବାଣୁଆ, ବିବ୍ରୁବାହନ ମୁଣ୍ଡ, କ୍ଷେତ୍ରମୋହନ ନାଏକ, ଚନ୍ଦ୍ରହାସ୍ୟ ବିଶ୍ବାଳ ପ୍ରମୁଖ ଉପସ୍ଥିତ ଥିଲେ।
