ନୂଆଦିଲ୍ଲୀ, ୧।୯: କୋରାପୁଟ ଜିଲା ପଟ୍ଟାଙ୍ଗୀ ବ୍ଲକ ଅଧୀନ କୋଟିଆ ଗ୍ରାମପୁଞ୍ଜକୁ ନେଇ ସୃଷ୍ଟି ହୋଇଥିବା ସୀମା ବିବାଦକୁ ଉଭୟ ଓଡ଼ିଶା ଓ ଆନ୍ଧ୍ରପ୍ରଦେଶ ରାଜନୈତିକସ୍ତରରେ ଆଲୋଚନା ମାଧ୍ୟମରେ ସମାଧାନ କରିବାକୁ ମଙ୍ଗଳବାର ସର୍ବୋଚ୍ଚ ଅଦାଲତ କହିଛନ୍ତି।
ବିଚାରପତି ଏ. ଏମ୍. ଖାନ୍ଓ୍ବିଲ୍କର, ସଞ୍ଜୀବ ଖାନ୍ନା ଏବଂ ଜେ.କେ. ମାହେଶ୍ୱରୀଙ୍କୁ ନେଇ ଗଠିତ ଖଣ୍ଡପୀଠ ମାମଲାର ଶୁଣାଣି କରି ଉଭୟ ପକ୍ଷଙ୍କୁ ଏନେଇ ୬ସପ୍ତାହ ସମୟ ଦେଇଛନ୍ତି।ଓଡ଼ିଶା ପକ୍ଷରୁ ଆଇନଜୀବୀ ଶିବଶଙ୍କର ମିଶ୍ରଙ୍କ ଜରିଆରେ ସୁପ୍ରିମକୋର୍ଟରେ କରାଯାଇଥିବା ଆବେଦନରେ ୨୦୧୧ ଜନଗଣନା ଅନୁସାରେ ବିବାଦୀୟ ଗଞ୍ଜେଇପଦର, ଫାଟୁସେନେରି ଓ ଫଗୁଣସେନେରି ଗ୍ରାମ କୋଟିଆ ପଞ୍ଚାୟତ ଅଧୀନରେ ଆସୁଥିବା ଦର୍ଶାଯାଇଛି। ୧୯୬୮ ଡିସେମ୍ବର ୨ରେ ସର୍ବୋଚ୍ଚ ଅଦାଲତ ଦେଇଥିବା ନିର୍ଦ୍ଦେଶକୁ ଆନ୍ଧ୍ରପ୍ରଦେଶ ଖୋଲାଖୋଲି ଊଲ୍ଲଂଘନ କରୁଛି। ଏପରି କି ଓଡ଼ିଶାର ସୀମାକୁ ନେଇ ସୃଷ୍ଟି ହୋଇଥିବା ବିବାଦ ଉପରେ ଉଭୟ ରାଜ୍ୟ ସ୍ଥିତାବସ୍ଥା ଜାରି କରିବାକୁ ସୁପ୍ରିମକୋର୍ଟ ୨୦୦୬ ମାର୍ଚ୍ଚ ୩୦ରେ ଏକ ରାୟ ଦେଇଥିଲେ। ଉକ୍ତ ରାୟକୁ ମାନିବାକୁ ଉଭୟ ରାଜ୍ୟ ଅଣ୍ଡରଟେକିଂ ମଧ୍ୟ ଲେଖି ଦେଇଥିଲେ। ହେଲେ କୋର୍ଟଙ୍କ ଉକ୍ତ ନିର୍ଦ୍ଦେଶକୁ ଅବମାନନା କରି ଆନ୍ଧ୍ରପ୍ରଦେଶ କୋଟିଆ ଅଞ୍ଚଳରେ ପ୍ରବେଶ କରି ନିଜର ସ୍ଥିତି ଜାହିର କରିବାକୁ ଚେଷ୍ଟା କରୁଛି। ଏଥିସହିତ କୋଟିଆର ବିବାଦୀୟ ୩ ଗ୍ରାମପୁଞ୍ଜକୁ ବିଜୟନଗରମ୍ ଜିଲା ସାଲୁର ମଣ୍ଡଳ ଅଧୀନ ଦର୍ଶାଇ ସେଠାରେ ପଞ୍ଚାୟତ ନିର୍ବାଚନ କରିବାଇବାକୁ ଗତ ବର୍ଷ ମାର୍ଚ୍ଚ ୫ତାରିଖରେ ବିଜ୍ଞପ୍ତି ଜାରି କରିଛି। ଆନ୍ଧ୍ରପ୍ରଦେଶ ଜାଣିଶୁଣି କୋଟିଆ ପଞ୍ଚାୟତ ଅଧୀନରେ ଥିବା ଗଞ୍ଜେଇପଦର ଗ୍ରାମକୁ ଗଞ୍ଜାଇଭଦ୍ରା, ଫାଟୁସେନେରିକୁ ପଟ୍ଟୁଚେନମ୍ ଏବଂ ଫଗୁସେନେରିକୁ ଫାଗୁଲୁଚେନୁରୁ ବୋଲି ଦର୍ଶାଇଛି। ଉକ୍ତ ଗ୍ରାମଗୁଡ଼ିକ ଓଡ଼ିଶାର କୋଟିଆ ପଞ୍ଚାୟତ ଅଧୀନରେ ଆସୁଥିବା ସତ୍ତ୍ୱେ ଆନ୍ଧ୍ର ସରକାର ଚଞ୍ଚକତା କରି ୩ଟି ଗ୍ରାମକୁ ବିଭିନ୍ନ ପଞ୍ଚାୟତର ବୋଲି ଦର୍ଶାଇ ସେଠାରେ ନିର୍ବାଚନ କରିବାକୁ ଚେଷ୍ଟା କରିଛି।
ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ଉଲ୍ଲଂଘନ କରୁଥିବା ଦର୍ଶାଇ ଓଡ଼ିଶା ୨୦୨୧ ଫେବୃୟାରୀ ୧୦ରେ ଆନ୍ଧ୍ର ବିରୋଧରେ ଅଦାଲତ ଅବମାନନା ମାମଲା ରୁଜୁ କରିଥିଲା। ଆନ୍ଧ୍ର ମୁଖ୍ୟ ଶାସନ ସଚିବ, ଆନ୍ଧ୍ର ରାଜ୍ୟ ନିର୍ବାଚନ କମିଶନର ଏବଂ ବିଜୟନଗରମ୍ ଜିଲାପାଳଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଓଡ଼ିଶା ପକ୍ଷରୁ ପ୍ରାର୍ଥନା କରାଯାଇଥିଲା। କୋର୍ଟଙ୍କ ନିର୍ଦ୍ଦେଶ ଅନୁସାରେ ଆନ୍ଧ୍ରପ୍ରଦେଶ ପକ୍ଷରୁ ଏହାର ଜବାବ ଦାଖଲ କରାଯାଇଥିଲା। ଉକ୍ତ ମାମଲାର ଶୁଣାଣି କରି ସର୍ବୋଚ୍ଚ ଅଦାଲତ ଏହି ବିବାଦକୁ ଉଭୟ ପକ୍ଷ ରାଜନୈତିକ ସ୍ତରରେ ଆଲୋଚନା କରି ଆପୋସ ସମାଧାନ ପାଇଁ ୬ସପ୍ତାହ ସମୟ ଦେଇଛନ୍ତି। ଏହା ନ ହେଲେ ସୁପ୍ରିମକୋର୍ଟ ପରବର୍ତ୍ତୀ ପଦକ୍ଷେପ ନେବେ ବୋଲି ଖଣ୍ଡପୀଠ କହିଛନ୍ତି।
